މާފުށީ ޖަލުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިއަދު ފުލުސް އޮފީހަށް ހާޒިރުކުރީ އެމްއެމްޕީއާރުސީގެ ހިޔާނާތާ ގުޅޭ މައްސަލައެއްގެ ތަހުގީގުގައި ސުވާލުކުރަން ކަމަށް ފުލުސް އޮފީހުން މިއަދު ބުނެފި އެވެ.
ފުލުހުން ބުނީ ތަހުގީގަށް ސުވާލުކޮށް ޔާމީންގެ ބަޔާން ނަގާފައިވާ ކަަމަށެވެ. އެކަމަކު ސީދާ ކޮން މައްސަލައެއް ކަން ނުބުނެ އެވެ.
އިތުރު މައްސަލައެއްގެ ތަހުގީގު ޔާމީންގެ މައްޗަށް ހިންގާއިރު، މަނީ ލޯންޑްރިންގެ ދައުވާއަކާއި ރިޝްވަތު ހިފުމުގެ ދައުވާއެއް ވެސް އެމަނިކުފާނުގެ މައްޗަށް ވަނީ ކްރިމިނަލް ކޯޓުގައި އުފުލައިފަ އެވެ.
އެކަމަކު މި ދައުވާތަކަށް އިންކާރުކޮށް އެއީ ސިޔާސީ ދައުވާތަކެއް ކަމަށް ޔާމީން ވަނީ ވިދާޅުވެފަ އެވެ.
މީގެ ހަފުތާއެއްހާ ދުވަސް ކުރިން ރައްޔިތުންނަށް ފޮނުއްވި މެސެޖުގައި ޔާމީން ވިދާޅުވެފައިވާ ގޮތުގައި ނުހައްގުން ޖަލުގައި އިންސާފުނުދީ ބަހައްޓާފައި ވަނީ ރައްޔިތުންގެ ހައްގުގައި ވަކާލާތު ކުރައްވާނެތީ އެވެ. ހަގީގީ އަނިޔާއަކީ އެއީ ކަމަށް ވިދާޅުވި އެވެ.
އެމަނިކުފާނު ވިދާޅުވީ ޖަލުން މިނިވަންވެ، މައުސޫމް މީހެއްގެ ގޮތުގައި ރައްޔިތުންނާ ބައްދަލުކުރައްވާނެ ކަމަށެވެ.
ޔާމީންގެ ސިއްހީ ހާލުކޮޅު ހުރި ގޮތުން ގެއަށް ބަދަލުކޮށް ދިނުމަށް އާއިލާ އިން ވަނީ ހޯމް މިނިސްޓްރީގައި އެދިފަ އެވެ. އެކަމާ މެދު މަޝްވަރާކުރަމުން އަންނަ ކަމަށާއި ދެރަގޮތެއް ނުހައްދަވާނެ ކަމަށް ރައީސް އިބްރާހިމް މުހައްމަދު ސޯލިހް ދާދި ފަހުން ވިދާޅުވެފައިވެ އެވެ.
ޔާމީނަށް ފަސް އަހަރުގެ ޖަލު ހުކުމެއް އައީ ދައުލަތަށް ލިބެން ޖެހޭ އެއް މިލިއަން ޑޮލަރު އަމިއްލަ އެކައުންޓަށް ޖަމާކޮށް އަސްލު އޮޅުވާލައި މަންފާ ހޯދިކަން ސާބިތުވެގެންނެވެ. މި ހުކުމް އިންސާފުވެރި ނޫން ކަމަށާއި މިއީ ސިޔާސީ ހުކުމެއް ކަމަށް އިދިކޮޅުން ދަނީ ބުނަމުންނެވެ.
