ކޮވިޑުގެ ކޭސްތައް ކުއްލިއަކަށް އިތުރުވެފައިވާ ދެކުނު އޭޝިއާގެ ހަތަރު ގައުމަކުން މެލޭޝިއާއަށް ދަތުރު ކުރުން މަނާކޮށްފި އެވެ.
މެލޭޝިއާގެ އިމިގްރޭޝަން އޮތޯރިޓީން ބުނީ ސްރީ ލަންކާ، ޕާކިސްތާން، ބަންގްލަދޭޝް އަދި ނޭޕާލުން އެ ގައުމަށް އެތެރެވުން މިއަދުން ފެށިގެން މަނާ ވާނެ ކަމަށެވެ.
މިދިޔަ މަހު މެލޭޝިއާއިން ވަނީ އިންޑިއާއިން އެ ގައުމަށް ދަތުރު ކުރުން ވެސް މަނާކޮށްފަ އެވެ. މި ސަރަހައްދުގައި އެންމެ ހާލަތު ގޯސް ގައުމަކީ އިންޑިއާ އެވެ.
އޭގެ އިތުރުން ވެސް ރާއްޖެ ހިމެނޭ ގޮތަށް މި ސަރަހައްދުގެ ހުރިހާ ގައުމެއްގެ ކޭސްތައް ވަނީ އިތުރުވާން ފަށާފަ އެވެ. ހުރިހާ ގައުމަކުން ވެސް އަންނަނީ ބަލި ކޮންޓްރޯލް ކުރަން ފިޔަވަޅުތައް ހަރުކަށި ކުރަމުންނެވެ.
މެލޭޝިއާގެ ހާލަތަށް ބަލާއިރު އިއްޔެ އެ ގައުމުން 4،400 އަށް ވުރެ ގިނަ މީހުން ޕޮޒިޓިވްވެ، ޖުމްލަ އަދަދު ވަނީ 432،000 އަށް އަރާފަ އެވެ.
އިއްޔެ އެ ގައުމުގައި މި ބަލީގައި 22 މީހުން މަރުވުމާއެކު ޖުމްލަ އަދަދު ވަނީ 1،632 އަށް އަރާފަ އެވެ. މެލޭޝިއާގެ ބައެއް ހިސާބުތަކުގައި ވެސް ދަނީ ބަލި ކޮންޓްރޯލް ކުރަން ލޮކްޑައުން އުސޫލަށް އަމަލު ކުރަމުންނެވެ.
