މިސްރުގައި ހިނގި ނުރައްކާތެރި ރޭލު އެކްސިޑެންޓެއްގައި 32 މީހުން މަރުވެއްޖެ

މިސްރުގައި ހިނގި ނުރައްކާތެރި ރޭލު އެކްސިޑެންޓެއްގައި 32 މީހުން މަރުވެ، 109 މީހަކަށް ޒަހަމްވެއްޖެ އެވެ.

އަލްއަރަބިއްޔާ ނޫހުން ރިޕޯޓު ކުރި ގޮތުގައި ބެންހާ ސިޓީ ކައިރިން ދަތުރު ކުރަމުން ދިޔަ ރޭލުގެ އަށް ކެރިއެޖް ދަގަނޑުން ކަހާލާފައި ވެއެވެ.

ބައެއް މީހުން އޭގެ ދަށުގައި ތާށިވެފައި ވާއިރު މީހުން ސަލާމަތް ކުރުމުގެ މަސައްކަތް ދަނީ ކުރަމުންނެވެ. މިހާތަނަށް ރޭލުގެ ޑްރައިވަރާއި އޭނާ އެސިސްޓެންޓް އަދި އިތުރު އަށް މީހަކު ހައްޔަރުކޮށްފައި ވެއެވެ.

މިއީ އެއް ހަފްތާ ތެރޭގައި މިސްރުގައި ހިނގި މިފަދަ ދެ ވަނަ ރޭލު އެކްސިޑެންޓެވެ. މިދިޔަ ހަފްތާގައި ހިނގި ރޭލު އެކްސިޑެންޓެއްގައި 15 މީހަކަށް އަނިޔާވި އެވެ.

އޭގެ ކުރިން މާޗް މަހުގެ ތެރޭގައި ވެސް ނުރައްކާތެރި ރޭލު އެކްސިޑެންޓެއް ހިނގާ 18 މީހުން މަރުވި އެވެ. އެ ފަހަރު އެކްސިޑެންޓު ހިނގީ ދެ ރޭލު ޖެހިގެންނެވެ.