އަވައްޓެރި އިންޑިއާއަށް ދިމާވެފައިވާ ފަދަ ކޮވިޑުގެ ނުރައްކާތެރި ރާޅަކާ ކުރިމަތިލާން ޖެހިފައިވާ ކަމުގެ އިންޒާރު ނޭޕާލުގެ ޑޮކްޓަރުން ދީފި އެވެ.
ނޭޕާލާއި އިންޑިއާ ގުޅޭ ބޯޑަރު ސަރަހައްދުގައި މިހާރު ވެސް ކޭސްތަކަށް ވަނީ ކުއްލި އިތުރުވުމެއް އައިސްފަ އެވެ. އެއާއެކު އެ ހިސާބުތަކުގައި އޮކްސިޖަނުގެ ދަތިކަން ވެސް އެބަ އޮތެވެ.
ބޯޑަރު ސަރަހައްދުގައިވާ ބަންކޭ ޑިސްޓްރިކްޓުގެ ބޭރީ ހޮސްޕިޓަލުގެ ޑޮކްޓަރުން ބުނީ އެއީ "ކުޑަ އިންޑިއާ" އަކަށް ވެފައިވާ ކަމަށާއި ވައިރަސް ފެތުރެނީ ކޮންޓްރޯލެއް ނެތި ކަމަށެވެ.
"ހާލަތު މި ވަނީ ކޮންޓްރޯލުން ނެއްޓިފައި. އަޅުގަނޑުމެންނަށް ކުރެވޭނެ އެއްވެސް ކަމެއް ނެތް. ފަރުވާ ދޭނެ މުވައްޒަފުން ވެސް ނެތް،" އެ ހޮސްޕިޓަލުގެ ޗީފް ކޮންޒަލްޓަންޓް ފިޒިޝަން ރާޖަން ޕާންޑޭ ވިދާޅުވި އެވެ.
ފާއިތުވި ދެ ހަފްތާގެ ތެރޭގައި އެ ހޮސްޕިޓަލުގެ 80 އަށް ވުރެ ގިނަ މުވައްޒަފުން ވަނީ ކޮވިޑަށް ޕޮޒިޓިވްވެފަ އެވެ. މިދިޔަ ބުރާސްފަތި ދުވަހު ވެރިރަށް ކަތްމަންޑޫ ވަނީ ދެ ހަފްތާއަށް ލޮކްޑައުންކޮށްފަ އެވެ.
ހެލްތު މިނިސްޓަރު ހްރީދަޔޭޝް ޓްރިޕަތީ ވިދާޅުވީ ކޮވިޑުގެ ދެ ވަނަ ރާޅުގެ ނުރައްކާ ބޮޑުވެފައި މާ ހަލުވިކޮށް ބަލި ފެތުރެމުންދާ ކަމަށެވެ. ނޭޕާލީ ޓައިމްސްއަށް އޭނާ ވިދާޅުވީ ސިއްހީ ނިޒާމަށް މިކަން ކޮންޓްރޯލް ނުކުރެވޭނެ ކަމަށެވެ.
ކަތްމަންޑޫއަށް ފަހު އެންމެ ބޮޑަށް ބަލީގެ އަސަރުކޮށްފައި ވަނީ ބަންކޭއަށެވެ. ފާއިތުވި 24 ގަޑިއިރުގެ ތެރޭގައި އެ ތަނުން 12 މީހުން މަރުވި އެވެ. މިހާތަނަށް ނޭޕާލުގައި ޖުމްލަ 323،187 މީހުންނަށް ކޮވިޑް ޖެހިފައި ވާއިރު، މަރުވީ 3279 މީހުންނެވެ. މިހާރު ދުވާލަކު ގާތްގަނޑަކަށް 6000 މީހުން ޕޮޒިޓިވްވެ އެވެ.
ނޭޕާލުގެ ޑޮކްޓަރުން ގަބޫލުކުރާ ގޮތުގައި އެ ގައުމުގައި މިހާރު ފެތުރެމުން ދަނީ އިންޑިއާއިން ފެނުނު އާ ވޭރިއެންޓެވެ. އެހެންކަމުން ދެ ވަނަ ރާޅުގައި ޒުވާނުންނާއި ކުޑަކުދިން ވެސް ދަނީ ބަލިވަމުންނެވެ. ޑޮކްޓަރުން އެހެން ބުނި ނަމަވެސް އެކަން ޔަގީން ކުރެވޭނެ ސައިންޓިފިކް މައުލޫމާތު ހޯދިފައެއް ނުވެ އެވެ.
ނޭޕާލްގެ އާބާދީގެ ތެރެއިން މިހާތަނަށް ވެކްސިން ޖެހީ އެންމެ ހަތް ޕަސެންޓު މީހުންނެވެ. އެ ގައުމަށް ވެކްސިން ލިބުނީ އިންޑިއާއިން 100،000 ޑޯޒް ހަދިޔާ ކުރުމުންނެވެ. އިންޑިއާއަށް ވެކްސިނުގެ ދަތިކަން ދިމާވެ އެކްސްޕޯޓް ކުރުން ހުއްޓާލުމުން މިހާރު ނޭޕާލުން ވެކްސިން ހޯދަން މަސައްކަތް ކުރަނީ ޗައިނާއިންނެވެ.
ނޭޕާލުގައި ހުންނަ ދުނިޔޭގެ އެންމެ އުސް ފަރުބަދަ މައުންޓް އެވަރެސްޓްއާ ހަމައަށް ކޮވިޑް ފޯރާފައިވާ ކަމަށް ފެތުރުނު ހަބަރު ނޭޕާލް ސަރުކާރުން ދޮގު ކުރެ އެވެ. ނަމަވެސް މިދިޔަ ހަފްތާގައި އެ ފަރުބަދައަށް އެރި ނޯވޭގެ އާލަންޑް ނެސް ނަމަކަށް ކިޔާ މީހަކަށް ކޮވިޑް ޖެހިގެން ހެލިކޮޕްޓަރުގައި ފަރުވާ ދޭން ގެންދަން ޖެހުނު ކަމަށް ބޭރުގެ ނޫސްތަކުގައި ވެ އެވެ.
