ސުކޫލު ދައުރުގައި ބޮޑެތި ކުރަހާފޮތް ގެންގުޅުނު ހަނދާންވޭ ހެއްޔެވެ؟ އޭގެ ގަނޑުތައް ވަކިވާތީ ފަތިކޮޅެއް ލައްވައިގެން ވެސް އުޅުނީމެއް ނޫން ހެއްޔެވެ؟ އެވާހަކަ އެ ހިސާބަށް ބާއްވަމާ ހިނގާށެވެ. މިވަގުތު ބަލައިލަން މިއުޅެނީ މިހާރު އެންމެ ނަގާކިޔާ "ޑިޖިޓަލް ކުރަހާފޮތްތަކަށެވެ". ވަކި ތަރުތީބަކުން ނޫނަސް ކޮންމެވެސް އެއްކޮޅަކުން ފަށަމާ ހިނގާށެވެ.
ވެކޮމް ސިންޓިކް 22
ޑިޖިޓަލް ކުރަހާފޮތަކުން ހިފަންޖެހޭ ބޭނުމާއި ލިބޭ އަގާ އެންމެ އެކަށޭކަމަށް ގިނަ ޑިޒައިނަރުންނާއި އުފެއްދުންތެރި ހުނަރުވެރީން އިއްތިފާގުވެ ބޯޖަހައިލާ އެއް "ކުރަހާފޮތަކީ" މި އެވެ. ފުލް އެޗްޑީ ސްކްރީނެއްގައި 19.5 ، 11.5 އިންޗީގެ ޖާގައެއްގައި ކުރަހައިލަން ލިބުމަކީ އޭގެ އެއް ސަބަބަށް ވެދާނެ އެވެ. ކުރަހާ އިރު ސްކްރީނުން އަޅާ ދަޅައިގެ އަލި ކުޑަކުރުމަށްޓަކައި "އެންޓި ގްލެއާ" ޓެކްނޮލޮޖީ ހިމަނައިގެން ފަރުމާކޮށްފައިވާ މި "ކުރަހާފޮތާއެކު" ލިބޭ ގަލަން، "ވެކޮމް ޕެން 2" އުފައްދައިފައި ވަނީ އޭގެ ތުނޑު ޓެބްލެޓްގައި ޖައްސައިލާ ބާރުމިން ނުވަތަ މަޑުމިން، 8000 އަށް ވުރެ ގިނަ ތަފާތު މިންގަޑަށް ދެނެގަތުމުގެ ކުޅަދާނަކަމާއެކުގަ އެވެ. ދުނިޔޭގެ ބާޒާރުގެ އަގުތަކަށް ބަލާއިރު މިވަގުތު މީގެ "ކުރަހާފޮތެއް" އަތުޖައްސައިލެވޭނީ 2000 އެއްހައި އެމެރިކާ ޑޮލަރަށެވެ.
އައިޕެޑް ޕްރޯ 12.9 (2020)
ކުރަހައިލަން ލިބޭ ޖާގަ (10:73 7.74 އިންޗި) ނިސްބަތުން މާ ބޮޑު ނޫން ނަމަވެސް، ޓެބްލެޓްގެ ރޭހުގައި އެންމެ ކުރީގައި އުޅޭ އެޕަލް އިން ނެރުނު 12.9 އިންޗީގެ އައިޕެޑް ޕްރޯ އަކީ މި ލިސްޓުގައި ނުހިމަނައި ދޫކޮށްލާވަރުގެ "ކުރަހާފޮތެއް" ނޫނެވެ. އެކަމަކު އޭ12ޒީ ބަޔޮކިން ޗިޕްސެޓާއި، ގްރެފިކް މަސައްކަތްތަކުގެ ދުވެލި ހަލުވިކުރުމަށް "8ކޯ ގްރެފިކް އިންޖީނެއް" ހިމަނައިފައިވާ މި ޑިވައިސް ހަގީގީ މާނައިގައި ކުރަހާފޮތަކަށް ވާނީ މިއާ އެކު ބޭނުންކުރަން އީޖާދުކޮށްފައިވާ "ފަންސުރު" ވެސް ހިމަނައިގެންނެވެ. ފަންސުރާއި ފޮތް ވަކިން ގަންނަން ޖެހުނު ނަމަވެސް، ޑިވައިސްގެ ހަލުވިކަމާއި، ފަންސުރުގައި ހިމަނައިފައިވާ ފީޗާތަކަށް ބަލާއިރު، ޑިޖިޓަލް ފަރުމާކުރުންތެރީންނާއި އުފެއްދުންތެރީންގެ މެދުގައި މި "ކުރަހާފޮތް" ވެސް ލައްކަ މަޝްހޫރެވެ. މީގެ ފޮތަކާއި ފަންސުރެއް މިހާރު ލިބޭނޭ ކަމަށް ބެލެވެނީ 1100 އެއްހައި އެމެރިކާ ޑޮލަރު އަތުގައި އޮވެގެންނެވެ.
