ޗައިނާގެ އަސްކަރީ ޖެޓުތައް ޓައިވާނުގެ ވައިގެ ސަރަހައްދަށް ވަދެފި

ރިކޯޑު އަދަދެއްގެ ޗައިނާ އަސްކަރީ ޖެޓުތަކުން އިއްޔެ ޓައިވާނުގެ ވައިގެ ސަރަހައްދަށް ވަދެފައިވާ ކަމަށް ޓައިވާނުން ބުނެފި އެވެ.

ޓައިވާނު ޑިފެންސް މިނިސްޓްރީން ބުނީ 25 އަސްކަރީ އުޅަނދު ވައިގެ ސަރަހައްދުގައި އުޅުނު ކަމަށެވެ. މިއީ މިހާ ގިނަ އަދަދެއްގެ އަސްކަރީ ޖެޓު ޓައިވާން ސަރަހައްދަށް ފޮނުވި ފުރަތަމަ ފަހަރެވެ.

ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ޕްރޮވިންސެކެވެ. ނަމަވެސް ޓައިވާން ސަރުކާރުން ގަބޫލުކުރަނީ އެއީ މިނިވަން، އިސްތިގްލާލް ގައުމެއް ކަމަށެވެ.

ދޭތެރެ ދޭތެރެއިން ޗައިނާގެ އުޅަނދުތައް ޓައިވާނު ސަރަހައްދަށް ފޮނުވަ އެވެ. މި ދަނޑިވަޅަކީ ތަންކޮޅެއް ގިނައިން އެކަން ހިނގަމުންދާ ދަނޑިވަޅެކެވެ.

އެ މައްސަލާގައި ޓައިވާނުން ކަންބޮޑުވުން ފާޅުކުރާއިރު، ޓައިވާނަށް އެއްބާރުލުންދޭ އެމެރިކާއިން ވަނީ ޗައިނާއަށް އިންޒާރު ދީފަ އެވެ.