ދިހަ އަހަރުވީ ދާހިލީ ހަނގުރާމަ މެދުކެނޑުމެއްނެތި ކުރިއަށްދާ ސީރިއާގައި އަންނަ މަހު ރިޔާސީ އިންތިހާބުގެ ވޯޓުލުން ކުރިއަށް ދާނެ ކަމަށް އެ ގައުމުގެ ގާނޫނު ހަދާ މަޖިލީހުން އިއުލާނުކޮށްފި އެވެ.
ސީރިއާގައި ސުލްހަ ގާއިމްވެފައި ނުވާއިރު އަދި ބޮޑު އިގްތިސާދީ ކާރިސާއަކާ ކުރިމަތިވެފައި ވާއިރު ވެސް މި ފަހަރުގެ އިންތިހާބުގައި ރައީސް ބައްޝާރުލް އަސަދާ ދެކޮޅަށް މާ ބޮޑު ވާދަވެރިކަމެއް ފެންނާނެ ކަމަކަށް ނުބެލެވެ އެވެ.
ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ޝަރުތުތަކުގެ ތެރޭގައި ފާއިތުވި 10 އަހަރު ސީރިއާގައި ދިރިއުޅެފައިވުން ހިމެނެ އެވެ. އެހެންކަމުން އަމިއްލަ ފުރާނައަށް އޮތް ނުރައްކަލުގެ ސަބަބުން ގައުމުން ބޭރުގައި ދިރިއުޅޭ އިދިކޮޅު ލީޑަރުންނަށް އިންތިހާބުގައި ބައިވެރި ނުވެވޭނެ އެވެ.
މި ވަގުތު ސީރިއާގެ އެންމެ އާބާދީ ބޮޑެތި ސަރަހައްދުތައް ކޮންޓްރޯލް ކުރަނީ އަސަދުގެ ސަރުކާރުންނެވެ. އެ ހަނގުރާމައިގައި 400،000 އެއްހާ މީހުން މަރުވެ، ސީރިއާގެ އާބާދީގެ ދެބައިކުޅަ އެއްބައި މީހުން ވަނީ ރެފިއުޖީންނަށް ވެފަ އެވެ.
އެ ގައުމުގެ މަޖިލީހުގެ ރައީސް ހަމޫދާ ސައްބާގް ވިދާޅުވީ ކުރިއަށް އޮތް ހަތް އަހަރު ވެރިކަން ކުރާނެ ރައީސަކު އިންތިހާބު ކުރުން އޮންނާނީ މޭ 26 ގައި ކަމަށެވެ. ކެންޑިޑޭޓުންނަށް ކުރިމަތިލުމުގެ ފުރުސަތު ހޯމަ ދުވަހު ހުޅުވާލާނެ އެވެ. އަދި ގައުމުން ބޭރުގައި ދިރިއުޅޭ ރައްޔިތުންނަށް އެ ގައުމެއްގައި ހުންނަ ސީރިއާ އެމްބަސީއަށް ގޮސް މޭ 20 ގައި ވޯޓު ލެވޭނެ އެވެ.
މިއީ ސީރިއާގެ ދާހިލީ ހަނގުރާމައިގެ ތެރޭގައި ބާއްވާ ދެ ވަނަ އިންތިހާބެވެ. މީގެ ކުރިން 2014 ގައި ބޭއްވި އިންތިހާބަކީ ޑިމޮކްރެސީގެ އުސޫލުތަކާ ހިލާފު، ގާނޫނަށް ނުފެތޭ އިންތިހާބެއް ކަމަށް ސީރިއާގެ އިދިކޮޅު ފަރާތްތަކާއި އެމެރިކާ އައި އީޔޫއިން ބުނެފައި ވެ އެވެ.
ދެހާސް ވަނަ އަހަރުގެ ޖުލައި މަހުން ފެށިގެން ރައީސްކަން ކުރައްވަމުން ގެންދަވާ ބައްޝާރުލް އަސަދު އެ އިންތިހާބު ކާމިޔާބު ކުރެއްވީ 92 އިންސައްތަ ވޯޓާ އެކު އެވެ.