އެކްސްޕީ ޕެން އާޓިސްޓް 15.6 (ޕެން ޑިސްޕްލޭ)
މި "ކުރަހާފޮތުގެ" އަޖުމަ ބެލި ގިނަބައެއްގެ ބަހުން ނަމަ މާ ގިނަ "މޮޅު" ފީޗާތަކެއް ހިމެނިފައި ނެތަސް މިއީ އަލަށް ކުރަހަން ފަށައިގަންނަ، "މާދަމާގެ ފަންނުވެރީންނަށާއި ހުނަރުވެރީނަށް" މަރެކެވެ. 13.54 7.62 އިންޗީގެ ޖާގައެއް ކުރަހައިލަން ލިބޭއިރު، ވިންޑޯސް ނުވަތަ މެކް އޯއެސް އާ އެކު ވެސް މި ފޮތް "ހުޅުވައިލެވިދާނެ އެވެ". އެއަށް ވުރެ ވެސް ހިތްގައިމު ކަމަކީ އަގެވެ. ކުރިން ފާހަގަކޮށްލި "ފޮތްފޮތާއި" ހިލާފަށް މީގެ "ފޮތެއް" 300 އެއްހައި ޑޮލަރަން ލިބިދާނެ އެވެ.
ހުއިއޮން H420 ކިޓް
ބައެއް މީހުންގެ ހިތަށް އަރައިފާނެ އެވެ. އަދި ހަމަ ފޮތަކާއި ފަންސުރެއް ލިބިގެން ކުރެހޭ ހެއްޔެވެ؟ އެ ސުވާލަށް ޖަވާބު ދޭން ހުއިއޮން އިން އޮތީ ތައްޔާރަށެވެ. މިއީ ގާތްގަނޑަކަށް 30 އެމެރިކާ ޑޮލަރަށް ލިބޭ ކިޓެކެވެ. ކުރަހާފޮތާއި، ފަންސުރާއި، އަތަށް ލައްވާ އަންގިއާއި މިހެން ގޮސް ސެޓު އެއްކޮށް ހަމަކޮށްލައިފަ އެވެ. އީބޭ، އަލީބާބާ، ނިއުއެގް ފަދަ އޮންލައިން ބާޒާރުތަކުން ބުނާ ގޮތުގައި މިއީ މިއަހަރު އެންމެ ގިނައިން މީހުން ގަނެ އެކި މީސްމީހުނަށް ހަދިޔާކުރި "ކުރަހާފޮތް" ކިޓެވެ.
އާބާދީ ކިތަންމެ ކަމީނާކޮށް އޮތް ނަމަވެސް ނިސްބަތުން ރާއްޖޭގައި ވެސް ކުރެހުމުގެ ފަންނުވެރީންނާއި ހުނަރުވެރީން "މަދެއްނޫނޭ" ބުނެވިދާ އެވެ. އަދަދުގެ އުންމީދަކީ މިފަދަ އާޓިކަލްތައް މެދުވެރިކޮށް އެކި ފަންނުތަކާއި ފަންނުވެރީނަށް ބޭނުންތެރި މައުލޫމާތުތައް ހަދިޔާކުރުމެވެ. މިހާރު އާޓިކަލް ކިޔައި ވެސް ނިމުނީ ނޫން ހެއްޔެވެ؟ ވީމާ، ޝައުގުވެރިކަން ހުރިނަމަ އަވަހަށް މިއިން "ފޮތެއް" ހޯދައިގެން ކުރަހަން ފަށާށެވެ. ނޫންނަމަ ކުރަހާހިތްވާ ކުއްޖަކަށް މި މައުލޫމާތު ހިއްސާކޮށްލާށެވެ.
