މިލާން (އޭޕްރީލް 8) - އިޓާލިއަން ލީގުގައި ރޭ ސަސުއޯލޯ އަތުން 2-1 އިން މޮޅުވެ އިންޓަ މިލާނުން ލީގުގެ އެއް ވަނައިގައި 11 ޕޮއިންޓަށް ލީޑުފުޅާކުރިއިރު, އަމިއްލަ ދަނޑުގައި ކުޅުނު މެޗުން ނަޕޯލީ 2-1 އިން ބަލިކޮށް އެންމެ ފަހުގެ ޗެމްޕިއަން ޔުވެންޓަސް ލީގުގެ ތިން ވަނަ އަށް ޖެހިލައިފި އެވެ.
އިންޓަ އެއް ވަަނައިގައި އޮތީ 29 މެޗުން 71 ޕޮއިންޓް ހޯދައިގެންނެވެ. ދެ ވަނައިގައި އޮތް އޭސީ މިލާނަށް 29 މެޗުން ލިބިފައިވަނީ 60 ޕޮއިންޓެވެ. ތިން ވަނައިގައި ޔުވެންޓަސް އޮތީ 29 މެޗުން 59 ޕޮއިންޓް ހަމަކޮށްގެންނެވެ.
ރޭގެ މެޗު ފަށައިގެން 10 ވަަނަ މިނިޓްގައި އިންޓަ އަށް ލީޑުނަގައިދިނީ ރޮމެލޫ ލުކާކޫ އެވެ. އޭނާ މި ގޯލު ޖެހީ އެޝްލީ ޔަންގް ނަގައިދިން ހުރަހަކުން ބޮލުންނެވެ. އިންޓަ އިން ފުރަތަމަ ހާފުގައި ދެ ވަނަ ގޯލެއް ޖަަހަން ކުރި މަސައްކަތް ކާމިޔާބެއްނުވި އެވެ. އެ ޓީމުން ދެ ވަނަ ގޯލު ޖެހީ މެޗުގެ 67 ވަނަ މިނިޓްގަ އެވެ. ކައުންޓަ އެޓޭކެއްގައި ލުކާކޫ ދިން ބޯޅައަކުން މި ގޯލު ޖެހީ އާޖެންޓީނާގެ ފޯވާޑް ލަޓާރޯ މާޓިނޭޒް އެވެ.
ސަސުއޯލޯގެ ހަމައެކަނި ގޯލު ޖެހީ މެޗު ނިމެން ފަސް މިނިޓަށް ވެފައި ވަނިކޮށް ހާމެދް ޓްރައޯރޭ އެވެ.
އިންޓަ އިން 2010 ވަަނަ އަހަރަށް ފަހު ފުރަތަމަ ފަހަރަށް ލީގު ޗެމްޕިއަންކަން ހޯދަން މަސައްކަތްކުރަމުން އަންނައިރު, އެ ޓީމުގެ ކޯޗު އެންޓޯނިއޯ ކޮންޓޭ ވަނީ ބޮޑު ލީޑެއް ލިބުނަސް އަދި ލީގު ޔަގީންނުވާ ކަމަށާއި ދެން ހުރި މެޗުތަކުން ވެސް މޮޅުވާން ޖެހޭ ކަމަށް ބުނެފަ އެވެ.
ނަޕޯލީ ކޮޅަށް ރޭ ޔުވެންޓަސްގެ ގޯލުތައް ޖެހީ ކްރިސްޓިއާނޯ ރޮނާލްޑޯ އާއި ޕައޮލޯ ޑިބާލާ އެވެ. މިއީ އަނިޔާއިން ރަނގަޅުވި ފަހުން ޑިބާލާ ކުޅުނު ފުރަތަމަ މެޗެވެ. ނަޕޯލީގެ ހަަމައެކަނި ގޯލު ޖެހީ އެ ޓީމުގެ ކެޕްޓަން ލޮރެންޒޯ އިންސީނިއޭ އެވެ.
ލީގުގެ ރޭހުގައި ޔުވެންޓަސް ފަހަތުގައި އޮތްއިރު, އެ ޓީމުގެ ކޯޗު އަންދްރެއާ ޕިރްލޯ ބުނީ މި ސީޒަނުގައި ގިނަ ގޯސްތަކެއް ހެދުނު ކަމަށާއި ބޭނުންވަނީ އެ ކަންކަމުން ފިލާވަޅު ނަގައިގެން ދެން ހުރި މެޗުތަކުގައި ރަނގަޅު ނަތީޖާތަކެއް ނެރުމަށް ކަމަށެވެ.
