ދޫނިދޫގައި ފުލުހުންގެ ބަންދުގައި ހުރި މީހަކު ގޮޅިން ނެރެ ގައިގައި ތަޅައި ވަރަށް ބޮޑަށް އަނިޔާކޮށް، ވީތަނެއް ނާންގައި "ގެއްލުވާލާފައިވާ" ކަމަށް އާއިލާ އިން ތުހުމަތުކުރުމުން މައްސަލަ ބަލަން ފަށައިފި އެވެ.
ޓެރަރިޒަމްގެ ތުހުމަތުގައި ހައްޔަރުކުރި ތ. ތިމަރަފުށީ، އަސްރަފީވިލާ އަހްސަން މުހައްމަދު، 34 އަށް ލާއިންސާނީ އަނިޔާކޮށްފައިވާ ކަމަށް ބުނެ އާއިލާ އިން ދަނީ ކަންބޮޑުވުންފާޅުކުރަމުންނެވެ. އަނިޔާއަށް ފަހު އޭނާއަށް ވީގޮތެއް އަންގައިދޭން ފުލުހުންގެ ކިބައިން އެދުމުން ވެސް އެއްވެސް ޖަވާބެއް ނުދިން ކަމަށް އާއިލާ އިން ބުނެ އެވެ.
އަހްސަން ހައްޔަރުކުރީ، އައިސިސްއާ ގުޅިގެން އެ ޖަމާއަތުގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައް ހިންގަން ހިތްވަރުދީ ރާވަމުން ދިޔަ ކަމުގެ ތުހުމަތަށެވެ. އޭނާއާ އެކު ހައްޔަރުކުރި ހަތް މީހެއްގެ މައްޗަށް ޕްރޮސިކިއުޓަ ޖެނެރަލްގެ އޮފީހުން ވަނީ ޓެރަރިޒަމްގެ ދައުވާ އުފުލައިފަ އެވެ.
ޖަލުގައި އަހްސަންއާ ދޭތެރޭގައި އަމަލުކުރި ގޮތާއި ގޮޅިއަށް ވެއްދުމުގައި ބާރުގެ ބޭނުންކުރުމުން އާއިލާ އިން ކުރި ޝަކުވާ ސާފުކޮށްދެމުން ފުލުހުން މިރޭ ބުނީ އަހްސަން ގޮޅިން ބޭރަށް ނެރެން ޖެހުނީ ގޮޅީގައި ހަރުކޮށްފައި ހުރި ކެމެރާއަށް ނުފެންނަ ގޮތް ހެދުމަށް އެކި މަސައްކަތްތައް ކުރަމުން ދިއުމުންނެވެ. ތަކުރާރުކޮށް ކެމެރާ ބްލައިންޑް ކުރި ކަމަށް ފުލުހުން ބުންޏެވެ.
މި މައްސަލައިގައި އޭނާ ގޮޅިން ބޭރަށް ނެރުނީ ފުލުހުން ބުނިގޮތުގައި މިދިޔަ ހޮނިހިރުދުވަހުގެ ރޭ އަށެއް ޖެހި އިރެވެ. އޭނާ އަށް ފުލުހުން އެންގީ ކެމެރާގައި އުނގުޅާފައި ހުރި ދަތް އުނގުޅާ ބޭސް ސާފުކުރުމަށާއި ކެމެރާ ބްލައިންޑް ކުރަން ބޭނުންކުރާ ތަކެތި ގޮޅިން ނެރުމަށެވެ.
ފުލުހުން ބުނިގޮތުގައި އޭގެ ފަހުން އޭނާ ގޮޅިއަށް ވަނުމަށް އެދުނެވެ.
އެކަމަކު ތަކުރާރުކޮށް ނަސޭހަތް ދިނުމުން ވެސް ގޮޅިއަށް ވަންނަން އަހްސަން ދެކޮޅު ހަދައި އެތަނުގައި ތިބި ފުލުހުންނަށް ތަފާތު އިންޒާރު ދިން ކަމަށެވެ. ސުލްހަވެރިކަމާ އެކު އޭނާ ގޮޅިއަށް ވައްދަން ކުރި މަސައްކަތުގައި ވެސް ދެއްކީ، ފުލުހުން ބުނިގޮތުގައި، ނުކިޔަމަންތެރިކަމެވެ.
"އަހްސަން މުހައްމަދު ގޮޅިއަށް ވެއްދުމަށް މަސައްކަތްކުރި ފުލުހުންނަށް ނުކިޔަމަންތެރިކަން ދައްކައި ފުލުހުން ގައިގައި ޖަހައި މާރާމާރީ ހިންގުމުން ފުލުހުންވަަނީ ޕެޕާ ސްޕްރޭ ބޭނުންކޮށް އަހުސަން މުހައްމަދު ޖަލު ސަރަހައްދުން ނެރެ ބިޑިއަޅުވައިފަ އެވެ،" ކަން ހިނގި ގޮތް ކަމަށް ފުލުހުން މީޑިއާތަކަށް ފޮނުވި މެސެޖުގައިވެ އެވެ.
އޭނާ ގޮޅިއަށް ވެއްދީ ބާރުގެ ބޭނުންކޮށްގެން ކަަމަށް ފުލުހުން އެއްބަސްވެ އެވެ. އެކަމަކު އަނިޔާއެއް ލިބުނުތޯ ސާފުކޮށެއް ނުދެ އެވެ. އެކަމުގައި ފުލުހުން އަމަލުކުރީ ގާނޫނާއި ގަވާއިދުތަކާއި ފުލުހުންގެ ތެރޭގައި ހެދިފައިވާ އުސޫލްތަކުގެ ތެރެއިންތޯ ޕްރޮފެޝަނަލް ސްޓޭންޑަޑްސް ކޮމާންޑާއި ޔޫސް އޮފް ފޯސް ރިވިއު ކޮމިޓީން އަންނަނީ ބަލަމުންނެވެ.
އިޖުރާތުތަކާއި ޚިލާފަށް އަމަލުކޮށްފައިވާ ނަމަ އަޅަންޖެހޭ ފިޔަވަޅުތައް އަޅާނެ ކަމުގެ ޔަގީންކަން ވެސް ފުލުހުން ދިނެވެ.
އަހްސަން ހިމެނޭ ގޮތުން ތިމަރަފުށިން ހައްޔަރުކުރި މީހުންގެ މަގްސަދަކީ އައިސިސް ޖަމާއަތަށް ތާއީދުކުރާ ބަޔަކު ރާއްޖޭގައި އުފައްދައި އެ މީހުން ލައްވާ ރާއްޖޭގައި ޓެރަރިޒަމްގެ ހަމަލާތައް ދިނުން ކަަމަށް ފުލުހުން ކުރިން ބުނެފައިވެ އެވެ. ދޯންޏެއްގެ ތެރޭގައި އައިއީޑީއެއް ގޮއްވާލަން އުޅުމުގެ އިތުރުން ތިމަރަފުށީ ސްކޫލްގައި އިމްތިހާނެއް ހަދަނިކޮށް ލެބޯޓްރީ ގޮއްވާލަން ރޭވި ކަމުުުގެ ތުހުމަތު އެ މީހުންގެ މައްޗަށް ކުރެ އެވެ.
