ކޮވިޑްގެ ނުރައްކާ ބޮޑު ގައިދީން ވަގުތީ ގޮތުން ގޭ ބަންދަށް ބަދަލު ކުރިނަމަވެސް އޭގެ ތެރޭގައި ނުރައްކާތެރި ކުށްވެރިން ނުހިމެނޭނެ ކަމަށް، ކޮމިޝަނާ އޮފް ޕްރިޒަންސް، އަހުމަދު މުހައްމަދު ފުޅު މިއަދު ވިދާޅުވި އެވެ.
ޖަލުގައި ކޮވިޑް ފެތުރިދާނެތީ އަޅާ ރައްކާތެރިކަމުގެ ފިޔަވަޅެއްގެ ގޮތުން ކޮވިޑަށް ހައި ރިސްކް ގައިދީން ގޭ ބަންދަށް ބަދަލު ކުރަން ވަނީ ނިންމައިފަ އެވެ. އެގޮތުން ކުރީގެ ރައީސް އަބްދުﷲ ޔާމީން ވެސް މިދިޔަ ބުރާސްފަތި ދުވަހު ވަނީ ގޭ ބަންދަށް ބަދަލު ކޮށްފަ އެވެ.
ކޮމިޝަނާ އޮފް ޕްރިޒަންސް އަހުމަދު "އަދަދު" އަށް ވިދާޅުވީ ކޮވިޑަށް ހައި ރިސްކް މީހުންގެ ތެރޭގައި ނުރައްކާތެރި ކުށްވެރިއެއް ހިމެނޭނަމަ އޭނާ ބަލަހައްޓާނީ ޖަލުގެ ތެރޭގައި ކަމަށެވެ. ޕޮޒިޓިވް ވިޔަސް ފަރުވާ ދެވޭނެ އިންތިޒާމު ޖަލުތަކުގައި ވެސް ގާއިމު ކޮށްފައިވާ ކަމަށް އޭނާ ވިދާޅުވި އެވެ.
"މުޖުތަމައުގެ ރައްކާތެރިކަން މާ މުހިންމު. ގޭ ބަންދަށް ބަދަލު ކުރާއިރު އަޅުގަނޑުމެން ބަލާނީ ނުރައްކާތެރި ނޫން ކުށްވެރިން ބަދަލު ކުރުމަށް،" އަހުމަދު ވިދާޅުވި އެވެ.
އޭނާ ވިދާޅުވީ ގޭ ބަންދަށް ބަދަލު ކުރާނީ އާއިލާއިން ހަވާލުވާ ގައިދީން އެކަނި ކަމަށެވެ. އެ މީހުން ބަންދުގައި ތިބޭތޯ ކަރެކްޝަންސްއިން ބަލައި މޮނީޓާ ކުރާނެ ކަމަށް އޭނާ ވިދާޅުވި އެވެ.
ހައިރިސްކް މީހުން ކަނޑައެޅުމުގައި ދިގު މުއްދަތަކަށް ބޭސް ކާ މީހުންނާއި ބޮޑެތި އޮޕަރޭޝަންތައް ކޮށްފައިވާ މީހުންނަށް ބަލަ އެވެ.
ކޮމިޝަނާ އޮފް ޕްރިޒަންސް، އަހުމަދު މުހައްމަދު ފުޅު: ނުރައްކާތެރި ކުށްވެރިން ގެ ބަންދަށް ބަދަލު ނުކުރާނެ ކަމަށް ވިދާޅުވި-- ފޮޓޯ: ޕްރިޒަންސް
އަހުމަދު ވިދާޅުވީ ޖަލުތަކުގައި ތިބި ހައި ރިސްކް މީހުން ކަނޑައެޅުމުގެ މަސައްކަތް ޑޮކްޓަރުން ކުރަމުން އަންނަ ކަމަށެވެ. ފެށޭ ހަފްތާގެ ތެރޭގައި ހައި ރިސްކް މީހުން ކަނޑައަޅައި ގޭ ބަންދަށް ބަދަލު ކުރަން ފަށާނެ ކަމަށް ވިދާޅުވި އެވެ.
މާފުށީގައި ހަލުވިކަމާއެކު ކޮވިޑް ފެތުރި ޖަލު އޮފިސަރުންތަކެއް ވަނީ ކޮވިޑަށް ޕޮޒިޓިވް ވެފަ އެވެ. މާލެ އާއި އަތޮޅުތެރޭގައި ވެސް ކޮވިޑަށް ޕޮޒިޓިވްވާ މީހުންގެ އަދަދު މިހާރު ދަނީ އިތުރުވަމުންނެވެ.
