ރާއްޖެއަށް ހޯދަން ހަވާލުކުރި ވެންޓިލޭޓަރުތައް ނުލިބި، އެކަމުގައި ކޮރަޕްޝަން ހިންގި ކަމަށް ތުހުމަތުކުރާ މައްސަލައިގައި މަގާމުން އެކަހަރިކޮށްފައި ހުންނަތާ ގިނަ ދުވަސްތަކެއް ފަހުން ވަކިކުރި ހެލްތު މިނިސްޓްރީގެ ކުރީގެ ނައިބު މިނިސްޓަރު ޝިޔާމާ މުހައްމަދު، އޭނާގެ ސޮއި ފޯޖުކޮށްފައިވާ ކަމަށް ވިދާޅުވެ މައްސަލަ ތަހުގީގުކޮށްދޭން އެދިވަޑައިގެންފި އެވެ.
ވެންޓިލޭޓަރު މައްސަލައިގެ ތަހުގީގަށް މަސައްކަތުން އެކަހެރިކޮށްފައި ހުންނަތާ ގާތްގަނޑަކަށް އަހަރެއްހާ ދުވަސް ފަހުން ޝިޔާމާ މަގާމުން ވަކިކުރީ އިއްޔެ އެވެ.
މަގާމުން ވަކިކުރި ފަހުން ޝިޔާމާ ނެރުއްވި ބަޔާނުގައި ވިދާޅުވީ ވެންޓިލޭޓަރު ގެނައުމުގެ އެއްބަސްވުމަށް މިނިސްޓްރީން އޭނާގެ ސޮއި ހޯދިއިރު، އެ އެއްބަސްވުމުގެ އަގުގެ ޖުމްލަ ފައިސާގެ 90 ޕަސެންޓް އެޑްވާންސް ޕޭމަންޓުގެ ގޮތުގައި އެ ކުންފުންޏަށް ދީފައިވާކަން އެއްވެސް ވަރަކަށް އެނގިވަޑައިގެންފައި ނުވާ ކަމަށެވެ.
"މާލީ މިހާބޮޑު މުއާމަލާތެއްގައި ދެފަރާތުގެ މެދުގައި އެއްބަސްވުމެއް ނެތި ފައިސާ ފޮނުވުމަކީ، ފިނޭންސް މިނިސްޓްރީގެ އިހުމާލެއް ކަމުގައި ދެކެން. އަދި ހަމަ އެއާ އެކު އަޅުގަނޑު ވަޒީފާއިން ވަކި ކުރުމަކީ، ވެންޓިލޭޓަރުތައް ނުލިބުމުން ދައުލަތަށް ލިބުނު ގެއްލުމުގެ ބަދަލުގެ ހައްލު ކަމުގައި ނުދެކެން،" ޝިޔާމާ ވިދާޅުވި އެވެ.
އޭނާ ވިދާޅުވެފައިވާ ގޮތުގައި، މި ބޮޑު މުއާމަލާތް ފެށިގެން ނިމުމާ ހަމައަށް މަސައްކަތްކުރި އެކި ފަންތީގެ މުވައްޒިފުން ހިމެނޭ ގޮތުން އެކަށީގެންވާ ތަހުގީގެއް ހިންގަން ޖެހޭނެ ކަމަށް އޭނާއަށް ގަބޫލުކުރެއްވެ އެވެ. އެ އެއްބަސްވުމަކީ، މުއާމަލާތެއްގެ ބައިވެރިން އަމަލު ކުރަން ހެދޭ ލިޔުމަށް ވާއިރު، އެއާ ނުލާ ފައިސާ ދޫކުރުމަކީ ސަރުކާރުގެ ފައިސާ އާއި މުދަލަށް އިހުމާލުވުމެއް ކަމަށް ވެސް ޝިޔާމާ ވިދާޅުވި އެވެ.
