މިލާން (މެއި 2) - އިޓާލިއަން ލީގުގެ ދެ ވަނައިގައި އޮތް އެޓަލަންޓާ މިރޭ ކުޅުނު މެޗުން ސަސުއޯލޯއާ 1-1 އިން އެއްވަރުވުމާ އެކު ބާކީ ހަތަރު މެޗު އޮއްވައި އިޓާލިއަން ލީގުގެ ޗެމްޕިއަންކަން އިންޓަ މިލާނުން ހޯދައިފި އެވެ.
އިންޓަ އަށް 11 އަހަރު ތެރޭ ފުރަތަމަ ފަހަރަށް ލީގު ޗެމްޕިއަންކަން ކަށަވަރުވީ ލީގުގެ ދެ ވަނައިގައި އޮތް އެޓަލަންޓާ އަށް ބާކީ ހަތަރު މެޗުން މޮޅުވެގެން ވެސް އިންޓައާ ހަމަނުކުރެވޭނެތީ އެވެ. އިންޓަ އެއް ވަނައިގައި އޮތީ 34 މެޗުން 82 ޕޮއިންޓާ އެކު އެވެ. ދެ ވަނައިގައި އޮތް އެޓަލަންޓާ އާއި ތިން ވަނައިގައި އޮތް އޭސީ މިލާނަށް ލިބިފައިވަނީ 34 މެޗުން 69 ޕޮއިންޓެވެ.
އިންޓަ އިން ރޭ ވަނީ ރެލިގޭޝަނުގައި އޮތް ކްރޮޓޯނޭ ބަލިކޮށްފަ އެވެ. އެޓަަލަންޓާ މިރޭ މޮޅުވުން މަޖުބޫރު މެޗަކަށް ނުކުމެ އެއްވަރުވިއިރު، މެޗުގެ ބޮޑުބައި އެ ޓީމުން ކުޅުނީ އެއް ކުޅުންތެރިއަކު މަދުކޮށެވެ. އެއީ މެޗުގެ 23 ވަނަ މިނިޓްގައި އެޓަލަންޓާގެ ކީޕަރު ޕެރްލުއީޖީ ގޮލީނީ އަށް ރަތް ކާޑު ދެއްކުމުންނެވެ. އެޓަލަންޓާ އިން ވަނީ ކުޅުންތެރިއަކު މަދުކޮށް ކުޅުނު ނަމަވެސް ލީޑުނަގައިފަ އެވެ. 32 ވަނަ މިނިޓްގައި އެޓަލަންޓާގެ ގޯލު ޖެހީ ރޮބިން ގޮސެން އެވެ. ސަސުއޯލޯ އަށް ދެ ވަނަ ހާފުގައި އެއްވަރުކޮށްދިނީ ޑޮމެނީކޯ ބެރާޑީ އެވެ.
އެންމެ ފަހުން ނުވަ ފަހަރު އިޓާލިއަން ލީގުގެ ތަށި އުފުލާލީ ޔުވެންޓަސް އިންނެވެ. މި ފަހަރު އިންޓަ އިން ލީގުގެ ޗެމްޕިއަންކަން ހޯދިއިރު، އެންޓޯނިއޯ ކޮންޓޭގެ ކޯޗުކަމުގައި މިދިޔަ ދެ އަހަރު އިންޓަ އިން ވަނީ ބޮޑު ކުރިއެރުމެއް ހޯދައިފަ އެވެ. ޔުވެންޓަސް އިން 2012 އިން 2014 އާ ހަމައަށް ޖެހިޖެހިގެން ތިން އަހަރު ލީގު ޗެމްޕިއަންކަން ހޯދިއިރު އެ ޓީމުގެ ކޯޗަކަށް ހުރީ ކޮންޓޭ އެވެ. އޭގެ ފަހުން ކޮންޓޭ ވަނީ ޗެލްސީއާ ހަވާލުވެ އެ ޓީމަށް އިނގިރޭސި ޕްރިމިއާ ލީގުގެ ޗެމްޕިއަންކަން ހޯދައިދީފަ އެވެ. އިންޓައާ ހަވާލުވެ މިދިޔަ ސީޒަނުގައި އެ ޓީމު ގޮވައިގެން ޔޫރޮޕާ ލީގުގެ ފައިނަލުގައި ކުޅުނެވެ.
މިއީ އިންޓަ އިން އެ ކްލަބްގެ ތާރީހުގައި ލީގު ކާމިޔާބުކުރި 19 ވަނަ ފަހަރެވެ. އިންޓަ އިން އެންމެ ފަހުން ލީގު ކާމިޔާބުކުރީ 2010 ވަނަ އަހަރު އެވެ. އެ ފަހަރު އެ ޓީމުގެ ކޯޗަކަށް ހުރީ ހޯސޭ މޮރީނިއޯ އެވެ.
