ކުއްލި ހާލަތްތަކުގައި މޮޑާނާގެ ކޮވިޑް ވެކްސިން ބޭނުން ކުރުމުގެ ހުއްދަ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދީފި އެވެ.
މިއީ ކޮވިޑާ ދެކޮޅަށް ހަދާފައިވާ ވެކްސިނުތަކުގެ ތެރެއިން ޑަބްލިއުއެޗްއޯގެ ހުއްދަ ލިބުނު ފަސް ވަނަ ވެކްސިނެވެ. އެ ޖަމިއްޔާގެ ހުއްދަ ނުލިބެނީސް ބައެއް ގައުމުތަކުގައި އަންނަނީ ވެކްސިން ދެމުންނެވެ.
ޑަބްލިއުއެޗްއޯއިން ނެރުނު ބަޔާނެއްގައި ބުނީ މި ވަގުތު އެންމެ މުހިއްމީ ވީ އެންމެ އަވަހަކަށް ބޭހާއި، ވެކްސިން އަދި ޓެސްޓު ކުރެވޭނެ ގޮތްތައް މަގުފަހިވުން ކަމަށެވެ.
އެ ޖަމިއްޔާގެ އެސިސްޓެންޓް ޑިރެކްޓަ ޖެނެރަލް މަރިއެންޖެލާ ސިމާއޯ ވިދާޅުވީ ބައެއް ގައުމުތަކަށް ވެކްސިން ސަޕްލައިގެ ދަތިކަން ދިމާވެފައި ވާތީ، ގިނަ ބްރޭންޑުގެ ވެކްސިނަށް ހުއްދަ ދޭން ޖެހޭ ކަމަށެވެ.
ޑަބްލިއުއެޗްއޯއިން ގައުމުތަކަށް ވެކްސިން ފޯރުކޮށްދޭން ހިންގާ ކޯވެކްސް ފެސިލިޓީއަށް އެންމެ ގިނައިން ވެކްސިން އުފައްދާ އިންޑިއާއަށް ވެސް ވަނީ ވެކްސިންގެ ދަތިކަން ކުރިމަތިވެފަ އެވެ.
އޭގެ ސަބަބުން ވެކްސިން އެކްސްޕޯޓް ކުރުން މަނާކޮށް، އިންޑިއާ ރައްޔިތުންނަށް ވެކްސިން ދޭން އިސްކަން ދިނުމުގެ ވިސްނުން މިހާރު އެ ގައުމުގައި އެބަ އޮތެވެ.
މި ހަފްތާގައި މޮޑާނާއިން ބުނީ ޕްރޮޑަކްޝަން އިތުރުކޮށް 2022 ގެ ކުރިން ތިން ބިލިއަން ޑޯޒް އުފެއްދޭ ވަރު ކުރާނެ ކަމަށެވެ. މީގެ ކުރިން ޑަބްލިއުއެޗްއޯގެ ސްޓްރެޓެޖިކް އެޑްވައިޒަރީ ގްރޫޕް އޮފް އެކްސްޕާޓްސް އޮން އިމިއުނައިޒޭޝަނުން ވަނީ 18 އަހަރުން މަތީގެ އެންމެންނަށް މި ވެކްސިން ދެވޭނެ ކަމަށް ބުނެފަ އެވެ.
މޮޑާނާގެ އިތުރުން ފައިޒާ ވެކްސިނާއި، އެސްޓްރަޒެނެކާ ވެކްސިނާއި، އިންޑިއާގެ ސިރަމް އިންސްޓިޓިއުޓުން އުފައްދާ ކޮވިޝީލްޑާއި ޖޯންސަން އެންޑް ޖޯންސަން ވެކްސިނަށް ވެސް ޑަބްލިއުއެޗްއޯއިން ހުއްދަ ދީފައި ވެއެވެ.
ޗައިނާގެ ސިނޮފާމާއި ސިނޮވެކް ވެކްސިނަށް ހުއްދަ ދިނުމާ މެދު އަންނަ ހަފްތާގައި ގޮތެއް ނިންމާނެ އެވެ.
