ގިނަ އަހަރުތަކަކަށް ފަހު ލުބްނާނަށް ކުރިމަތިވެފައިވާ އިގްތިސާދީ މައްސަލަތަކުގެ ސަބަބުން ކާބޯތަކެތީގެ އަގުތައް އަތް ނުފޯރާ ފަށަށް އަރާ ރޯދަ މަހު ރޯދަ ވީއްލާނެ ގޮތެއް ހޯދަން އާއިލާތަކަށް ގޮންޖެހުމާ ކުރިމަތިވެއްޖެ އެވެ.
"އަގުތައް ވަނީ ހައްދުން ނައްޓާފައި އަދި ރޯދަ މަހު އިތުރަށް އަގުތައް މަތިވީ. ކުޑަ ސެލެޑު ތައްޓެއްގެ އަގު މި އަހަރު އުޅެނީ ހަ ގުނަ މަތީގައި،" ވެރިރަށް ބެއިރޫތުގައި ދިރިއުޅޭ އުމް އަހްމަދު އަލްޖަޒީރާ ނޫހަށް ކިޔައިދިނެވެ.
"އަހަރުމެން ދެން ކިހިނެއް ހަދާނީ؟ ސަލާން ޖަހާނީ ތަ؟ ސަލާން ޖެހުމުގެ އާދަ އަހަރުމެންގެ ގައިގާ ނެތް."
ބެއިރޫތުގައި ހުންނަ އަލްޖަޒީރާގެ ނޫސްވެރިޔާއާ ހަވާލަދީ އެ ނޫހުން ބުނީ ލުބްނާނުގެ އެތައް މިލިއަން މީހުންނަށް ކާ ތަކެއްޗަކީ "ލަގްޒަރީ" އަށް ވަމުންދާ ކަމަށެވެ.
ލުބްނާނުގެ އިގްތިސާދު އާދަޔާ ހިލާފަށް ގޯސްވެ، އިންފްލޭޝަން ކޮންޓްރޯލުން ނެއްޓުމުން، ތަކެތި ގަތުމުގެ ބާރު ރައްޔިތުންގެ ކިބައިން ވަނީ ގެއްލިފަ އެވެ.
މާޗް މަހުގެ ކުރީކޮޅު ލުބްނާނުގެ 10،000 ޕައުންޑަކީ އެއް އެމެރިކާ ޑޮލަރުގެ ގޮތުގައި އަގު ކުރެވުނު ނަމަވެސް ލުބްނާން ޕައުންޑްގެ އަގު ވަނީ އޭޕްރިލް މަސް ފެށިއިރު 15،000 އަށް ވެއްޓިފަ އެވެ. ދެހާސް ނަވާރަ ވަނަ އަހަރަށް ފަހު ލުބްނާން ޕައުންޑުގެ އަގު ވަނީ ގާތްގަނޑަކަށް 90 ޕަސަންޓު ވެއްޓިފަ އެވެ.
"ކުރިން އެއް ކިލޯގެ ތަރުކާރީ ގަންނަ މީހުން މިހާރު ގަންނަނީ ބައި ކިލޯ. އެހެން ބައެއް މީހުން ގަންނަނީ ކިލޯ ނުކިރާ ވަކިވަކި އެތިކޮޅުކޮޅުން.. ބައެއް މީހުން އަގުތައް އެނގުނީމަ ހުސް އަތާ އެނބުރި ގެޔަށް ދަނީ،" ތަރުކާރީ ވިއްކާ އަހްމަދު ކިޔާ މީހަކު ބުނެފައި ވެއެވެ.
އަގުތައް މަތިވެއްޖެ، މުސާރަ މައްޗެއް ނުވޭ
ލުބްނާނަށް ބޭނުންވާ ގިނަ ކާބޯތަކެއްޗަކީ އިމްޕޯޓު ކުރާ ތަކެއްޗެވެ. ނަމަވެސް ސަރުކާރަށް ޑޮލަރު ލިބުން ދަތިވެ، ކާ އެއްޗެހި ލިބުން ވެސް ވަނީ މަދުވެފަ އެވެ.
