ސަރުކާރާ ދެކޮޅަށް ބަގާވާތް ކުރަން އުޅުނު ކަމުގެ ތުހުމަތުގައި ގޭ ބަންދުގައި ހުރި އުރުދުންގެ ކުރީގެ ވަލީއަހުދު އަމީރު ހަމްޒާ ބިން ހުސެއިން، އެމަނިކުފާނުގެ އެއްބަފާ ބޭބޭފުޅު އަދި ރަސްގެފާނު އަބްދުﷲ އަށް ބައިއަތު ހިއްޕަވައިފި އެވެ.
އަމީރު ހަމްޒާ މި ވަގުތު ހުންނެވީ ގޭ ބަންދުގައި ކަމަށް ވިދާޅުވާ ވީޑިއޯއެއް ހޮނިހިރު ދުވަހު ބީބީސީން ވަނީ އާއްމުކޮށްފަ އެވެ. ނަމަވެސް އެއީ ހަގީގަތެއް ނޫން ކަމަށް އުރުދުންގެ އަސްކަރިއްޔާއިން ބުނެ އެވެ.
އެ ވީޑިއޯގައި އަމީރު ހަމްޒާ ވަނީ އެމަނިކުފާނާ ދެކޮޅަށް ކުރާ ތުހުމަތުތައް ދޮގުކުރައްވާފަ އެވެ. ނަމަވެސް ސަރުކާރުގެ ވެރިންނަކީ ކޮރަޕްޓު ބައެއްގެ ގޮތުގައި ސިފަކުރެއްވި އެވެ.
އަމީރު ހަމްޒާ މަސައްކަތް ކުރެއްވީ ގަބީލާތަކުގެ ވެރިންނާ ގުޅިގެން ސަރުކާރާ ދެކޮޅަށް ބަގާވާތް ހިންގަން ކަމަށް ބޮޑުވަޒީރުގެ ނައިބު އައިމަން ސަފާދީ އިއްޔެ ތުހުމަތު ކުރައްވާފައި ވެއެވެ.
އަމީރު ހަމްޒާ ގޭ ބަންދުގައި ހުންނެވިއިރު، ބަގާވާތް ކުރަން އުޅުނު ކަމުގެ ތުހުމަތުގައި މިހާތަނަށް 16 މީހަކު ހައްޔަރުކޮށްފައި ވެއެވެ. އޭގެ ތެރޭގައި ރަސްގެފާނު އަބްދުﷲ ގެ ކުރީގެ އެޑްވައިޒަރާއި ޝާހީ އާއިލާގެ އިތުރު ބޭފުޅަކު ހިމެނިވަޑައިގަންނަވަ އެވެ.
ރަސްގެފާނަށް ބައިއަތު ހިއްޕެވުން
ޝާހީ އާއިލާގެ ތެރޭގައި ޖެހިފައިވާ މައްސަލަ ހައްލު ކުރަން މަޝްވަރާތައް ބޭއްވިތާ ގަޑިއިރުތަކެއް ފަހުން އުމުރުން 41 އަހަރުގެ އަމީރު ހަމްޒާ ނެރުއްވި ބަޔާނެއްގައި ވިދާޅުވީ ގައުމުގެ ގާނޫނު އަސާސީ ދިފާއު ކުރައްވާނެ ކަމަށެވެ.
ބައެއް އޮފިޝަލުން ބީބީސީއަށް މައުލޫމާތު ދިން ގޮތުގައި މައްސަލަ ހައްލު ކުރުމަށް ރަސްގެފާނުގެ ފަރާތްޕުޅުން އަމީރު ހަމްޒާއާ ވާހަކަފުޅު ދެއްކެވީ ބޮޑުބޭބޭފުޅު އަމީރު ހަސަން އެވެ.
"ރަސްގެފާނަށް އަޅުގަނޑު ބައިއަތު ހިފަން. އަޅުގަނޑު ދެމިހުންނާނީ އުރުދުންގެ ހާޝިމީ ރަސްކަމުގެ ގާނޫނު އަސާސީ ދިފާއު ކުރުމުގައި،" އަމީރު ހަމްޒާގެ ސޮއިއާއެކު ޝާހީ ގަނޑުވަރުން ނެރުނު ބަޔާނުގައި ވެއެވެ.
އުރުދުންގެ ވަލީއަހުދުގެ ގޮތުގައި 2004 ވަނަ އަހަރާ ހަމައަށް ހުންނެވި އަމީރު ހަމްޒާގެ އަތްޕުޅުން އެ ލަގަބު ނެންގެވުމަށް ފަހު ވަލީއަހުދު ކަމަށް ކަނޑައަޅާފައިވަނީ މިހާރުގެ ރަސްގެފާނުގެ އަބްދުﷲ ގެ ދަރިކަލުންނެވެ. މިހާ ހާމަކަން ބޮޑު ގޮތެއްގައި ޝާހީ އާއިލާގެ ކޯޅުން ހާމަވާނެ ކަމަށް ކުރިން ބެލެވިފައެއް ނުވެ އެވެ.
އަމީރު ހަމްޒާއަކީ ކާކު؟
އަމީރު ހަމްޒާއަކީ ކުރީގެ ރަސްގެފާނު ހުސެން އާއި އެމަނިކުފާނު އެންމެ ލޯބިވެ ވަޑައިގެންނެވި އަނބިކަނބަލުން ރާނީ ނޫރަށް ލިބިވަޑައިގެންނެވި އެންމެ ދޮށީ ދަރިކަލުންނެވެ. އިނގިރޭސިވިލާތާއި އެމެރިކާއިން ތައުލީމް ހާސިލްކުރެއްވުމަށް ފަހު ހަމްޒާ ވަނީ އުރުދުންގެ އަސްކަރިއްޔާއަށް ހިދުމަތް ކުރައްވާފަ އެވެ.
އަމީރު ހަމްޒާއަކީ ވަލީއަހުދު ކަމަށް ކަނޑައެޅީ 1999 ގައެވެ. ބައްޕާފުޅު އަދި އޭރުގެ ރަސްގެފާނު ހުސެއިން، ހަމްޒާ ސިފަކުރެއްވީ އެމަނިކުފާނުގެ "ލޮލުގެ ނޫރު" ގޮތުގަ އެވެ. ނަމަވެސް ރަސްގެފާނު އަވަހާރަވުމާއެކު އަމީރު ހަމްޒާއަކީ ތަހުތުގެ މަސްއޫލިއްޔަތު އަދާކުރެވޭ ވަރަށް ވުރެ ޒުވާން ބޭފުޅެއް ކަމަށް ކަނޑައެޅި އެވެ.
އެހެންކަމުން ހަމްޒާގެ ބަދަލުގައި ރަސްގެފާނަކަށް ވެވަޑައިގެންނެވީ އަބްދުﷲ އެވެ. ހަމްޒާއަކީ ވަލީއަހުދު ކަމަށް ކަނޑައަޅާފައި އޮތް އޮތުން ރަސްގެފާނު އަބްދުﷲ ބާތިލްކުރެއްވީ 2004 ގައެވެ.
