މާޒިޔާ އަކީ މި ވަގުތު ރާއްޖޭގައި އޮތް އެންމެ ވަރުގަދަ ކްލަބް ކަމަށާއި އެ ޓީމު އަތުން ލިބޭ ޕޮއިންޓަކީ ބޯނަހެއް ކަމަށް މިރޭ ދިރާގު ދިވެހި ޕްރިމިއާ ލީގުގައި މާޒިޔާއާ ދެކޮޅަށް ނުކުންނަ ސުޕަ ޔުނައިޓެޑް ސްޕޯޓްސް (ސަސް)ގެ ކޯޗު މުހައްމަދު ޝިޔާޒް (މޯހަން) ބުނެފި އެވެ.
ލީގުގެ އެއް ވަނައިގައި މާޒިޔާ މި ވަގުތު އޮތީ 10 މެޗުން 24 ޕޮއިންޓް ހޯދައިގެންނެވެ. ސަސް ހަ ވަނައިގައި އޮތީ 10 މެޗުން 11 ޕޮއިންޓް ހޯދައިގެންނެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި މޯހަން ބުނީ ސަސްގެ އަމާޒަކީ ގަދަ ހައެއްގެ ތެރޭގައި އޮތުމަށް ކަމަށާއި ރާއްޖޭގެ އެންމެ ވަރުގަދަ ޓީމު ކަމަށްވާ މާޒިޔާއާ ދެކޮޅަށް ސަސް އިން ފޯކަސްކޮށްގެން މަސައްކަތް މިކުރަނީ ޕޮއިންޓެއް ނޫނީ ކާމިޔާބެއް ހޯދުމަށް ކަމަށެވެ.
"މި މެޗުގައި އަޅުގަނޑުމެންނަށް މި ލިބޭ ޕޮއިންޓު ވެސް ވާނީ ބޯނަސް އަކަށް. އަޅުގަނޑުމެން ވިސްނުން މި ހުރީ ރެލިގޭޝަނުން ސަލާމަތްވެ ގަދަ ހަޔަކަށް އެރޭތޯ މަސައްކަތްކުރުން. އެ ކަމުގައި ކުރާ މަސައްކަތުގައި މި މެޗުން ޕޮއިންޓެއް ލިބިއްޖިއްޔާ އެއީ ހިތްވަރަކަށް ވާނެ. އެކަމަކު ޕޮއިންޓެއް ނުލިބުނަސް މާ ބޮޑު މާޔޫސްކަމެއް ނުހުންނާނެ. އެއީ ކުރިއަށް މުހިއްމު މެޗުތަކެއް އެބަހުރި ފޯކަސް ކުރަން," މޯހަން ބުންޏެވެ.
މާޒިޔާގެ ކޯޗު ސާބިއާގެ ރިސްޓޯ ވިޑަކޮވިޗް ވަނީ ލީގުގައި ވާދަކުރާ ކޮންމެ ޓީމެއް ވެސް އިތުރު ހިތްވަރެއް ލައިގެން މަސައްކަތްކުރާނީ މާޒިޔާ ބަލިކުރަން ކަމަށް ބުނެފަ އެވެ. ސަސްގެ ވެސް އޮތީ އެ ރޫހު ތޯ ސުވާލުކުރުމުން މޯހަން ބުނީ ސީދާ އެ ވިސްނުން އޮތް ކަމަށް ގަބޫލުނުކުރާ ކަމަށެވެ.
