ކޮވިޑް ފަތުރާ ވައިރަހުގެ އާ ވޭރިއެންޓުތަކާ ދެކޮޅަށް ރަނގަޅަށް މަސައްކަތް ކުރާ ވެކްސިންތައް އުފައްދަން އިނގިރޭސި ސަރުކާރުން ފައިސާ ހޭދަކުރަން ނިންމައިފި އެވެ.
މިހާރު ލިބެން ހުރި ވެކްސިނުން ބައެއް ވޭރިއެންޓުތަކާ ދެކޮޅަށް ފޯރުކޮށްދޭ ރައްކާތެރިކަން ކުޑަ އެވެ. އޭގެ ތެރޭގައި ދެކުނު އެފްރިކާ އާއި އިނގިރޭސި ވިލާތުން ފެނުނު ވޭރިއެންޓު ހިމެނެ އެވެ.
ނަމަވެސް ކުރިއަށް އޮތް ތަނުގައި އުފެދިދާނެ ވޭރިއެންޓަކުން މިހާރު ހުރި ވެކްސިނަށް ނުގުޑައިފި ނަމަ ދެން ބޮޑެތި ގެއްލުންތަކެއް ދާނެ އެވެ. އިނގިރޭސި ސަރުކާރުން ބޭނުން ވަނީ އެ ހާލަތަށް ތައްޔާރުވާށެވެ.
މީގެ ކުރިން އިނގިރޭސި ސަރުކާރުން ވަނީ 19.7 މިލިއަން ޕައުންޑް ޕޯޓަން ޑައުން ރިސާޗް ލެބޯޓަރީގެ ޓެސްޓު ކުރާ ފެސިލިޓީއަށް ފޯރުކޮށްދީފަ އެވެ. މިހާރު ނިންމާފައި ވަނީ އިތުރު 29.3 މިލިއަން ޕައުންޑް ދިނުމަށެވެ.
އޭގެ އިތުރުން ވެކްސން އުފެއްދުމުގެ މަރުހަލާއަށް ވެސް ފައިސާ ފޯރުކޮށްދޭނެ އެވެ. މި އެހީގެ ސަބަބުން ސައިންސްވެރިންގެ ދިރާސާތައް އަވަސް ކުރެވޭނެ ކަމަށް އިނގިރޭސި ސަރުކާރުން އުއްމީދު ކުރެ އެވެ.
އިނގިރޭސި ސަރުކާރުން މިހާރު ވެސް ވަނީ އާ ވޭރިއެންޓާ ދެކޮޅަށް އުފައްދާ ވެކްސިނުގެ 50 މިލިއަން ޑޯޒަށް ޕްރީއޯޑަރުކޮށް ކިޔޯވެކް ކުންފުންޏާއެކު އެއްބަސްވުމެއްގައި ސޮއިކޮށްފަ އެވެ.
