އިސްލާމްދީނާއި ކީރިތި ރަސޫލާއަށް ފުރައްސާރަ ކުރުމަކީ ކުށަކަށް ހެދުމަށް ހުޅަނގުގެ ގައުމުތަކަށް ބާރު އެޅުމުގެ ގޮތުން މުސްލިމުންގެ އާބާދީ ގިނަ ގައުމުތަކުން ޕާކިސްތާނާ އެކު މަސައްކަތް ކުރުމަށް އެ ގައުމުގެ ބޮޑު ވަޒީރު އިމްރާން ހާން ގޮވާލައްވައިފި އެވެ.
ފްރާންސްގައި ކީރިތި ރަސޫލާގެ ކާޓޫނު ކުރެހި މައްސަލައެއްގައި ޕާކިސްތާނުގައި މިހާރު ދަނީ ހަމަނުޖެހުމުން ހިންގަމުންނެވެ. ތެހްރީކޭ ލައްބައިކް ޕާޓީއިން ޑިމާންޑު ކުރީ އޭޕްރިލް 20 ގެ ކުރިން ފްރާންސްގެ ސަފީރު ގައުމުން ބޭރު ކުރުމަށެވެ.
އެ ޑިމާންޑާ ގުޅިގެން ތެހްރީކޭ ލައްބައިކްގެ ލީޑަރު ހައްޔަރު ކުރުމާއެކު މުޅި ޕާކިސްތާނުގައި ހަމަނުޖެހުން ފެށުނެވެ. އެއާއެކު ޕާކިސްތާނުގައި ދިރިއުޅޭ ފްރާންސްގެ ރައްޔިތުން އެ ގައުމުން ފޭބުމަށް ފްރާންސުން ވަނީ އަންގާފަ އެވެ.
އިއްޔެ ޓީވީ މެދުވެރިކޮށް ގައުމާ މުހާތަބު ކުރައްވަމުން އިމްރާން ވިދާޅުވީ ކީރިތި ރަސޫލާއަށް ފުރައްސާރަ ކުރުމަކީ ހުޅަނގުގެ ގައުމުތަކުގައި ކުށަކަށް ހެދުމަށް ބާރު އެޅުމުގެ މަސައްކަތް މުސްލިމް ގައުމުތަކާ އެކު ފައްޓަވާނެ ކަމަށެވެ.
އަޅުގަނޑުމެން އެބަ ޖެހޭ ހިޔާލު ފާޅު ކުރުމުގެ މިނިވަންކަމުގެ ނަމުގައި އެކަން [ކީރިތި ރަސޫލާއަށް ފުރައްސާރަ] ކުރުމުން މުސްލިމުންނަށް އަސަރު ކުރަނީ ކީއްވެގެން ކަން ބުނެދޭން. -- އިމްރާން ހާން
އިމްރާން ހާން ވިދާޅުވީ ހުޅަނގުގެ ގައުމެއްގައި ކީރިތި ރަސޫލާއަށް ފުރައްސާރަކޮށްފި ނަމަ ވިޔަފާރީގެ ގުޅުން ހުއްޓާލާނެ ކަމަށް ނުވަތަ އެ ގައުމުގެ އުފެއްދުންތައް ބޮއިކްޓް ކުރާނެ ކަމަށް 50 މުސްލިމް ގައުމުން އެއް ފަހަރާ ބުނެފި އޭގެ އެދެވޭ އަސަރެއް ކުރާނެ ކަމަށެވެ.
އޭގެ އިތުރުން އޭނާ ވިދާޅުވީ ބޮޑު ހަނގުރާމައިގެ ތެރޭގައި ޔަހޫދީންނާ ދެކޮޅަށް ހިޓްލަރު ހިންގި ގަތުލުއާއްމާ މެދު ސުވާލު އުފައްދައިފި ނަމަ ޔަހޫދީންނަށް އަސަރު ކުރާ ފަދައިން ކީރިތި ރަސޫލާއަށް ފުރައްސާރަ ކުރުމުން މުސްލިމުންނަށް ވެސް އަސަރު ކުރާ ކަމަށެވެ.
އިމްރާން ހާން މިފަދަ ގޮތަކަށް ވާހަކަދައްކަވާފައި ވާއިރު، ތެހްރީކޭ ލައްބައިކުން ގިނަ ފުލުހުންތަކެއް ރަހީނު ކުރި މައްސަލާގައި ސަރުކާރާއި ހިންގުން މަނާކޮށްފައިވާ އެ ޕާޓީއާ ދެމެދު މިހާރު ދަނީ މަޝްވަރާ ކުރަމުންނެވެ.
