މިލާން (އޭޕްރީލް 22) - އިޓާލިއަން ލީގުގެ އެއް ވަނައިގައި ލީޑުފުޅާކުރަން ލިބުނު ފުރުސަތު އިންޓަ މިލާނުން މިރޭ ނަގާލިއިރު، ފަހަތުން އަރައި 3-1 އިން ޕާމާ ބަލިކޮށް އެންމެ ފަހުގެ ޗެމްޕިއަން ޔުވެންޓަސް އިން ހަމަނޭވައެއްލައިފި އެވެ.
ލީގުގެ ދެ ވަނައިގައި އޮތް އޭސީ މިލާން މިއަދު ކުޅުނު މެޗުން ވަނީ އަމިއްލަ ދަނޑުގައި ސަސުއޯލޯ އަތުން 2-1 އިން ބަލިވެފަ އެވެ. އެހެންވެ މޮޅުވެގެން އިންޓަ އަށް އެއް ވަނައިގައި 12 ޕޮއިންޓަށް ލީޑުފުޅާކުރުމުގެ ފުުރުސަތު އޮތީ ހުޅުވިފަ އެވެ. ލީގުގެ 15 ވަނައިގައި އޮތް ސްޕެެޒިއާ ދަނޑުގައި އިންޓަ އެއްވަރުވީ 1-1 އިންނެވެ. އެހެންވެ ބާކީ ހަ މެޗަށް ނުކުންނައިރު އިންޓަގެ އޮތީ 10 ޕޮއިންޓުގެ ލީޑެކެވެ.
ކުޅުނު 32 މެޗުން ލިބުނު 76 ޕޮއިންޓާ އެކު އިންޓަ އެއް ވަަނައިގައި އޮތްއިރު، ދެ ވަނައިގައި މިލާން އޮތީ 32 މެޗުން 66 ޕޮއިންޓް ހޯދައިގެންނެވެ. ޔުވެންޓަސް ތިން ވަަނައިގައި އޮތީ 32 މެޗުން 65 ޕޮއިންޓް ހޯދައިގެންނެވެ. ހަތަރެއްގައި އޮތް އެޓަލަންޓާ މާދަމާ ކުޅޭ މެޗުން ރޯމާ އަތުން މޮޅުވެގެން އަލުން ތިން ވަނަ އަށް އެރޭނެ އެވެ.
މިލާން ސިއްސުވާލުމަށް ފަހު ސްޕެޒިއާ އަށް މެޗުގެ 12 ވަނަ މިނިޓްގައި ލީޑުނަގައިދިނީ ޑިއޭގޯ ފަރިއާސް އެވެ. މެޗުގެ 39 ވަަނަ މިނިޓްގައި އިވާން ޕެރިސިޗް އިންޓަ އަށް އެއްވަރުކޮށްދިންއިރު، އިންޓަ މޮޅުކޮށްދޭން ރޮމެލޫ ލުކާކޫ އަށް ލިބުނު ހުސް ފުރުސަތުތަކުގެ ބޭނުމެއް ނުހިފުނެވެ. މި ނަތީޖާއާ އެކު އިންޓަ ވަނީ ބަލިނުވެ 16 މެޗު ހަމަކޮށްފަ އެވެ. ދިހަ އަހަރުގެ މެދުކެނޑުމަކަށް ފަހު މި ފަހަރު ލީގު ޗެމްޕިއަންކަން ހޯދާނީ އިންޓަ ކަމަށް ވަރަށް ބޮޑަށް ބެލެވެ އެވެ.
އިންޓަ އަކީ ވެސް މިދިޔަ ދުވަސްތަކުގައި މައްސަލަ ބޮޑުވި ޔޫރަޕިއަން ސުޕަ ލީގުގެ ފައުންޑާ ކްލަބެކެވެ. އެކަމަކު އިންޓަ އިން މިއަދު ވަނީ އެ ލީގުން ވަކިވެފަ އެވެ. އިންޓަގެ ކޯޗު އެންޓޯނިއޯ ކޮންޓޭ ބުނީ ސުޕަ ލީގުގެ ވާހަކަ ދައްކަން ވެސް ޖެހޭ ކަމަށާއި އެކަމަކު އޭގެ މާނަ އަކީ ޔުއެފާ އިން ކުރާ ކަންކަން ރަނގަޅުވުން ނޫން ކަމަށެވެ.
"ޔުއެފާ އިން މުބާރާތްތައް އިންތިޒާމްކޮށްފައި ކްލަބްތަކަށް ދެނީ މަދު ފައިސާކޮޅެއް. ހަގީގަތަކީ ފުޓްބޯޅަ އަށް އިންވެސްޓްކުރަނީ ޔުއެފާއެއް ނޫން ކްލަބްތަކުން. އެހެންވީމަ ސުޕަ ލީގާ ދެކޮޅަސް މި ވާހަކަ ވެސް ދެކެވެންޖެހޭ،" ކޮންޓޭ ބުންޏެވެ.
މެޗުގެ 25 ވަނަ މިނިޓްގައި ޔުވެންޓަސް ކޮޅަށް ލަނޑު ޖެހީ ޕާމާގެ ގެސްޓޮން ބްރޫގްމަން އެވެ. ޔުވެންޓަސް ފަހަތުން އަރައި މޮޅުވިއިރު އެ ޓީމުގެ ބްރެޒިލް ފުލްބެކް އަލެކްސް ސަންޑްރޯ ދެ ގޯލު ޖެހި އެވެ. އަނެއް ގޯލު ޖެހީ ނެދަލެންޑްސްގެ ޑިފެންޑަރު މަތައިސް ޑި ލިޓް އެވެ.
ފަހަަކަށް އައިސް ޔުވެންޓަސް އަށް މެޗުތަކުގައި ނަތީޖާ ނެރުން އުނދަގޫވެފައިވަނިކޮށް އެ ޓީމުން މިރޭ އުނދަގޫ ހާލަތެއްގައި ވެސް މެޗުން މޮޅުވުމަކީ ޔުވެންޓަސްގެ ކޯޗު އަންދްރެއާ ޕިރްލޯ އަށް ލިބޭނެ ހިތްހަމަޖެހުމެކެވެ.
