އުރުދުންގައި ހިންގަން އުޅުނު ކަމަށް ބުނާ ބަގާވާތުގައި ސައުދީ އަރަބިއްޔާގެ އެއްވެސް ދައުރެއް ނުހިމެނޭނެ ކަމަށް އެ ގައުމުގެ އޮފިޝަލުން ވަނީ ބުނެފަ އެވެ.
މިދިޔަ ހޮނިހިރު ދުވަހު އުރުދުންގެ ކުރީގެ ވަލީއަހުދު އަމީރު ހަމްޒާ ބިން ހުސެއިން ވަނީ ގޭ ބަންދުކުރައްވާފަ އެވެ. އެމަނިކުފާނަށް ކުރެއްވީ ބަގާވާތުގެ ތުހުމަތެވެ.
އެގޮތުން އަމީރު ހަމްޒާގެ ބޭބޭފުޅު އަދި ރަސްގެފާނު އަބްދުﷲ އަށް ފާޑުކިޔުމަށް ގަބީލާތަކުގެ ވެރިން ބާއްވާ ބައްދަލުވުންތަކުގައި ބައިވެރިވެ ވަޑައިގެންނެވި ކަމުގެ ތުހުމަތު އެމަނިކުފާނުގެ މައްޗަށް ކުރި އެވެ.
އެކަމާ ގުޅިގެން ބީބީސީއަށް ފޮނުއްވި ވީޑިއޯއެއްގައި އަމީރު ހަމްޒާ ވަނީ ތުހުމަތުތައް ދޮގު ކުރެއްވުމަށް ފަހު، ސަރުކާރުގެ ވެރިންނަކީ ކޮރަޕްޓް ބައެއްގެ ގޮތުގައި ސިފަކުރައްވާފަ އެވެ.
އަދި ހިޔާލު ފާޅުކުރުމުގެ މިނިވަންކަމެއް ގައުމުގައި ނެތް ކަމަށާއި އެއްޗެއް ބުނެފި ނަމަ ސަލާމަތީ ބާރުތަކުން ފިޔަވަޅު އަޅާނެ ކަމުގެ ބިރުގައި ރައްޔިތުން އުޅެމުންދާ ކަމަށް ވެސް ވިދާޅުވި އެވެ.
ޝާހީ އާއިލާގެ އެ ކޯޅުންގަނޑު ހަމައަކަށް އެޅުވުމަށް ކުރި މަޝްވަރާތަކަށް ފަހު އިއްޔެ އަމީރު ހަމްޒާ ވަނީ ރަސްގެފާނު އަބްދުﷲ އަށް ވަފާތެރިވާނެ ކަމަށް ވިދާޅުވެފަ އެވެ. މިއީ މައްސަލަ ހައްލުވަމުންދާ ކަމުގެ ނިޝާނެއް ނަމަވެސް، މި މައްސަލަ ފެށެން މެދުވެރިވުމުގައި ސައުދީ އަރަބިއްޔާއިން ދައުރެއް އަދާކުރި ކަމަށް ދަނީ ބެލެވެމުންނެވެ.
ނަމަވެސް ސައުދީ އަރަބިއްޔާއިން އެ ވާހަކަތައް ދޮގު ކުރުމަށް ފަހު ބުނެފައި ވަނީ އެ ގައުމުގެ ފޮރިން މިނިސްޓަރު އަމީރު ފައިސަލް ބިން ފަރްހާން އުރުދުންއަށް ވަޑައިގެން ރަސްގެފާނު އަބްދުﷲ އަށް ތާއީދުކުރައްވާކަން ހާމަކުރައްވާފައިވާ ކަމަށެވެ.
ސައުދީއަށް ތުހުމަތު ކުރެވެނީ ކީއްވެ؟
ބަގާވާތެއްގެ އަޑުތައް ފެތުރުމާއެކު އުރުދުންގެ އޮފިޝަލުން ބުނެފައި ވަނީ އަމީރު ހަމްޒާ އާއި ބައެއް އެހެން އިސް ފަރާތްތަކުގެ އަމަލުތައް ހުރި ގޮތް ސަލާމަތީ ބާރުތަކުން ބަލަމުން ގޮސްފައިވާ ކަމަށެވެ. އަދި ގައުމު ހަމަނުޖެހުމުގެ ތެރެއަށް ވައްޓާލުމުގެ ރޭވުމުގައި "ބޭރުގެ ބަޔަކު" ހިމެނޭ ކަމަށް ބުނެފައި ވެއެވެ.
