އިނގިރޭސި ރާނީގެ ފިރިކަލުން ޑިއުކް އޮފް އެޑިންބަރާ، އަމީރު ފިލިޕްގެ ޖަނާޒާގައި ބައިވެރިވެ ވަޑައިނުގަންނަވާނެ ކަމަށް ބޮޑުވަޒީރު ބޮރިސް ޖޯންސަން އިއުލާން ކުރައްވައިފި އެވެ.
ބޮޑުވަޒީރުގެ އޮފީހުން އިއުލާނު ކުރި ގޮތުގައި އެގޮތަށް ނިންމީ ކޮވިޑުގެ ސަބަބުން އަޅާފައިވާ ރައްކާތެރިކަމުގެ އުސޫލުގެ ދަށުން ޝާހީ އާއިލާގެ ގިނަ މެމްބަރުންނަށް ޖަނާޒާގައި ބައިވެރިވެ ވަޑައިގެންނެވުމުގެ ފުރުސަތު ދިނުމަށެވެ.
މިދިޔަ ހުކުރު ދުވަހު އުމުރުފުޅުން 99 އަހަރުގައި އަވަހާރަވި ފިލިޕްގެ ޖަނާޒާ އޮންނާނީ އަންނަ ހޮނިހިރު ދުވަހު އެވެ. އެ ޖަނާޒާގައި ބައިވެރިވެވޭނީ އެންމެ 30 މީހުންނަށެވެ. އެހެންކަމުން އެ ފުރުސަތު ލިބޭނީ ރާނީ އެލިޒަބަތު ދެ ވަނަ އާއި ފިލިޕްގެ ހަތަރު ދަރިކަލުން އަދި އަށް ކާފަ ދަރިކަލުންނާއި އެންމެ ގާތް އާއިލީ މެމްބަރުންނަށެވެ.
ފިލިޕް އަވަހާރަވުމުން ފުރަތަމަ ފަހަރަށް ވާހަކަފުޅު ދައްކަވަމުން އަމީރު ޗާލްސް އިއްޔެ ވިދާޅުވީ ބައްޕާފުޅަކީ ވަރަށް ހާއްސަ ބޭފުޅެއް ކަމަށެވެ. އަދި ބައްޕާފުޅު ވަކިވެގެން ދިޔަ މި ހިތާމަވެރި ވަގުތުގައި އާއިލާއަށް ހިތްވަރު ލިބެނީ ދޫކުރެއްވި ހަނދާންތަކުން ކަމަށް ޗާލްސް ވިދާޅުވި އެވެ.
އަންނަ ހޮނިހިރު ދުވަހު ބާއްވަން ހަމަޖެހިފައިވާ ފިލިޕްގެ ޖަނާޒާ ޓީވީތަކުން ދައްކާނެ އެވެ. އެ ޖަނާޒާގައި ބައިވެރިވުމަށް ދައުވަތު ލިބޭ މީހުންގެ ލިސްޓު ހާމަކުރާނީ ބުރާސްފަތި ދުވަހު އެވެ.
ކޮވިޑްއާ ގުޅިގެން ޖަނާޒާގައި ބައިވެރިވުމުގެ ފުރުސަތު އާއްމުންނަށް ނެތް އިރު، ޝާހީ އާއިލާއިން އެދިވަޑައިގެންނެވީ ޖަނާޒާ އޮންނަ ސެއިންޓް ޖޯޖް ޗެޕަލް ކައިރިއަށް މީހުން ޖަމާނުވުމަށެވެ.
އޭގެ އިތުރުން ފިލިޕްގެ ހަނދާނުގައި މާބޮނޑި ބެހެއްޓުމުގެ ބަދަލުގައި މީހުންނަށް އެހީވާ ޖަމިއްޔާއަކަށް ފައިސާގެ އެހީ ފޯރުކޮށްދިނުމަށް ވެސް ޝާހީ އާއިލާއިން އެދިވަޑައިގެންފައި ވެ އެވެ.
