ޕާކިސްތާނުގައި މުޒާހަރާ ކުރަމުންދާ ތެހްރީކޭ ލައްބައިކް ޕާޓީން ހަ ފުލުހަކު ރަހީނުކޮށްފި އެވެ.
އާދީއްތަ ދުވަހު އެ މީހުން ވަނީ އިސް ފުލުހަކާއި ދެ ޕެރެމިލިޓަރީ ފުލުހުން ހިމެނޭ ގޮތަށް ހަ ފުލުހުން ރަހީނުކޮށްފައި ކަމަށް ޕާކިސްތާނުގެ ފުލުހުންގެ ތަރުޖަމާނު ރޮއިޓާޒްއަށް ވިދާޅުވި އެވެ.
ޕާޓީގެ ލީޑަރު ހައްޔަރު ކުރުމުން ފާއިތުވި ހަފްތާ ހުއްޓުމެއް ނެތި ކުރިއަށް ދިޔަ މުޒާހަރާތައް މިހާރު ވަނީ ހަމަނުޖެހުމަށް ބަދަލުވެފަ އެވެ. ހަމަނުޖެހުން ބޮޑުވުމުން ޕާކިސްތާނުން ވަނީ އެ ޕާޓީ ހިންގުން މަނާ ވެސް ކޮށްފަ އެވެ.
މުޒާހަރާތައް ފަށާފައި ވަނީ ސަރުކާރަށް ދިން އިންޒާރަކާ ގުޅިގެން ޕާޓީގެ ލީޑަރު ހައްޔަރު ކުރުމުންނެވެ. އެ އިންޒާރަކީ އޭޕްރިލް 20 ގެ ކުރިން ޕާކިސްތާނުގައި ހުންނަ ފްރާންސްގެ ސަފީރު ބޭރު ކުރަން ދިން އިންޒާރެކެވެ.
ތެހްރީކޭ ލައްބައިކުން ފްރާންސާ މެދު ހިތްހަމަނުޖެހުނީ ކީރިތި ރަސޫލާގެ ކާޓޫނު ކުރަހާ މައްސަލާގަ އެވެ. ހަމަނުޖެހުންތައް ބޮޑުވެ، ފްރާންސުން އެންމެ ފަހުން ވަނީ ޕާކިސްތާނުގައި ދިރިއުޅޭ އެ ގައުމުން ރައްޔިތުންނަށް ޕާކިސްތާނުން ފޭބުމަށް އަންގާފަ އެވެ.
ހަމަނުޖެހުންތަކުގައި މިހާތަނަށް ހަތަރު މީހަކު މަރުވެ، އެތައް ސަތޭކަ ބަޔަކަށް އަނިޔާވެފައި ވާއިރު، އެތައް ހާސް ބަޔަކު ހައްޔަރުކޮށްފައި ވެ އެވެ. ނަމަވެސް ތެހްރީކޭ ލައްބައިކްގެ ސަޕޯޓަރުން މަގުތަކުން ދާކަށް އަދިވެސް ނުވިސްނަ އެވެ.