"އަހަރުމެންގެ މުސާރަ ބަދަލެއް ނުވޭ، އެކަމަކު ތަކެތީގެ އަގުތައް މަތިވެއްޖެ،" ބެއިރޫތުގައި ދިރިއުޅޭ ހަނާ ސަދާރު ނަމަކަށް ކިޔާ މީހަކު ބުންޏެވެ.
ސަރުކާރުން ފުށަށް ސަބްސިޑީ ފޯރުކޮށްދިން ނަމަވެސް، ޕާނުގެ އަގު ވެސް ވަނީ މަތިވެފަ އެވެ. މަހެއްގެ ކޮންމެ ދުވަހަކު އެއް ޕާން ގަންނަ ނަމަ އެންމެ ކުޑަ އުޖޫރައިގެ 10 ޕަސަންޓު އިތުރަށް މިހާރު އަރަ އެވެ.
މި ދަނޑިވަޅުގައި އެހީދޭ ޖަމިއްޔާތަކުން އަންނަނީ ހާލުގައި އުޅޭ މީހުންނަށް ކާބޯތަކެތި ފޯރުކޮށްދެމުންނެވެ. ތަކެތީގެ އަގުތައް އިތުރުވަމުންދާ ވަރަކަށް، ފަސް މިލިއަންގެ އާބާދީއެއް އޮތް ލުބްނާނުގެ ވަޒީފާ ގެއްލޭ މީހުން ވެސް ދަނީ އިތުރުވަމުންނެވެ.
މާޔާ ޓެރޯ އަކީ ލުބްނާނުގެ 1600 އާއިލާއަށް ކޮންމެ މަހަކު ވެސް ކާ އެއްޗެހި ފޯރުކޮށްދޭ "ފުޑް ބްލެސްޑް" ޖަމިއްޔާގެ ފައުންޑަރެކެވެ.
"އާއިލާތަކުން ބުނޭ މި މަހު ކާ އެއްޗެހީގެ އެހީ ނުލިބިއްޖެ ނަމަ ތިބެން ޖެހޭނީ ރޯދަ ނުވިއްލައޭ ނޫނީ ކުރިން ކާ ވަރަށް ވުރެ މަދުން ކައިގެންނޭ،" އޭނާ އަލްޖަޒީރާއަށް ބުންޏެވެ.
ކޮވިޑުގެ ބަލިމަޑުކަމާ ހެދި އިގްތިސާދީ އަދި އިޖުތިމާއީ ތަފާތުތައް ބޮޑުވެ، ލުބްނާނުގެ އާބާދީގެ ދެބައިކުޅަ އެއްބައި އާއިލާއިން ދިރިއުޅެމުން ދަނީ ފަގީރުކަމުގަ އެވެ.
ގައުމުގެ ހާލަތާ މެދު ހިތްހަމަނުޖެހި މިދިޔަ މަހު ރައްޔިތުން ނިކުމެ މުޒާހަރާކޮށް މަގުތައް ވެސް ބަންދު ކުރި އެވެ.
އެކަމަކު ހާލަތު މިހެން އޮތް އިރު، ސިޔާސީ ވާދަވެރިންގެ ކޯޅުމުގެ ސަބަބުން ކަންކަން ރަނގަޅުވާނެ ކަމުގެ ނިޝާނެއް ވެސް ފެންނާކަށް ނެތެވެ. ބޮޑުވަޒީރު ސާދް ހަރީރީ އާއި ރައީސް މިޝޭލް އައޫން ކަންބޮޑުވެ ވަޑައިގަންނަވަނީ އާ ސަރުކާރު އެކުލަވާލާނެ ގޮތާއި މިނިސްޓްރީތައް ބަހާނެ ގޮތަކާ މެދު އެވެ.
