ޕާކިސްތާނުގެ ގެތާ ސިޓީގެ ލަގްޒަރީ ހޮޓަލެއްގައި ބޮމެއް ގޮއްވާލުމުގެ ސަބަބުން ހަތަރު މީހުން މަރުވެ، 12 މީހުން ޒަހަމްވެއްޖެ އެވެ.
ރިޕޯޓުތައް ބުނާ ގޮތުން މި ހަމަލާއަކީ ޗައިނާއިން ޕާކިސްތާނަށް ކަނޑައަޅާފައި ހުންނަ ސަފީރަށް އަމާޒު ކުރި ހަމަލާ އެވެ. ބޮން ގޮއްވާލީ ސެރީނާ ހޮޓަލުގެ ކާރު ޕާކު ކުރާ ސަރަހައްދެއްގަ އެވެ.
ޗައިނާ ސަފީރު ނޮންގް ރޮންގް މި ވަގުތު ހުންނެވީ އަފްގާނިސްތާނުގެ ބޯޑަރު ކައިރީގައި އޮންނަ ބަލޮޗިސްތާން ޕްރޮވިންސްގެ ގެތާ ސިޓީގަ އެވެ. ނަމަވެސް ހާދިސީ ހިނގި ވަގުތު ސަފީރު ހުންނެވީ ހޮޓަލުގައެއް ނޫނެވެ.
ހަމަލާގެ ޒިންމާ ޕާކިސްތާނު ތާލިބާނުން އުފުލި ނަމަވެސް، ސަބަބު ބަޔާންކޮށްފައެއް ނުވެ އެވެ.
ފަހަކަށް އައިސް ޕާކިސްތާނުގެ ތާލިބާނުން ދޭ ހަމަލާތައް ވަނީ ވަނީ އިތުރުވެފަ އެވެ. އެ މީހުން ބޮޑަށް ހަރަކާތްތެރިވަނީ އަފްގާނިސްތާނާ ގުޅޭ ބޯޑަރު ހިސާބުގަ އެވެ.
ރޭ ގެ ހަމަލާގައި އެއްޗެއް ގޮއްވާލާފައިވަނީ ޕާކުކޮށްފައި އޮތް ކާރެއްގަ އެވެ. އެއާއެކު ހުޅުގަނޑު ރޯވެ، ކައިރީގައި ހުރި އެހެން ކާރުތައް ވެސް ގޮވާފައި ވެ އެވެ.
ސެރީނާ ހޮޓަލަކީ ގެތާގައި އެންމެ މަޝްހޫރު ހޮޓަލެވެ. އެ ތަނަކީ ސަރުކާރުތަކުގެ އޮފިޝަލުންނާއި އެހެން ގައުމުތަކުން އިސް ވެރިންނަށް ހާއްސަކޮށް ހިންގާ ލަގްޒަރީ ހޮޓަލެކެވެ.
ނަމަވެސް އެ ތަން ހުންނަ ބަލޮޗިސްތާން ޕްރޮވިންސަކީ ގިނަ އަދަދެއްގެ ހަނގުރާމަވެރި ގްރޫޕުތައް އުޅޭ ޕްރޮވިންސެކެވެ. ހަނގުރާމަވެރިން ބޭނުން ވަނީ ޕާކިސްތާނާ ވަކިވެ، ވަކި ދައުލަތެއް ހިންގާށެވެ.
ބަލޮޗިސްތާނަކީ ޕާކިސްތާނުގެ އެންމެ ފަގީރު ޕްރޮވިންސެވެ. ނަމަވެސް ޗައިނާއިން ގެންދަނީ އެ ތަނުގައި ބައެއް ބޮޑެތި މަޝްރޫއުތައް ހިންގަމުންނެވެ. ހަނގުރާމަވެރިން ވަނީ ޗައިނާގެ މަޝްރޫއުތަކާ ދެކޮޅުކަން ކުރިން ވެސް ހާމަކޮށްފަ އެވެ.
ހަނގުރާމަވެރިން ބުނާ ގޮތުގައި ޗައިނާ އާއި ޕާކިސްތާނު ސަރުކާރުން ދަނީ ބަލޮޗިސްތާނުން ލިބެން ހުރި ގޭހާއި މިނެރަލްތަކުގެ ނާޖައިޒު ފައިދާ ނަގަމުންނެވެ. އަދި އޭގެ ފައިދާ އާއްމުންނަށް ނުވާ ކަމަށް ބުނެ އެވެ.
