ޖަންގަލިތަކުގައި ދިރިއުޅޭ ޖަނަވާރު ހިފައި ހައްޔަރުކޮށްގެން މާރުކޭޓުތަކުގައި ވިއްކުން ހުއްޓާލަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ގޮވާލައިފި އެވެ.
ޑަބްލިއުއެޗްއޯއިން އެގޮތަށް ގޮވާލީ އާ ބަލިތައް އުފެދުން ހުއްޓުވުމަށް އަޅާ ފިޔަވަޅެއްގެ ގޮތުންނެވެ.
އެފަދަ މާރުކޭޓުތަކަކީ ބޮޑެތި އާބާދީތަކަށް އަގުހެޔޮކޮށް ކާބޯތަކެތި ލިބޭ އަދި އާމްދަނީ ލިބޭ މުހިއްމު ގޮތެއް ނަމަވެސް، ދިރިހުރި ޖަނަވާރު މާރުކޭޓުގައި ވިއްކުން ހުއްޓުމަކީ އެ ތަންތަނުގެ ވިޔަފާރިވެރިންނާއި ކަސްޓަމަރުންގެ ސިއްހަތަށް އެންމެ ފައިދާ ހުރި ގޮތް ކަމަށް ޑަބްލިއުއެޗްއޯއިން ފާހަގަކުރި އެވެ.
ކޮވިޑް ބަލި ފަތުރާ ވައިރަސް އެންމެ ފުރަތަމަ ފެނިފައިވަނީ ޗައިނާގެ ވޫހާނުގައި ހިންގި މިފަދަ މާރުކޭޓަކުންނެވެ. އެންމެ ފުރަތަމަ ބަލިވި އަދި މަރުވި މީހުންގެ ތެރޭގައި ހިމެނެނީ އެ މާރުކޭޓުގެ ގޮޅިތައް ހިންގާ މީހުންނާއި ކަސްޓަމަރުންނެވެ.
މުޅިން އަލަށް ފެނުނު މި ކޮރޯނާވައިރަސް އިންސާނުންގެ ގަޔަށް އައި ގޮތެއް އަދިވެސް ހޯދިފައެއް ނުވެ އެވެ. ނަމަވެސް ބެލެވޭ ގޮތުގައި މިއީ ވާލެއްގެ ހަށިގަނޑުން ކޮންމެވެސް އެހެން ޖަނަވާރެއްގެ ހަށިގަނޑަށް ވަދެ، އިންސާނުންނާ ހަމައަށް އައި ވައިރަހެކެވެ.
