ޗައިނާއިން ހަމަލާދީފި ނަމަ އެންމެ ފަހު ވަގުތާ ޖެހެންދެން ވެސް ރައްދުގައި ހަމަލާ ދޭނެ ކަމަށް ޓައިވާނުގެ ފޮރިން މިނިސްޓަރު ވިދާޅުވެއްޖެ އެވެ.
ޓައިވާން ކައިރީގައި ޗައިނާއިން އަސްކަރީ ޑްރިލްތައް ބާއްވަމުން ދާތީ އެއީ އެ ގައުމުން ޓައިވާނަށް ހަމަލާއެއް ދޭން ތައްޔާރުވަމުންދާ ކަމުގެ ނިޝާނެއް ކަމަށް ބުނެ އެމެރިކާއިން ވަނީ އިންޒާރު ދީފަ އެވެ.
ޗައިނާއިން ބުނާ ގޮތުގައި ޓައިވާނަކީ އެ ގައުމުގެ ބައެކެވެ. ނަމަވެސް ޓައިވާނުން ދެކޭ ގޮތުގައި ޓައިވާނަކީ މިނިވަން ދައުލަތެކެވެ. ޗައިނާގެ އަސްކަރީ ޑްރިލްތައް ޓައިވާން ކައިރީގައި އިތުރުކޮށްފައިވާ މި ދަނޑިވަޅުގައި ޗައިނާއިން ބުނެފައި ވައިގެ ތަމްރީންތަކެއް ވެސް ހަމަޖެހިފައިވާ ކަމަށެވެ.
"އަޅުގަނޑު އެނގިފައިވާ ގޮތުގައި މި ސަރަހައްދުގައި ކަންކަން ވަމުންދާ ގޮތް ބަލަމުންދާ އެމެރިކާ އިސްވެރިންނަށް ދަނީ ޗައިނާއިން ޓައިވާނަށް ހަމަލާއެއް ދޭން އުޅޭކަން ވަރަށް ބޮޑަށް ފާހަގަވަމުން،" ފޮރިން މިނިސްޓަރު ޖޯސެފް ވޫއާ ހަވާލަދީ ރޮއިޓާޒްގައި ވެއެވެ.
"އަޅުގަނޑުމެން މި ތިބީ އެއްވެއް ސުވާލެއް ކުރުމެއް ނެތި އަމިއްލަ ދިފާއުގައި މަސައްކަތް ކުރަން ތައްޔާރަށް އަދި ހަނގުރާމަ ކުރަން ޖެހިއްޖެ ނަމަ ހަނގުރާމަ ވެސް ކުރާނަން. އެންމެ ފަހު ވަގުތާ ހަމައަށް ދިފާއު ވާން މަސައްކަތް ކުރަން ޖެހިއްޖެ ނަމަ އެކަން ވެސް ކުރާނަން."
އެމެރިކާއިން އަންނަނީ ޓައިވާނުގެ އަސްކަރިއްޔާ ޒަމާނީކޮށް ވަރުގަދަ ކުރުމަށް ބާރު އަޅަމުންނެވެ. އެމެރިކާއިން ބޭނުންވަނީ ޗައިނާއިން ދީފާނެ ހަމަލާއަކަށް އެ ގައުމުން ތައްޔާރުވެފައި އޮތުމެވެ. ޓައިވާނަށް އެންމެ ގިނައިން ހަތިޔާރު ފޯރުކޮށްދީ، ބައިނަލްއަގްވާމީ މުޖުތަމައުގައި ޓައިވާނުގެ އެންމެ ބޮޑު ބައިވެރިއަކީ ވެސް އެމެރިކާ އެވެ.
ވޫ ވިދާޅުވީ ދިފާއީ ކަންކަމަށް ކުރާ ހޭދަ އިތުރު ކުރަން ނިންމާފައިވާ ކަމަށެވެ. އޭގެ އިތުރުން ޓައިވާނުން އަންނަނީ ޗައިނާއިން ހަމަލާއެއް ދީފާނެ ހަމަލާއަކަށް ތައްޔާރުވުމަށް ހާއްސަ އަސްކަރީ ތަމްރީނެއް ބޭއްވުމަށް ރާވަމުންނެވެ. މި ތަމްރީނުގައި އަސްކަރިއްޔާގެ އިތުރުން ސިއްހީ ދާއިރާގެ ބައިވެރިވުން ވެސް އޮންނާނެ އެވެ.