"އެއްބަސްވުމުގައި އަޅުގަނޑު ސޮއި ކުރި ކަމުގައިވިޔަސް އަޅުގަނޑަށް ލިބިފައިވާ މެއިލް ކޮޕީގައި އަޅުގަނޑުގެ ސޮއި ފޯޖް ކޮށްފައިވާ ކަމަށް ސާފުކޮށް ފެންނާތީ މައްސަލަ މޯލްޑިވްސް ޕޮލިސް ސާވިސްއަށް ހުށަހަޅަން ދިޔުމުން ބަލައި ނުގަނެ މައްސަލަ ބޭރުކޮލިކަން ފާހަގަ ކުރަން. އަދި އެންޓި ކޮރަޕްޝަން ކޮމިޝަން ގެ ތަހުގީގުގައި މިކަމާ ގުޅޭ ގޮތުން ތަކުރާރުކޮށް އަޑުއުފުލާފައި ވާނެ،" ޝިޔާމާ ވިދާޅުވި އެވެ.
އޭނާ ވަނީ މި މައްސަލައިގައި އެކަށީގެންވާ ފުރިހަމަ ޖިނާއީ ތަހުގީގެއް ކުރަން ޖެހޭނެ ކަމަށާއި ތަހުގީގަށް ފުރިހަމަ އެއްބާރުލުން ދެއްވާނެ ކަމަށް ވިދާޅުވެފަ އެވެ.
މީގެ އަހަރެއްހާ ދުވަސްކުރިން އެޕްރީލް، 2، 2020ގައި ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ އެކު ހެލްތު މިނިސްޓްރީން ވެންޓިލޭޓަރު ހޯދަން އެއްބަސްވެފައިވީ ނަމަވެސް މިހާތަނަށް ރާއްޖެ ފޮނުވީ ޖުމްލަ 15 ވެންޓިލޭޓަރެވެ. އެތައް މުއާމަލާތްތަކަކަށް ފަހު ވެސް ބާކީ 60 ވެންޓިލޭޓަރު އެ ކުންފުނިން ނުފޮނުވި އެވެ.
ވެންޓިލޭޓަރު ހޯދަން އެގްޒެކިއުޓާސްއާ އެކު ހެލްތު މިނިސްޓްރީން އެއްބަސްވީ 34 މިލިއަން ރުފިޔާ އަށެވެ. މީގެތެރެއިން 30 މިލިއަން ރުފިޔާ އެ ކުންފުންޏަށް ބޭންކް ގެރެންޓީއަކާ ނުލައި އެޑްވާންސްގެ ގޮތުގައި ވަނީ ދޫކޮށްފަ އެވެ. މިއީ ގޯސްކޮށް ހިންގާފައިވާ މުއާމަލާތެއް ކަން އޮޑިޓް ރިޕޯޓުގައި ވަނިކޮށް އޭސީސީން މި މައްސަލަ ތަހުގީގުކޮށް ހިޔާނާތް ހިންގާފައިވާ ކަމުގެ ތުހުމަތުތަކާ އެކު ދައުވާ އުފުލައިދޭން ވެސް އެދުނެވެ. އެ ތަހުގީގުގައި ބައެއް ކަންކަން ފުރިހަމަކުރަން ޕީޖީ އޮފީހުން ވަނީ މައްސަލަ އަނބުރާ އޭސީސީއަށް ފޮނުވައިފަ އެވެ.
ދައުވާކޮށްދޭން އެދުނު ފަރާތްތަކުގެ ތެރޭގައި އޭރުގެ ހެލްތު މިނިސްޓަރު އަބްދުﷲ އަމީން ވެސް ހިމެނެ އެވެ. އަމީން އިސްތިއުފާ ދެއްވީ ވެންޓިލޭޓަރު މައްސަލާގައި އަމިއްލައަށް މަސައްކަތުން އެކެހެރިވެގެން ހުންނެވުމަށްފަހު އެވެ.
ސަރުކާރުން މިހާރު ވަނީ ކުންފުންޏާ އެކު އޮތް އެއްބަސްވުން ބާތިލްކުރަން ނޯޓިސް ފޮނުވާފަ އެވެ.
