ކޮވިޑާ ދެކޮޅަށް ޗައިނާގެ ސިނޮވެކް ބަޔޯޓެކް ކުންފުނިން އުފެއްދި ވެކްސިން މަސައްކަތް ކުރި ނަމަވެސް، އޭގެ ސައިޑް އިފެކްޓާ ގުޅޭ އިތުރު ޑޭޓާ ބޭނުންވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯގެ ސްޓްރެޓެޖިކް އެޑްވައިޒަރީ ގްރޫޕުގެ ތަޖުރިބާކާރުން ވަނީ ޗައިނާ، ބްރެޒިލް، އިންޑޮނީޝިއާ، ތުރުކީ އަދި ޗިލީގައި މި ވެކްސިން ދީގެން ހިންގި ޓެސްޓުތައް މުރާޖައާކޮށްފަ އެވެ.
ޑަބްލިއުއެޗްއޯއިން ބުނީ ސިނޮވެކްގެ ދެ ޑޯޒް ފުރިހަމަ ކުރުމުން އުމުރުން 18 އަހަރާއި 59 އަހަރާ ދެމެދުގެ މީހުންނަށް ބަލި ޖެހުމުގެ ފުރުސަތު ކުޑަވާ ކަމަށެވެ.
ނަމަވެސް މާބަނޑު މީހުންނާއި އުމުރުން ދުވަސްވީ މީހުންނާއި ބޮޑެތި ބަލިތަކުގެ މީހުންނަށް ވެކްސިން ދިނުމުން ކުރާނެ އަސަރާ މެދު މާ ބޮޑު ދިރާސާއެއް ނެތެވެ.
ޑަބްލިއުއެޗްއޯގެ ތަޖުރިބާކާރުންގެ އިތުރު ޓީމަކުން ދަނީ މި ވެކްސިން އެމެޖެންސީ ހާލަތްތަކުގައި ބޭނުން ކުރުމުގެ ހުއްދަ ދިނުމާ މެދު މަޝްވަރާ ކުރަމުންނެވެ. މިހާތަނަށް ފަސް ވެކްސިނަކަށް ޑަބްލިއުއެޗްއޯއިން ވަނީ ހުއްދަ ދީފަ އެވެ.
ދުނިޔޭގެ 32 ގައުމެއްގައި ސިނޮވެކް ވެކްސިނަށް ވަނީ ހުއްދަ ދީފަ އެވެ. މިހާތަނަށް އޭގެ 260 މިލިއަން ޑޯޒް ވަނީ ސަޕްލައިކޮށްފަ އެވެ.
މީގެ ކުރިން ޑަބްލިއުއެޗްއޯގެ ޓީމުން ވަނީ ޗައިނާގެ ސިނޮފާމް ވެކްސިން ވެސް މުރާޖައާކޮށްފަ އެވެ. އިއްޔެ އެ ވެކްސިނާ މެދު ޑަބްލިއުއެޗްއޯއިން ބުނީ ވައިރަހާ ދެކޮޅަށް ރަނގަޅަށް މަސައްކަތް ކުރާ ކަމަށެވެ. އެކަމަކު ސައިޑް އިފެކްޓާ ގުޅޭ ގޮތުން "ޔަގީންކަން ވަރަށް ކުޑަ" ކަމަށެވެ.
