ކޮވިޑުގެ ފަރުވާއަށް ހާއްސަކުރި ދަރުމަވަންތަ ހޮސްޕިޓަލުގެ އައިސީޔޫ ފުރުމުން އައިސީޔޫތަކާއި އެޑްމިޓްކުރާނެ އެނދުތައް އިތުރުކޮށް، ވ. ވެލިދޫ އައިސޮލޭޝަން ފެސިލިޓީއަކަށް އަނެއްކާވެސް ބަދަލުކުރުމުގެ މަސައްކަތް ކުރަމުން އަންނަ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން މިރޭ ބުނެފި އެވެ.
ރާއްޖޭގައި ކޮވިޑު ޖެހޭ މީހުންގެ އަދަދު ކޮންމެ ދުވަހު ދަނީ އިތުރުވަމުންނެވެ. އެޗްޕީއޭ އިން މިރޭ އާއްމުކުރި ހިސާބުތަކުން ދައްކާ ގޮތުގައި 24 ގަޑިއިރުގެ ތެރޭގައި މާލެއިން އެކަނި 540 މީހުންނަށް ވަނީ ބަލި ޖެހިފަ އެވެ. އަތޮޅުތަކުން 186 މީހުންނާ އެކު ޖުމްލަ 734 މީހުން މިއަދު ވަނީ ޕޮޒިޓިވްވެފަ އެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި، ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ މިހާރު އައިސްފައިވާ ރާޅާ އެކު ކެޕޭސިޓީ އިތުރު ކުރަން ޖެހޭ ކަމަށެވެ. ދަރުމަވަންތަ ހޮސްޕިޓަލްގެ އައިސީޔޫ ފުރިފައިވާތީ އިތުރު އައިސީޔޫތައް ހެދުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
ހުޅުމާލޭ ކޮވިޑް ފެސިލިޓީގެ 12 އެނދެއް އައިސީޔޫގެ ގޮތުގައި ބޭނުން ކުރަން ފަށާފައިވާއިރު މާދަން އިތުރުން އަށް އެނދެއް އައިސީޔޫގެ ގޮތުގައި ބޭނުން ކުރަން ފަށާނެ ކަމަށް ވެސް ވިދާޅުވި އެވެ.
މަބްރޫކް ވިދާޅުވި ގޮތުގައި ހޮސްޕިޓަލްގެ އެނދުތައް އިތުރު ކުރުމުގެ ގޮތުން ހުޅުމާލޭ ހޮސްޕިޓަލްގައި ވަކިން ހުރި އިމާރާތެއްގައި 50 އެނދު ގާއިމު ކުރުމުގެ މަސައްކަތް އަންނަނީ ކުރަމުންނެވެ. ފަރުކޮޅުފުށި އައިސޮލޭޝަން ފެސިލިޓީ ފުރިފައިވާތީ ވެލިދޫ އަނެއްކާވެސް ހުޅުވައި އައިސޮލޭޝަން ފެސިލިޓީއަކަށް ހެދުމުގެ މަސައްކަތް ފަށާފައިވާ ކަމަށް ވެސް މަބްރޫކް ވިދާޅުވި އެވެ.
އޭނާ ވިދާޅުވި ގޮތުގައި އެންމެ ދަތީ ސިއްހީ ހިދުމަތްތެރީން ހޯދުމަށެވެ. ވޮލަންޓިއަރުން ހޯދުމުގެ އިތުރުން އެއް އަހަރުގެ ކޮންޓްރެކްޓެއްގެ ދަށުން ރާއްޖެ އާއި ރާއްޖޭން ބޭރުން އައިޖީއެމްއެޗަށް މެޑިކަލް ސްޓާފުން ހޯދުމުގެ މަސައްކަތް އަންނަނީ ކުރަމުންނެވެ.
"ޑޮކްޓަރުން ހޯދުމުގައި ރާއްޖެއިން ލިބެން ތިބި ޑޮކްޓަރުން ވީހާވެސް އަވަހަށް ހަޔާ ކުރާނެ. އިސްކަން ދޭނީ ވެސް ރާއްޖޭގައި ތިބި ދިވެހި ޑޮކްޓަރުންނަށް،" މަބްރޫކް ވިދާޅުވި އެވެ.
މާލެ ސަރަހައްދުގައި މަސައްކަތް ކުރާ ޑޮކްޓަރުންގެ އަދަދަކީ 328 އެވެ. ނަރުހުންގެ ގޮތުގައި 1،800 ތިބި އިރު ލެބްޓެކްނީޝަނުންގެ ގޮތުގައި 127 މީހުން އަންނަނީ މަސައްކަތް ކުރަމުންނެވެ. އަތޮޅު ތެރޭގައި ސްޕެޝަލިސްޓް 159 ޑޮކްޓަރުން މަސައްކަތް ކުރާއިރު މެޑިކަލް އޮފިސަރުންގެ ގޮތުގައި 327 މީހުން އަންނަނީ މަސައްކަތް ކުރަމުންނެވެ.
މަބްރޫކް ވިދާޅުވީ ރާއްޖޭގައި ފުރަތަމަ ކޮވިޑް ފެތުރެން ފެށިއިރު ބޭނުންކުރި ސިއްހީ ހިދުމަތްތެރިން އަލުން އަނބުރާ ހިދުމަތަށް ގެނައުމުގެ މަސައްކަތް ކުރަމުން އަންނަ ކަމަށެވެ.
އައިޖީއެމްއެޗްގައި 38 ވެންޓިލޭޓަރު ހުރިއިރު ހުޅުމާލޭ މެޑިކަލް ފެސިލިޓީގައި 12 ވެންޓިލޭޓަރާއި އަތޮޅުތެރޭގައި 142 ވެންޓިލޭޓަރު އެބަހުރި ކަމަށް މަބްރޫކް ވިދާޅުވި އެވެ.
