ކޮވިޝީލްޑް ކޮވިޑް ވެކްސިން ޖެހުމަށް މިއަދު 5:30 އިން ފެށިގެން ސޯޝަލް ސެންޓާ ކައިރި ގިނަ ބަޔަކު ކިޔު ހަދައިފި އެވެ.
ރޯދަ މަހު ވެކްސިން ޖަހަން ހާއްސަކޮށްފައި އޮންނަނީ ތިން ގަޑިއިރެވެ. އެއީ ރޭގަނޑު 9:00 އިން ފެށިގެން 11:45 އަށެވެ. ރެއިން ފެށިގެން ގިނަ ބަޔަކު ކިޔޫއަށް އަރަން ފެށީ އޮންލައިންކޮށް ޓޯކަން ދޫކުރުން ހުއްޓާލުމާ ގުޅިގެންނެވެ.
މިއަދު 5:30 ގައި ކިޔޫ ހަދަން ފެށިއިރު 7:30 ވިއިރު ވެސް ދިވެހިން ތިބި ކިޔޫ އޮތީ ސޯޝަލް ސެންޓަރުން ފެށިގެން ގޮސް ކަނބާއައިސާ ރަނި ހިނގުމުން ސޯޝަލް ސެންޓަރު ނިމޭ ހިސާބަށެވެ.
ބިދޭސީންގެ ކިޔޫ ސޯޝަލް ސެންޓަރުން ފެށިގެން ގޮސް ބޮޑުތަކުރުފާނު މަގުން ޕެވީލިއަނަށް އަރަން ހަދާފައިވާ ބްރިޖާ ހަމައަށް އޮތެވެ.
ވެކްސިން ޖެހުމަށް ގިނަ ބަޔަކު ކިޔޫގައި: ރޯދަ ނުވިއްލާ ގިނަ ބަޔަކު ވަނީ ކިޔޫ ހަދައިފައި-- ފޮޓޯ: އަހުމަދު ސާއިލް އަލީ/ އަދަދު
ދިވެހީންގެ ކިޔޫގެ އެންމެ ކުރީގައި ހުރި މީހާ "އަދަދު" އަށް ބުނީ އެ މީހުން ކިޔޫ ޖެހުނީ ރޯދަ ވިއްލުމަށް އެއްޗެހި ހިފައިގެން ކަމަށެވެ. ވެކްސިން ޖަހަން ފެށުމުގެ ހަތަރު ވަރަކަށް ގަޑިއިރު ކުރިން ކިޔޫ ޖެހެން ޖެހުނީ ޓޯކަން ނަމްބަރު ނުލިބޭތީ ކަމަށް އޭނާ ބުންޏެވެ.
"މިތާ ފިހާރައަކުން އެއްޗެއް ގަނެގެން ރޯދަ ވިއްލީ ވެސް. ނަމްބަރެއް ނުލިބޭ ވިއްޔަ އެހެން ނޫނީ،" އޭނާ ބުންޏެވެ.
ރޯދަ މަހެއްގެ ހަވީރުން ފެށިގެން ކިޔޫގައި ތިބި މީހުންގެ ތެރެއިން ދެ ޖިންސުގެ އެކި އުމުރު ފުރައިގެ މީހުން ހިމެނެ އެވެ. އެ މީހުންގެ ކަންބޮޑުވުމަކީ ވެކްސިން ޖަހަން މިހާ އުނދަގޫ އިންތިޒާމެއް އޮތުމުންނެވެ.
"މިއީ ދެން ކިހާ އުނދަގޫ ކަމެއް. ރޯދަ މަހެއްގައި އަޅުކަމާ ވެސް ނޫޅެވި މިހާލެއްގައި. މިވަރުން ވެސް މިކަން ކުރަން ޖެހޭތީ މިއިނީ އައިސް،" ނަން ނުޖަހަން ޝަރުތުކޮށް ވެކްސިން ޖަހަން ގޮސް ހުރި މީހަކު ބުންޏެވެ.
ރޯދަމަހާ ދިމާކޮށް ގިނަ ބަޔަކު ވެކްސިން ޖަހަން ގޮސް ކިޔޫތައް ބޮޑުވުމުން އެޗްޕީއޭ އިން ވަނީ އޮންލައިންކޮށް ނަމްބަރު ނެގޭނެ ގޮތް ހަދައިފަ އެވެ. މިގޮތަށް ހަމަޖެއްސުމުން ގިނައިރުތަކެއް ވަންދެން ކިޔޫގައި މަޑުކުރަން ނުޖެހި ވެކްސިން ޖެހެ އެވެ. ގޭގައި ތިބެ ނަމްބަރު ނެގުމަށް ފަހު ނަމްބަރު ޖެހެން ކައިރިވުމުން މަރުކަޒަށް ގޮސް ވެކްސިން ޖެހެ އެވެ.
އެކަމަކު ރޭ ކިއުބީން އޮންލައިންކޮށް ވެކްސިން ނަމްބަރު ދުލެއް ނުކުރެ އެވެ. އެޗްޕީއޭއިން ބުނީ އޮންލައިންކޮށް ނަމްބަރު ދޫކުރުން ހުއްޓައިލީ އެކަމަށް ތަރުހީބު ކުޑަކަމުން ކަމަށެވެ.
ވެކްސިން ޖެހުމަށް ހެލްތު މިނިސްޓްރީން ހަމަޖައްސާފައިވާ އިންތިޒާމުތައް ގޯސްވެގެން ގިނަ ބަޔަކު ދަނީ ފާޑު ކިޔަމުންނެވެ. ފާޑުކިޔުންތައް އަމާޒު ވެފައިވަނިކޮށް އޮންލައިންކޮށް ޓޯކަން ދޫކުރުން ހުއްޓާލުމުން އިތުރަށް ފާޑު ކިޔުން އަމާޒުވި އެވެ.
މާލޭގައި ވެކްސިން ދެމުން އަންނަނީ ސޯޝަލް ސެންޓަރުގެ އިތުރުން ރައްޔިތުންގެ މަޖިލީހުގެ އިދާރާގަ އެވެ.
ރާއްޖޭގައި މިހާތަނަށް 294،265 މީހުންނަށް ވަނީ ވެކްސިން ދީފަ އެވެ. އަދި 92،612 މީހުން މިހާތަނަށް ދެ ވަނަ ޑޯޒު ޖަހައިފި އެވެ.
