ލަންޑަނުގައި ހުންނަ މިޔަންމާގެ ސަފީރު އެމްބަސީން ބޭރުކޮށްފި އެވެ.
ކިޔޯ ޒްވާ މިން ވިދާޅުވީ އެމްބަސީގެ މުވައްޒަފުން ވެސް އިމާރާތުން ނިކުތުމަށް މިޔަންމާގެ އަސްކަރީ އޮފިޝަލަކު އަންގާފައިވާ ކަމަށާއި އޭނާއަކީ ގައުމުގެ ސަފީރު ނޫން ކަމަށް ވެސް އެންގި ކަމަށެވެ.
"އަޅުގަނޑަށް [އެމްބަސީއަށް] ނުވަދެވޭނެހެން ވަނީ އެތަން ތަޅުލާފައި،" ރޮއިޓާޒް އަށް މިން ވިދާޅުވި އެވެ.
މިޔަންމާގެ އަސްކަރިއްޔާއިން ފެބްރުއަރީ އެއްވަނަ ދުވަހު ހިންގި ބަގާވާތަށް ފަހު އެ ގައުމުގައި ވަނީ ހަމަނުޖެހުން ބޮޑުވެފަ އެވެ.
އެ ގައުމުން އިނގިރޭސި ވިލާތަށް ކަނޑައަޅާފައި ހުންނަވާ ސަފީރު މިން މީގެ ކުރިން ވަނީ ބަގާވާތް ކުށްވެރި ކުރައްވާ، ހައްޔަރުކޮށްފައި ހުންނެވި އިންތިހާބީ ލީޑަރު އަންގް ސަން ސޫ ކީ މިނިވަން ކުރުމަށް ގޮވާލައްވާފަ އެވެ.
އެމްބަސީން ބޭރު ކުރުމަކީ "ލަންޑަނުގެ މެދުގައި ހިނގި ބަގާވާތެއް ކަހަލަ ކަމެއް"ގެ ގޮތުގައި މިން ވަނީ ސިފަކުރައްވާފަ އެވެ.
ލަންޑަނުގައި ހުންނަ މިޔަންމާ އެމްބަސީގެ ބޭރުގައި މިން މަޑުކޮށްގެން ހުންނަވާ މެޓްރޮޕޮލިޓަން ފުލުހުންނަށް މައުލޫމާތު ދެއްވާ މަންޒަރު ފެންނަ ފޮޓޯތައް ވަނީ އާއްމުވެފަ އެވެ.
އެއާއެކު ލަންޑަނުގައި ދިރިއުޅޭ މިޔަންމާގެ ރައްޔިތުން އަންނަނީ އަސްކަރިއްޔާއިން އެމްބަސީ ހިފުމާ ދެކޮޅަށް އެ ސަރަހައްދަށް އެއްވެ، ނުރުހުން ފާޅުކުރަމުންނެވެ.
ބަގާވާތާ ދެކޮޅަށް މުޒާހަރާ ކުރަމުންދާ މީހުންނަށް އަމާޒުކޮށް އަސްކަރިއްޔާއިން ބަޑި ޖަހަމުން ދާތީ މިހާތަނަށް 500 އަށް ވުރެ ގިނަ މީހުން ވަނީ މަރުވެފަ އެވެ.
އިންތިހާބީ ލީޑަރުން ހައްޔަރު ކުރުމަށް ފަހު އަސްކަރިއްޔާއިން ވަނީ އެއް އަހަރަށް ކުއްލި ނުރައްކަލުގެ ހާލަތު އިއުލާނުކޮށް، އޭގެ ފަހުން އިންތިހާބެއް ބާއްވާން ކަމަށް ބުނެފަ އެވެ.
