އުރުދުންގައި ބަގާވަތްކޮށް ހަމަނުޖެހުން ހިންގަން އުޅުމުން ކުރެއްވުނު ފުން އިހުސާސުތައް ރަސްގެފާން އަބްދުﷲ ހާމަކުރައްވައިފި އެވެ.
އެމަނިކުފާނު ވިދާޅުވީ ޝާހީ ކޯޅުންގަނޑުގެ ސަބަބުން "ހައިރާންވެ، ދެރަވެ، ރުޅިއައި" ކަމަށެވެ. އަދި އެއީ ގައުމަށް ކުރިމަތިވި އެންމެ ބޮޑު އެއް ނުރައްކަލުގެ ގޮތުގައި ސިފަ ކުރެއްވި އެވެ.
ދައުލަތުގެ ޓީވީގެ ޕްރެޒެންޓަރަކު އިއްވި ރަސްގެފާނު އަބްދުﷲ ގެ ބަޔާނުގައިވާ ގޮތުން މި ދިމާވި ގޮންޖެހުމަކީ އެމަނިކުފާނަށް ވަރަށް ފުން އަސަރުތަކެއް ކުރުވި ގޮންޖެހުމެކެވެ.
އުރުދުންގައި ބަގާވާތް ކުރަން އުޅުނީ ރަސްގެފާނުގެ އެއްބަފާ ކޮއްކޯފުޅު އަދި ކުރީގެ ވަލީއަހުދު އަމީރު ހަމްޒާ ބިން ހުސެއިން ކަމަށް ވަނީ ތުހުމަތުކޮށްފަ އެވެ.
މިއީ މި މައްސަލައިގައި ރަސްގެފާނު ވަކި އެއްޗެއް ވިދާޅުވި ފުރަތަމަ ފަހަރެވެ.
ރަސްގެފާނުގެ ވާހަކަފުޅުގައި މަސައްކަތް ކުރެއްވީ ކޯޅުންގަނޑު ނިމުމަކަށް އައިސްފައިވާ ކަމުގެ ޔަގީންކަން ރައްޔިތުންނަށް ފޯރުކޮށްދިނުމަށެވެ.
މި ވަކިވެގަތުމުގެ ފަހަތުގައިވާ ފަރާތްތައް އައީ އަޅުގަނޑުމެންގެ ގޭގެ [ޝާހީ ގަނޑުވަރު] ތެރެއިންނާއި ގޭގެ ބޭރުން. މީގެ ކުރިފެޅުމުގެ ކުރިން މި ވަނީ ބުރިކޮށްލާފައި. -- ރަސްގެފާނު އަބްދުﷲ
އެ ބަޔާނުގައިވާ ގޮތުން އަމީރު ހަމްޒާ ވަނީ ރަސްގެފާނަށް ވަފާތެރިވާނެ ކަމަށް ވައުދުވެ ވަޑައިގެން، ގައުމުގެ ގާނޫނު އަސާސީ އާއި ގާނޫނުތައް ކުރިއަށް ނެރުއްވާފަ އެވެ.
އަމީރު ހަމްޒާ މިހާރު ހުންނެވީ އާއިލާ އާއެކު ގަނޑުވަރުގައި ކަމަށާއި ބަގާވާތުގެ ތަހުގީގު ކުރިއަށްދާ ކަމަށް ވެސް ރަސްގެފާނު ވިދާޅުވި އެވެ.
މިދިޔަ ހޮނިހިރު ދުވަހު އަމީރު ހަމްޒާ ވަނީ އެމަނިކުފާނު ގޭބަންދުގައި ހުންނެވި ކަމަށް ވިދާޅުވެފަ އެވެ. އަދި ގައުމުގެ ވެރިންނަކީ ކޮރަޕްޓް ބައެއް ކަމަށް ބީބީސީއަށް ފޮނުއްވި ވީޑިއޯއެއްގައި ސިފަކުރެއްވި އެވެ.
ހަމްޒާއަށް ތުހުމަތު ކުރަނީ ގަބީލާތަކުގެ ވެރިންނާ ގުޅިގެން ބަގާވަތް ކުރަން އުޅުނު ކަމަށެވެ. މި ރޭވުމުގައި ހިމެނޭ ކަމަށް ބެލެވޭ އިތުރު 16 މީހަކު ހައްޔަރުކޮށްފައި ވެއެވެ.
އުރުދުންގެ ސަރުކާރުން އިއްޔެ ވަނީ ޝާހީ ކޯޅުންގަނޑާ ގުޅޭ ހަބަރު ފެތުރުން މަނާކޮށްފަ އެވެ. އެހެންކަމުން ސޯޝަލް މީޑިއާގައި ވެސް އެ ވާހަކަ ފެތުރުން މަނާ ވާނެ އެވެ.
