އުރުދުންގައި އުފެދުނު ޝާހީ ކޯޅުންގަނޑަށް ފަހު ރަސްގެފާނު އަބްދުﷲ ބިން އަލްހުސައިން އާއި އެއްބަފާ ކޮއްކޯފުޅު ކުރީގެ ވަލީއަހުދު އަމީރު ހަމްޒާ ބިން އަލްހުސައިން އެކުގައި ފޮޓޯއަކުން ފެނިވަޑައިގެންފި އެވެ.
ހަމްޒާ މިދިޔަ ހަފުތާގައި އާއްމު ކުރެއްވި ވީޑިއޯއެއްގައި ވިދާޅުވީ އެމަނިކުފާނު ހުންނެވީ ގޭބަންދުގައި ކަމަށާއި ކޮށްފައިވާ ތުހްމަތަކީ ގަބީލާތަކުގެ ވެރިންނާ ގުޅިވަޑައިގެން ބަގާވާތް ކުރަން އުޅުއްވި ކަމުގެ ތުހްމަތު ކަމަށެވެ. ނަމަވެސް ހަމްޒާ އެކަން ދޮގުކުރައްވަ އެވެ.
ބީބީސީއަށް ފޮނުއްވި ވީޑިއޯގައި ހަމްޒާ ވިދާޅުވީ ވެރިންނަކީ ކޮރަޕްޓު ބައެއް ކަމަށާއި ފާޑުކިޔައިފި ނަމަ ސަލާމަތްތެރިކަމާއެކު އުޅެވޭނެ ކަމުގެ ޔަގީންކަން އެއްވެސް ރައްޔިތަކަށް ނެތް ކަމަށެވެ.
އެ މައްސަލަ ހައްލު ކުރުމަށް ކުރި މަޝްވަރާތަކަށް ފަހު ހަމްޒާ ފަހުން ވިދާޅުވީ ރަސްގެފާނަށް ވަފާތެރިވެ ވަޑައިގަންނަވާނެ ކަމަށާއި ގާނޫނު އަސާސީ ދިފާއު ކުރައްވާނެ ކަމަށެވެ.
ރަސްގެފާނު އަބްދުﷲ ފަހުން ނެރުއްވި ބަޔާނެއްގައި ވަނީ ބަގާވާތް ކުރަން އުޅުމުން ފުން އަސަރުތަކެއް ކުރެއްވުނު ކަމަށް ވިދާޅުވެފަ އެވެ.
އުރުދުންގެ މިނިވަންކަމަށް 100 އަހަރު ފުރުން ފާހަގަކުރަން އާދީއްތަ ދުވަހު ބޭއްވި ރަސްމިއްޔާތުގައި ޝާހީ އާއިލާގެ މެމްބަރުން އެކުގައި އުޅުއްވި ފޮޓޯތައް ވަނީ ސޯޝަލް މީޑިއާގައި ހިއްސާކޮށްފަ އެވެ. އެ ފޮޓޯތަކުން ރަސްގެފާނާއި ހަމްޒާ ވެސް ފެނިގެންދެ އެވެ. މިއީ ގޭ ބަންދުގައި ހުންނެވި ކަމަށް ހަމްޒާ ވިދާޅުވި ފަހުން އާއްމު ތަނަކުން އެމަނިކުފާނު ފެނިވަޑައިގެންނެވި ފުރަތަމަ ފަހަރެވެ.
