ގިނަ ގައުމުތަކެއްގައި ކުއްލިއަކަށް ކޮވިޑު ކޭސްތައް އިތުރުވެ، ހާލަތު ގޯސްފައިވާ މި ދަނޑިވަޅުގައި އޭޝިއާގައި ހިމެނޭ ކުޑަ ސިންގަޕޫރަކީ މި ބަލިމަޑުކަމުގައި ދިރިއުޅެން އެންމެ ރަނގަޅު ގައުމަކަށް ވެއްޖެ އެވެ.
ބްލޫމްބާގް ކޮވިޑް ރެޒިލިއެންސް ރޭންކިން މި ހަފްތާގައި ނެރުނު އިރު، ނިއުޒީލެންޑު ވައްޓާލުމަށް ފަހު އެއް ވަނަ ހޯދީ ސިންގަޕޫރެވެ. ކޮވިޑުގައި އުޅެން އެންމެ ރަނގަޅު ތަންތަން ހިމެނޭ މި ލިސްޓުގައި ބަލަނީ ކޮވިޑުގެ އަދަދުތަކުން ފެށިގެން ގޮސް، ދަތުރު ކުރުމުގެ މިނިވަންކަން އޮތް މިންވަރު ފަދަ ކަންކަމަށެވެ.
ބްލޫމްބާގް މަޖައްލާއިން ބުނީ ސިންގަޕޫރަށް އެއް ވަނަ ލިބުނީ ވެކްސިން ޕްރޮގްރާމުގެ ކާމިޔާބު ކަމުގެ ސަބަބުން ކަމަށެވެ. އެއާ ހިލާފަށް ނިއުޒީލެންޑުގައި ވެކްސިން ޕްރޮގްރާމް ކުރިއަށް ދަނީ ވަރަށް މަޑު ދުވެއްޔެއްގަ އެވެ.
ސިންގަޕޫރުގެ ގިނަ ކަންކަން ކޮވިޑުގެ ކުރިން އޮތް އާއްމު ހާލަތަށް ރުޖޫއަވެފައިވި ނަމަވެސް ދޭތެރެއަކުން ބައެއް ކޭސްތައް ފެނެ އެވެ. ނަމަވެސް ވަރަށް އަވަހަށް ކޮންޓްރޯލް ކުރާ މަންޒަރު ވެސް އެ ގައުމުން ފެނެ އެވެ.
ކޮމިއުނިޓީ ސްޕްރެޑް ވަރަށް ކުޑަކޮށް އޮތް ސިންގަޕޫރުގައި މިހާރު ވަނީ އަނެއްކާވެސް ކޮންމެވެސް ވަރަކަށް ފިޔަވަޅު ހަރުކަށިކޮށްފަ އެވެ. އެގޮތުން ބޯޑަރު ސެކިއުރިޓީ ވަރުގަދަކޮށް، ދަތުރު ކުރުމުގެ ހުރަސްތައް އެބަ ހުއްޓެވެ. އޭގެ އިތުރުން ގައުމަށް އެތެރެވާ މީހުން ވަގުތުން އައިސޮލޭޝަނަށް ބަދަލު ކުރެ އެވެ.
މިދިޔަ އަހަރު ދެ މަސް ދުވަހަށް ސިންގަޕޫރު ލޮކްޑައުން ކުރި އެވެ. އޭގެ ފަހުން އިޖުތިމާއީ އަދި އިގުތިސާދީ ހަރަކާތްތަކަށް އަދި އެއްވެސް ހުއްޓުމެއް ނާދެ އެވެ.
ބޭރަށް ނިކުންނަ އިރު މާސްކު އަޅަން މަޖުބޫރުވި ނަމަވެސް ވިޔަފާރިތަކަށް ހުރަހެއް ނެތެވެ. ބޭރުގައި ކައިބޮއި ހަދާއިރު އަދި ކަސްރަތު ކުރާއިރު މާސްކު ނެގުމުގެ ހުއްދަ އޮވެ އެވެ.
ގައިދުރުކަން ބެހެއްޓުމަކީ ސިންގަޕޫރުގައި ވަނީ އާދައަކަށް ހަދާފައި.-- ފޮޓޯ: ގެޓީ އިމޭޖަޒް
ސިންގަޕޫރުގެ އޮފީސްތައް ހުޅުވާފައިވަނީ ގައިދުރުކޮށް މުވައްޒަފުންނަށް ތިބެވޭނެ ގޮތަށެވެ. މާސްކު އެޅުމުގެ އިތުރުން ކޮންޓެކްޓް ޓްރޭސިން އެޕް ބަރާބަރަށް އަޕްޑޭޓް ކުރާ ނަމަ އެއްވެސް ކަމަކަށް ހުރަހެއް ނެތެވެ.
އެ ގައުމުގެ ހަ މިލިއަން މީހުންގެ އާބާދީގެ 15 ޕަސެންޓު ވަނީ ވެކްސިން ފުރިހަމަކޮށްފަ އެވެ. އެ ގައުމުގައި މިހާތަނަށް ކޮވިޑު ޖެހުނީ 61،121 މީހުންނަށެވެ. އަދި މަރުވެފައި ވަނީ 30 މީހުންނެވެ.