މި މައްސަލައިގެ ފުނަށް ފީނާއިރު ފާހަގަވަނީ ދެ ކަމެކެވެ. އެއީ ހިތްހަމަނުޖެހިފައި ތިބި ގަބީލާތަކުގެ ވެރިންނާ އަމީރު ހަމްޒާ ބައްދަލުކުރެއްވުމާއި ބޭރުގެ ގައުމަކާ ގުޅުން ހުރި އިސް އޮފިޝަލުންތަކެއްގެ އަމަލުތަކެވެ. އަމީރު ހަމްޒާ ގޭ ބަންދުކުރެއްވި ދުވަހު އިތުރު 16 އޮފިޝަލުން ވެސް ހައްޔަރުކޮށްފައި ވެ އެވެ.
ހޮނިހިރު ދުވަހު ހައްޔަރު ކުރި އެންމެ އިސް އޮފިޝަލަކީ ބައްސާމް އަވާދަﷲ އެވެ. އޭނާއަކީ އުރުދުންގެ ޝާހީ ކޯޓުގެ ކުރީގެ ވެރިޔާ އެވެ. އަދި މިހާރު އެއީ ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާނުގެ އިގްތިސާދީ އެޑްވައިޒަރެވެ.
އޭނާގެ އަތުގައި އުރުދުން އާއި ސައުދީގެ ޕާސްޕޯޓު އޮވެ އެވެ. ވޮޝިންޓަން ޕޯސްޓުން ހަބަރު ފަތުރާ ގޮތުގައި އުރުދުންއަށް މި ވަގުތު ވަޑައިގެން އުޅުއްވާ ސައުދީ ފޮރިން މިނިސްޓަރުގެ ވަފުދުން އަންނަނީ ހައްޔަރުކޮށްފައި ހުންނެވި ބައްސާމް ނުލާ ފުރުމަށް ދެކޮޅު ހަދަމުންނެވެ. ނަމަވެސް ސައުދީން އެކަން ދޮގުކުރެ އެވެ.
އިގްތިސާދީ ގޮތުން ތަފާތު ދެ ގައުމު ނަމަވެސް ސައުދީ އާއި އުރުދުން އަކީ ވަރަށް އެއް ގޮތް ދެ ގައުމެވެ. ތާރީހީ ގޮތުން ދެ ގައުމުގެ ގުޅުން ގަރުނުތަކަށް ދެމިގެން ދާއިރު، ދެ ގައުމު ގުޅޭ ބޯޑަރު ސަރަހައްދުގައި އުޅޭ ގަބީލާތަކުގެ ގުޅުން ވެސް ބޮޑެވެ.
އެހެންކަމުން އުރުދުން ހަމަނުޖެހުމުގެ ތެރެއަށް ވައްޓާލުމަށް ސައުދީން މަސައްކަތް ކުރުމަކީ ނާދިރު ކަމެއް ކަމަށް ބައެއް ފަރާތްތަކުން ބުނެ އެވެ. އަދި އުރުދުންގެ ރަސްކަން ވެއްޓިއްޖެ ނަމަ މެދުއިރުމަތީގައި ނުރައްކާތެރި ކަންތައްގަނޑެއް ފެށުމުގެ ބިރު އޮތްކަން ވެސް އެ ސަރަހައްދުގެ ގައުމުތަކަށް އެނގެ އެވެ. ބަގާވާތެއްގެ ވާހަކަ ދެކެވުމާއެކު ރަސްގެފާނު އަބްދުﷲ އަށް ތާއީދު އޮތް ކަމަށް ގައުމުތަކުން ބުނަން ފެށީ އެހެންވެ ކަމަށް ބެލެވެ އެވެ.
އުރުދުން ހަމަނުޖެހުމުގެ ތެރެއަށް ވެއްޓިއްޖެ ނަމަ އެކަން ވެގެން ދާނީ އަލް ގައިދާ އާއި އިސްލާމިކް ސްޓޭޓް ފަދަ ޓެރަރިސްޓް ގްރޫޕުތަކަށް ވެސް ހިތްވަރަކަށެވެ. އެއީ އުރުދުންއަކީ ހަމަނުޖެހުން ބޮޑު މެދުއިރުމަތީގެ ސުލްހަ ރަމްޒުކޮށްދޭ ގައުމު ކަމަށް ވާތީ އެވެ.
