އއ. މަތިވެރީގައި ހަލުވިކަމާ އެކު ކޮވިޑް ފެތުރި ހަތަރު ދުވަސް ތެރޭގައި 97 މީހުން ޕޮޒިޓިވްވެއްޖެ އެވެ.
އެ ރަށުން ބަލި ފެނުމާ އެކު ކޮންޓެކްޓް ޓްރޭސިން ހަދައި އިއްޔެ ވެސް ގިނަ ސާމްޕަލްތައް ނެގި އެވެ. މިހާތަނަށް ޕޮޒިޓިވްވި މީހުންނާ ވެސް ގާތުން ބައްދަލުވި ބަޔަކު ތިބުމާއި ޓެސްޓްކުރި މީހުންގެ ތެރޭގައި އަލާމާތްތައް ފެނުނު މީހުން ހިމެނޭތީ އޭގެތެރެއިން ވެސް ގިނަ ބަޔަކު ޕޮޒިޓިވްވުން ގާތެވެ.
މަތިވެރީ ކައުންސިލުން ބުނީ އެ ރަށުގައި ބަލި ފެތުރުނު ސަބަބެއް ކަމަށް ބެލެވެނީ ކަރަންޓީނާ ނުލައި ރަށުގައި ޗުއްޓީ ހޭދަކުރި ޓޫރިސްޓުންތަކެއްގެ ފަރާތުން ކަމަށެވެ. އެޗްޕީއޭ އިން ކުރިން ކަނޑައަޅާފައި އޮތް ގޮތުން ރަށްރަށުގައި ޗުއްޓީ ހޭދަކުރާ ޓޫރިސްޓުން ކަރަންޓީނުވާކަށް ނުޖެހެ އެވެ.
މަތިވެރި ކައުންސިލްގެ ރައީސް އިސްމާއިލް އާތިފް "އަދަދު" އަށް ވިދާޅުވި ގޮތުގައި މަތިވެރިން އެންމެ ފުރަތަމަ ކޮވިޑް ކޭސްއެއް ފެނުނީ އެ ރަށުގައި ޗުއްޓީހޭދަ ކުރުމަށް ފަހު އިންޑިއާގެ ޓޫރިސްޓުންތަކެއް ފުރިތާ ދެ ދުވަސް ފަހުންނެވެ.
އޭނާ ލަފާކުރައްވަނީ ރަށަށް ބަލި ފެތުރުނީ ޓޫރިސްޓުންގެ ފަރާތުން ކަމަށެވެ.
އާތިފް ވިދާޅުވީ ކޭސްތައް އިތުރުވަމުން ދާތީ، ކޮންޓްރޯލް ކުރުމަށް ކައުންސިލުން ހާއްސަ ފިޔަވަޅުތަކެއް އަޅައި ރަށުތެރެއަށް މީހުން ނިކުމެ އުޅުން މަނާކޮށް، ގޭގެއަށް ބޭނުންވާ ތަކެތި ޑެލިވަރީ ކުރުމުގެ ހިދުމަތް ފަށާފައިވާ ކަމަށެވެ.
"މަގުމަތީގައި މާސްކް ނާޅައި އުޅުމަކީ ވެސް މިހާރު މަނާ ކަމެއް. މާސްކް ނާޅައި އުޅޭ ނަމަ ނަސޭހަތް ދިނުމެއް ނެތި ޖޫރިމަނާ ކުރުމުގެ ކަންކަން ފުލުހުން ކުރަމުންދާނެ،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި މަތިވެރިން އިއްޔެ 250 އަށް ވުރެ ގިނަ ރެންޑަމް ސާމްޕަލް ނެގިއިރު އޭގެ ތެރޭގައި އަލާމާތްތައް ފެނިގެން ޓެސްޓު ކުރި މީހުން ހިމެނެ އެވެ.
އާތިފް ވިދާޅުވީ ބަލި ފެތުރިފައި އޮތަސް ރަށުގައި އާންމު ހާލަތު އަދި އެހާ ގޯސް ނޫން ކަމަށެވެ. ހާލު ބޮޑު ބަލި މީހަކު ވެސް މިވަގުތު އެ ރަށުގައި ނެތެވެ. އުމުރުން ދުވަސްވީ މީހަކު ޕޮޒިޓިވްވެފައިވާ ނަމަ އެ މީހަކަށް ހާއްސަކޮށް ފަރުވާ ދެމުން އަންނަ ކަމަށް ވިދާޅުވި އެވެ.
އެޗްޕީއޭގެ ހިސާބުތަކުން ދައްކާ ގޮތުގައި މާލެއަށް ވުރެން ރަށްރަށުގެ ކޮވިޑުގެ ހާލަތު މި ދުވަސްކޮޅު ގޯހެވެ. ގިނަ ރަށްތަކެއްގައި އޮތީ ބަލި ފެތުރިފަ އެވެ.
އެހެންވިޔަސް އެޗްޕީއޭ އިން އެންމެ ފަހުން ނެރެފައިވާ ގައިޑްލައިންގައި ވަނީ ރަށްރަށަށް ދަތުރުކުރުމުގައި ލުއިތަކެއް ދީފަ އެވެ. އެގޮތުން އާބާދީގެ 60 ޕަސެންޓް މީހުންނަށް ކޮވިޑްގެ ވެކްސިންގެ ދެ ޑޯޒް ހަމަވެފައިވާ ނަމަ، އެ ރަށަކަށް ކަރަންޓީނުވުމަކާ ނުލައި ދަތުރުކުރެވޭނެ އެވެ.
އެކަމަކު މިހާތަނަށް އެއްވެސް ރަށެއްގައި އާބާދީގެ 60 ޕަސެންޓަށް ކޮވިޑް ވެކްސިނެއް ނުދެވެ އެވެ.
