ޗައިނާގައި އެއް ފަހަރާ ތިންހާހަށް ވުރެ ގިނަ ޑްރޯން ދުއްވައިގެން ދުނިޔޭގެ ރިކޯޑެއް ގާއިމްކޮށްފި އެވެ.
އެއް ފަހަރާ 3،281 ޑްރޯންއުދުއްސައިގެން ޝޯއެއް ދީފައި ވަނީ ދެކުނު ކޮރެއާގެ ހަޔުންޑާއީ ކުންފުނީގެ ދަށުން ހިންގާ ޖެނެސިސް ކުންފުނިންނެވެ.
ޝަންހާއީގައި ބޭއްވި އެ އިވެންޓު ރިކޯޑު ފޮތުގައި ހިމެނުނީ އެންމެ ގިނަ "އަންމޭންޑް އެއިރިއަލް ވެހިކަލް" ދުއްވި އިވެންޓުގެ ގޮތުގަ އެވެ.
މީގެ ކުރިން އެ ރިކޯޑް އޮތީ ޗައިނާ ކުންފުންޏެއް ކަމަށްވާ ޝެންޒެން ޑަމޯޑާ އިންޓެލިޖެންޓް ކޮންޓްރޯލް ޓެކްނޮލޮޖީގެ އަތުގަ އެވެ. އެ ކުންފުނިން ސެޕްޓެމްބަރު 2020 ގައި ވަނީ އެއް ފަހަރާ 3،051 ޑްރޯން ދުއްވައިގެން ޝޯއެއް ދީފަ އެވެ.
ޑްރޯންގެ އެހީގައި ޝޯތައް ދީ ރިކޯޑު ފޮތުން ޖާގަ ހޯދަމުން ދާއިރު، ޑްރޯން ޓެކްނޮލޮޖީއަކީ މިހާރު އިންސާނުންގެ ދިރިއުޅުމަށް އެންމެ ބޮޑު ބަދަލެއް ގެންނަމުންދާ ޓެކްނޮލޮޖީ އެވެ.
