ކުރިއަށް ހުރި މެޗުތަކުގައި ސުޕަ ޔުނައިޓެޑް ސްޕޯޓްސް (ސަސް)ގެ ކުޅުންތެރިންގެ އެޓިޓިއުޑް ބަދަލުނުވެއްޖެނަމަ މި ސީޒަނުގެ ރެލިގޭޝަނުގައި އެ ޓީމު ކުޅެން ޖެހޭނެ ކަމަށް ސަސްގެ ކޯޗު މުހައްމަދު ޝިޔާޒް (މޯހަން) ބުނެފި އެވެ.
ދިރާގު ދިވެހި ޕްރިމިއާ ލީގުގައި ފުރަތަމަ ހަ މެޗުގައި ސަސް އަށް ކޯޗުކޮށްދިނީ އަހުމަދު ނާޝިދު (ނާދު) އެވެ. އޭނާ ވަކިވިއިރު ސަސް އޮތީ ކުޅުނު ހަ މެޗުން ލިބުނު ހަތް ޕޮއިންޓާ އެކު ލީގުގެ ހަ ވަނައިގަ އެވެ. މޯހަން ހަވާލުވެ ސަސް މިހާތަނަށް ކުޅުނު ހަތް މެޗުން ލިބިފައިވަނީ ހަ ޕޮއިންޓެވެ. ރޭ ލީގުގެ ފުލުގައި އޮތް ޔުނައިޓެޑް ވިކްޓްރީ (ޔޫވީ) އިން ވަނީ ސަސް 5-1 އިން ބަލިވެފަ އެވެ.
ޔޫވީ މެޗަށް ފަހު އޮތް ނޫސްވެރިންގެ ބައްދަލުވުމުގައި މޯހަން ބުނީ ކުޅުންތެރިންގެ ފަރާތުން ފެންނަ ކަންތައްތަކަށް ބަދަލެއް އަންނަން ޖެހޭ ކަމަށާއި އެކަން އެހެން ނުވެއްޖެނަމަ ސަސް ޖެހޭނީ ރެލިގޭޝަނުގައި ކުޅެން ކަމަށް މޯހަން ބުންޏެވެ.
"ކުޅުންތެރިން (މަސައްކަތްކުރުމާއި ހިތްވަރު ކުރުމުގެ) އެ އެޓިޓިއުޑް ނެތިއްޔާ ހަމަ ރެލިގޭޝަނަށް ތައްޔާރުވާން ޖެހޭނީ. މިހާރުއްސުރެން އެނގުނިއްޔާ ކަންނޭނގެ އެކަމަށް ވިސްނައިގެން ނަގައިގަންނަން އެނގޭނީ. މިހާރު އެ ކުޅުންތެރިންނަށް އެބަޖެހޭ އެނގެން މި އެޓިޓިއުޑުން މޮޅެއް ނުވާނެކަން. އެޓިޓިއުޑް ބަދަލުކުރަންޖެހޭކަން،" ކުރިން ފުރަތަމަ ޑިވިޝަނުގެ ގިނަ ކްލަބްތަކަށް ކޯޗުކޮށްދިން މޯހަން ބުންޏެވެ.
"ބަލިވާތަނުގައި ކުޅުންތެރިން އެ ދައްކަން ޖެހޭ އެ ހިތްވަރު ނުދެއްކުނު. އެޓިޓިއުޑް ވަރަށް ދަށްކޮށް މި ފެނުނީ. ކުރިއަށް އޮތްތަނަށް ވަރަށް މަސައްކަތްކުރަން ޖެހޭ،"
މި ފަހަރު ލީގު ރޭވިފައި އޮތްގޮތުން ލީގުގެ ތިން ބުރު ކުޅުމަށް ފަހު އެންމެ ފުލަށް ދާ ދެ ޓީމެއް ޖެހޭނީ ދެ ވަަނަ ޑިވިޝަނުގެ ޗެމްޕިއަން އަދި ރަނަރަޕާ އެކު ރެލިގޭޝަން ބުރެއް ކުޅޭށެވެ. އެ ތަނުން އެންމެ ރަނގަޅު ނަތީޖާ ހޯދާ ދެ ޓީމަކަށް އަންނަ ސީޒަނުގެ ލީގުން ޖާގަ ލިބޭނެ އެވެ. ސަސް އިން މި އަހަރުގެ ފުރަތަމަ ޑިވިޝަނުން ފުރުސަތު ހޯދީ މިދިޔަ އަހަރުގެ ދެ ވަަނަ ޑިވިޝަން ރަނަރަޕްގެ ހައިސިއްޔަތުންނެވެ.
މި ވަގުތު ރެލިގޭޝަން ޒޯނުގައި އޮތީ 13 މެޗުން 12 ޕޮއިންޓާ އެކު އޮތް ސަސް އާއި 13 މެޗުން 9 ޕޮއިންޓް ހޯދާފައިވާ ޔޫވީ އެވެ.
މޯހަން ބުނީ ކުރިން މެޗުތަކުގައި ސަސްގެ ފަރާތުން ފެނުނު ރޫހު ރަނގަޅު ކަމަށާއި ޔުނައިޓެޑް ވިކްޓްރީ މެޗުގައި މި ދިމާވީ ރަނގަޅަކަށް ނޫން ކަމަށެވެ.
"ކުރިން މެޗުތަކުގައި ވަރަށް ރަނގަޅަށް ގޮސްފައި މިއަދު (ރޭ) މިހެން މިވީ. ބައްޔެއްވާއިރު އަދި ކިރިޔާ މި އިނގުނީ ކިހިނެއްތޯ މި ޓީމުގެ ކުޅުންތެރިންގެ ގިނަ ކުޅުންތެރިންގެ އެޓިޓިއުޑް މި ހުންނަނީ. އެއަށް ވަރަށް އަވަހަށް ހައްލެއް އައުން އެއީ މުހިއްމު ކަމެއް،" މި ސީޒަން ފެށިއިރު އީގަލްސްގައި ހުރި މޯހަން ބުންޏެވެ.
މޯހަން ބުނީ އަނިޔާ އާއި ސަސްޕެންޝަނުގެ ސަބަބުން ނެތް ކުޅުންތެރިންގެ ވާހަކަ ދެއްކުމަކީ އެއްވެސް މުހިއްމުކަމެއް ނޫން ކަމަށެވެ. އަދި ޔުނައިޓެޑް ވިކްޓްރީ މެޗުގައި ފެނުނު ކަންތައްތަކަށް ބަލާއިރު ކުރިއަށް ހުރި މެޗުތަކުގައި ޓީމަށް ބަދަލު އައުމުގެ ފުރުސަތު އެބައޮތް ކަމަށް މޯހަން ބުންޏެވެ.
ލީގުގެ ދެ ވަނަ ބުުރުގައި ސަސް ކުޅޭ ފަހު މެޗުގައި އަންނަ ހުކުރު ދުވަހުގެރޭ ބައްދަލުކުރާނީ ދަ ގްރާންޑޭއާ އެވެ.
