ދުނިޔޭގެ އެންމެ އުސް ފަރުބަދަ، މައުންޓް އެވަރެސްޓަށް އެރުމުގެ ކުރިން ނޭޕާލުގައި މަޑު ކުރަން ޖެހޭ ބޭސް ކޭމްޕުގައި ހަލުވިކަމާއެކު ކޮވިޑް ފެތުރުމުގެ ބިރު އުފެދިއްޖެ އެވެ.
ބޭސް ކޭމްޕުގެ އޮފިޝަލުން ބީބީސީއަށް މައުލޫމާތު ދިން ގޮތުގައި މިހާތަނަށް 17 މީހަކު ޕޮޒިޓިވްވުމުން ވެރިރަށް ކަތްމަންޑޫގެ ހޮސްޕިޓަލްތަކަށް ފަރުވާ ދިނުމަށް ފޮނުވާފައި ވެ އެވެ.
ނަމަވެސް އެވަރެސްޓަށް އަރާ މީހުންގެ ތެރެއިން އެއްވެސް މީހަކު މިހާތަނަށް ޕޮޒިޓިވްވެފައި ނުވާ ކަމަށް ނޭޕާލް ސަރުކާރުން ބުނެ އެވެ.
މައުންޓް އެވަރެސްޓަށް އަރަން އެ ގައުމަށް ޒިޔާރަތް ކުރާ މީހުންގެ ފަރާތުން ލިބޭ އާމްދަނީއަކީ ނޭޕާލުގެ އިގްތިސާދަށް މުހިއްމު އެއްޗެކެވެ. މިދިޔަ އަހަރު ބަލިމަޑުކަން ފެތުރެން ފެށުމުން ފަރުބަދައަށް އެރުން މަނާ ކުރުމުން ވެސް ބޮޑެތި ގެއްލުންތައް ވި އެވެ.
އެހެންކަމުން ފަރުބަދައަށް އަރަން ދިޔަ މީހުންގެ ތެރެއިން ޕޮޒިޓިވް ކޭސްތަކެއް ފެނިފައި ނުވާ ކަމަށް ސަރުކާރުން ބުނަނީ، ފަރުބަދައަށް އެރުން މަނާކޮށް އާމްދަނީގެ މަގު ބަންދު ކުރަން ޖެހިދާނެތީ ކަމަށް ބެލެވެ އެވެ.
އެ ގައުމުގެ ޓޫރިޒަމް ޑިޕާޓްމަންޓުގެ ވެބްސައިޓުގައިވާ ގޮތުން އޭޕްރިލް 26 ގެ ނިޔަލަށް 394 މީހަކަށް ވަނީ ފަރުބަދައަށް އެރުމުގެ ހުއްދަ ދޫކޮށްފަ އެވެ. އެމީހުންގެ ސަޕޯޓް ސްޓާފުންނާއެކު ޖުމްލަ 1500 މީހުން ފަރުބަދައަށް އަރާނެ އެވެ.
މި ވަގުތު ނޭޕާލުގެ ކޮވިޑުގެ ހާލަތު ވަނީ ބޮޑަށް ގޯސްވެފަ އެވެ. އެހެންވެ ފަރުބަދައަށް އަރަން ބޭސް ކޭމްޕަށް ދިޔުމުގެ ކުރިން ދެ ހަފްތާ ވަންދެން ކަރަންޓީނު ވާން ޖެހެ އެވެ.
