ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ސިއްހީ ގޮތުން ރައްކާތެރިވުމަށް އިލެކްޝަންސް ކޮމިޝަނުން ބޭނުން ކުރި ހުން ބަލާ ތާމޯމީޓަރު ފަދަ ތަކެތި ދައުލަތުގެ އެކި އިދާރާތަކަށް ހަދިޔާ ކުރަން ނިންމައިފި އެވެ.
ކޮވިޑް-19 ގެ ބަލިމަޑުގެ ތެރޭގައި މިދިޔަ ހޮނިހިރު ދުވަހު ލޯކަލް ކައުންސިލްތަކުގެ އިންތިހާބު ބޭއްވީ ރައްކާތެރި ކަމުގެ ގޮތުން ގިނަ ފިޔަވަޅުތަކެއް އަޅައިގެންނެވެ.
ހެލްތު ޕްރޮޓެކްޝަން އެޖެންސީގެ ގައިޑްލައިނާ އެއްގޮތަށް އަމަލު ކުރުމަށް ކޮމިޝަނުން ވަނީ އަތް ދޮންނަ ސެނަޓައިޒާ އާއި ފޭސް ޝީލްޑާއި ހުންބަލާ ތަމޯމީޓަރު ފަދަ ތަކެއްޗަށް ދެ މިލިއަން ރުފިޔާ ހޭދަކޮށްފަ އެވެ.
އެކަމާ ގުޅޭ ގޮތުން އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ ސިއްހީ ގޮތުން ރައްކާތެރިވުމަށް ބޭނުން ކުރި ބައެއް ތަކެއްޗަކީ ކުރިއަށް އޮތް ތަނުގައި އެ ކޮމިޝަނުން ބޭނުން ކުރަން ޖެހޭނެ ތަކެތި ނޫން ކަމަށެވެ. އެހެންވެ ގާނޫނާ އެއްގޮތަށް އެ މުދާ ދައުލަތުގެ އެކި މުއައްސަސާތަކަށް ދިނުމަށް މަސައްކަތް ކުރަމުން އަންނަ ކަމަށް އޭޏާ ވިދާޅުވި އެވެ.
"ދައުލަތުގެ ފައިސާއިން ހަރަދުކޮށްގެން އެ ގަނެފައި އެބޭނުން ކުރެވޭނެ ގޮތެއް ހަދަން އަޅުގަނޑުމެން ބޭނުންވޭ. އެތަކެތި ވޭސްޓް ވިޔަ ނުދޭނަން. މާލިއްޔަތުގެ ގާނޫނުގެ ތެރެއިން އެކަން ކުރެވެން އޮތް ގޮތަށް ކުރާނަން،" ޝަރީފް ވިދާޅުވި އެވެ.
ސިއްހީ ގޮތުން ރައްކާތެރިވުމަށް ކޮމިޝަނުން ގަތް ތަކެތި ހަދިޔާ ކުރުމުގެ ކަންކަން ކުރާނީ އިންތިހާބުގެ ނަތީޖާ އިއުލާން ކުރުމަށް ފަހުގައި ކަމަށް ވެސް ޝަރީފް ވިދާޅުވި އެވެ.
