އިނގިރޭސިވިލާތުގައި އުޅޭ މާބަނޑު މީހުންނަށް ކޮވިޑުން ރައްކާތެރިވުމަށް ފައިޒާ ނުވަތަ މޮޑާނާއިން އުފެއްދި ވެކްސިން ދޭން އެ ގައުމުގައި ވެކްސިންތަކާ ގުޅޭ ލަދާފޭ އިދާރާއިން އަންގައިފި އެވެ.
ޖޮއިންޓް ކޮމިޓީ އޮން ވެކްސިނޭޝަން އެންޑް އިމިއުނައިޒޭޝަން (ޖޭސީވީއައި) އިން ބުނީ މާބަނޑު މީހުންނަށް އެ ދެ ވެކްސިން ދީގެން ރައްކާތެރި ކަމަށް ދިރާސާތަކުން ދައްކާފައިވާ ކަމަށެވެ.
އެގޮތުން އެމެރިކާގައި 90،000 އެއްހާ މާބަނޑު މީހުންނަށް އެ ދެ ވެކްސިން ދިން ކަމަށާއި އެއްވެސް ވަރަކަށް ކަންބޮޑުވާން ޖެހޭ ކަމެއް ފެނިފައި ނުވާ ކަމަށެވެ.
"މި ތަފާސްހިސާބުތަކަށް ރިއާޔަތްކޮށް، ޖޭސީވީއައި އިން ލަފާދެނީ ފައިޒާ-ބަޔޯއެންޓެކް އަދި މޮޑާނާ ވެކްސިން ލިބެން ހުރި ހާލަތްތަކުގައި އިނގިރޭސިވިލާތުގައި އުޅޭ މާބަނޑު މީހުންނަށް ވެކްސިން ދިނުމަށް،" އެ ތަނުން ބުންޏެވެ.
"އެހެން ވެކްސިންތަކަކީ މާބަނޑު މީހުންނަށް ނުރައްކާތެރި އެއްޗެއް ކަމަށް ދައްކައިދޭ އެއްވެސް ހެއްކެއް މިހާތަނަކަށް ނެތް. ނަމަވެސް އިތުރު ދިރާސާ ބޭނުންވޭ".
މީގެ ކުރިން އިނގިރޭސިވިލާތުން މާބަނޑު މީހުންނަށް ލަފާދިނީ ކޮވިޑާ ދެކޮޅަށް ވެކްސިން ނުޖެހުމަށެވެ. އެއީ މިހާރު ބޭނުން ކުރާ ވެކްސިންތައް މާބަނޑު މީހުންނަށް ދީގެން ރައްކާތެރިތޯ ބެލުމަށް ކުރިން އެއްވެސް ދިރާސާއެއް ހަދާފައި ނުވާތީ އެވެ.
"އަޅުގަނޑު ހުރިހާ މާބަނޑު އަންހެނުންނަށް ގޮވާލަނީ ވެކްސިން ޖެހުމަށް ކަމާ ބެހޭ އިދާރާއިން ގުޅުމުން އެކަމަށް އިޖާބަދީ، ވެކްސިނުގެ ސަބަބުން ލިބިދާނެ ފައިދާ އާއި ގެއްލުން ޑޮކްޓަރަކާއެކު މަޝްވަރާ ކުރުމަށް،" އިނގިރޭސިވިލާތުގެ ހެލްތު ސެކެޓްރީ މެޓް ހޭންކޮކް ވިދާޅުވި އެވެ.
އިނގިރޭސިވިލާތުން ދާދި ފަހުން ވަނީ އުމުރުން 30 އަހަރުގެ އެންމެންނަށް އޮކްސްފޯޑް ވެކްސިނުގެ ބަދަލުގައި އެހެން ވެކްސިނެއް ހިޔާރު ކުރުމުގެ ފުރުސަތު ދިނުމަށް ލަފާދީފަ އެވެ. އެގޮތަށް އެންގީ އެ ވެކްސިން ޖެހި ވަރަށް މަދު މީހުންގެ ސިކުނޑީގައި ލޭގަނޑުވުމުގެ މައްސަލަ ދިމާވެފައ ވާތީ އެވެ.
