ޕާކިސްތާނުގެ އިދިކޮޅު ސިޔާސީ ޕާޓީއެއްގެ ލީޑަރަކު ހައްޔަރު ކުރުމުން އިއްޔެ ފެށި މުޒާހަރާ މެދުކެނޑުމެއް ނެތި ދެ ވަނަ ދުވަހަކަށް ކުރިއަށް ގެންގޮސްފި އެވެ.
މުޒާހަރާގެ ބައިވެރިން ވަނީ ބޮޑެތި ގިނަ ސިޓީތަކުގެ މަގުތައް ބަންދުކޮށްފަ އެވެ. އެގޮތުން ކަރާޗީ އާއި ލާހޯރް އަދި ރާވަލްޕިންޑީގެ މަގުތައް ވެސް ބަންދުކޮށްފައި ވެއެވެ.
އިއްޔެ މުޒާހަރާތައް ފެށީ ތެހްރީކޭ ލައްބައިކް ޕާކިސްތާން (ޓީއެލްޕީ) ގެ ލީޑަރު ސާދް ރިޒްވީ ހައްޔަރު ކުރުމުންނެވެ. އޭނާ ހައްޔަރު ކުރި ސަބަބު ހާމަކޮށްފައެއް ނުވެ އެވެ.
މުޒާހަރާގެ ބައިވެރިން މިއަދު ވެސް މަގުތަކަށް ނިކުތުމުން އެ މީހުން ފޮނުވާލުމަށް ކުރި މަސައްކަތުގައި ވަނީ ބައެއް ސިޓީތަކުގައި ހަމަނުޖެހުން އުފެދިފަ އެވެ.
ޕާކިސްތާނުގެ ބައެއް ނޫސްތަކުން ރިޕޯޓު ކުރި ގޮތުގައި ހަމަނުޖެހުމުގައި ދެ މީހަކު މަރުވި އެވެ.
ޓީއެލްޕީއަކީ އިސްލާމްދީނަށް ފުރައްސާރަ ކުރުމާ ދެކޮޅަށް މީގެ ކުރިން ބޮޑެތި އެއްވުންތައް ބާއްވާފައިވާ ޕާޓީ އެކެވެ. ދީނަށް ފުރައްސާރަ ކުރުމަކީ ޕާކިސްތާނުގައި ވަރަށް ހޫނުވާ މައްސަލަ އެކެވެ.
މިދިޔަ މަހު ވެސް ޝިއައީންގެ ދީނީ އިލްމިވެރިއަކަށް ދީނަށް ފުރައްސާރަ ކުރި ކަމަށް ކުރެވުނު ތުހުމަތެއްގައި ބަޔަކު ވަނީ އޭނާއަށް ހަމަލާދީ މަރާލާފަ އެވެ.
