މި އަހަރުގެ ރޯދަ މަހު ރޯދައަށް ތިބޭ ވަގުތުތަކުގައި ޑުބާއީގެ ރެސްޓޯރެންޓުތަކުން ހިދުމަތް ހޯދާ ކަސްޓަމަރުން އާއްމުންނަށް ނުފެންނަ ގޮތަށް ސްކްރީން ކުރަން ނުޖެހޭނެ ކަމަށް އަންގައިފި އެވެ.
ކުރިން ޑުބާއީގައި އޮންނަ ގޮތުން ނަމަ ރޯދައަށް ތިބޭ ވަގުތުތަކުގައި ހިދުމަތް ދިނުމަށް ރެސްޓޯރެންޓުތަކުން ހާއްސަ ހުއްދައެއް ހޯދަން ޖެހެ އެވެ. އަދި އެ ވަގުތުތަކުގައި ހިދުމަތް ހޯދާ ކަސްޓަމަރުން ތިބެން ޖެހެނީ އާއްމުންނަށް ނުފެންނާނެ ގޮތަކަށެވެ.
ނަމަވެސް ޑުބާއީގެ އިކޮނޮމިކް ޑިވެލޮޕްމަންޓު ޑިޕާޓްމަންޓުން މިއަދު ބުނީ މި އަހަރުގެ ރޯދަ މަހު އެ އުސޫލަށް އަމަލު ކުރަން ނުޖެހޭނެ ކަމަށެވެ.
ޑުބާއީ ނިސްބަތްވާ ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަނީ ކޮވިޑާ ގުޅިގެން ގިނަ ފިޔަވަޅުތަކެއް އަޅާފަ އެވެ. އެގޮތުން ރޯދަ ވީއްލާ ވަގުތު އެއް ގޭބިސީއެއްގެ މެމްބަރުން ފިޔަވައި އިތުރު މީހުން ޖަމާވުން މަނާކޮށްފައި ވެއެވެ.