"ވަކި އިތުރު ހިތްވަރެއް ނީންނާނެ. އެއީ އަޅުގަނޑުމެންގެ މައިގަނޑު ފޯކަސް އަކީ މާޒިޔާއާ ކުޅެގެން އެންމެ ބޮޑު ކާމިޔާބު ހޯދުމެއް ނޫން. އަޅުގަނޑުމެންގެ މި އޮތީ ގަދަ ހަޔަކަށް އެރުމުގެ ވިސްނުން. މީގެ ހަގީގަތަށް ވިސްނަންޖެހޭނީ. ހަގީގަތަކީ މާޒިޔާގައި މި ވަގުތު ރާއްޖޭގެ އެންމެ މޮޅެތި ކުޅުންތެރިން ތިބީ. ބޭރުގެ ވެސް އަގުބޮޑެތި މޮޅެތި ކުޅުންތެރިން. އެހެންވެ މާޒިޔާ ބަލިކުރުމަކީ ފަސޭހަކަމަކަށް ނުވާނެ. ދެން ކޮންމެ ބަޔަކު ވެސް ކޮންމެ މެޗަކަށް ވެސް އަރާނީ ކާމިޔާބެއް ހޯދޭތޯ. އެގޮތުގައި އަޅުގަނޑުމެން ވެސް ނުކުންނާނީ," ކުރިން އީގަލްސްއާ އެކު މާޒިޔާ އަތުން މި ސީޒަނުގެ ޗެރިޓީ ޝީލްޑް މެޗުން މޮޅުވި މޯހަން ބުންޏެވެ.
ކޮވިޑް-19ގެ ކޭސްތައް ގިނަވާތީ މިދިޔަ ފެބްރުއަރީ މަހު ތިން ވަނަ ދުވަހު ލީގު މެދުކަނޑާލުމަށް ފަހު މިދިޔަ މަހު 26 ވަނަ ދުވަހު ލީގު އަލުން ފެށި ފަހުން ސަސް ވަނީ ދެ މެޗު ކުޅެފަ އެވެ. އަލުން ލީގު ފެށި ފަހުން މާޒިޔާ ކުޅުނީ އެންމެ މެޗެކެވެ. މާޒިޔާގެ ކޯޗު ވިޑަކޮވިޗް ވަނީ މީގެ ސަސް އަށް އެޑްވާންޓޭޖް އޮވެދާނެ ކަމަށް ބުނެފަ އެވެ. އެކަމަކު މޯހަން އެކަމަށް އެއްބަހެއްނުވެ އެވެ.
"ދެން އެ ކޯޗަކަށް ދެއްތޯ އެ ކޯޗަކު ވިސްނާ ގޮތް އެނގޭނީ. އެކަމަކު މިހާ ކައިރިކައިރީގައި މެޗު ކުޅޭއިރު އޭގެ ޑިސެޑްވާންޓޭޖް ބޮޑީ. ހައެއްކަ ދުވަސް ލިބޭނަމަ އެއީ އެޑްވާންޓޭޖް. އެކަމަކު އެހާ ކައިރި ކައިރީގައި ދެ މެޗު ކުޅެފައި ތިން ވަނަ މެޗަށް ނުކުންނައިރު އޭގެ ޑިސެޑްވާންޓޭޖް ބޮޑު ކަމަށް އަޅުގަަނޑު ގަބޫލުކުރަނީ," މޯހަން ބުންޏެވެ.
ޓްރާންސްފާ މާކެޓްގައި ސަސް އިން ގެނައި ސްވިޑަންގެ ފޯވާޑް ޝްކޮޑްރަން މަހޯލީ އާއި މޮރޮކޯގެ މިޑްފީލްޑަރު އަޖްނާން މުހައްމަދު އެއްކޮށް ފިޓްވާން ދުވަސްތަކެއް ނަގާނެ ކަމަށް މޯހަން ވަނީ ބުނެފަ އެވެ. މާޒިޔާގެ ލޯން އެއްބަސްވުމެއްގެ ދަށުން ސަސްއާ ގުޅުނު އަބްދުالله ޖުނައިދު (ޖެންނޭ) އާއި މުޖުތާޒް މުހައްމަދު (މުޖޭ) އަށް މިރޭގެ މެޗުގައި ނުކުޅެވޭނެ އެވެ. އެއީ ސަސް އަށް އެ ދެ ކުޅުންތެރިން ދޫކޮށްލި ކޮންޓްރެކްޓްގައި އެ ގޮތަށް ހިމަނާފައިވާތީ އެވެ.
މާޒިޔާ އާއި ސަސް ކުޅޭ މެޗު ފަށާނީ މިރޭ 9 ޖަހާއިރު އެވެ.
