ޕާކުކޮށްފައިވާ މަތިންދާ ބޯޓެއްގައި 540 އެމެރިކާ ޑޮލަރު ހޭދަކޮށްގެން ފަސްޓް ކްލާސް ފެންވަރުގެ ކެއުމެއް ތަޖުރިބާ ކުރުމުގެ ހިދުމަތް ޖަޕާނުގެ އެންމެ ބޮޑު އެއާލައިނުން ދޭން ފަށައިފި އެވެ.
އޯލް ނިޕޯން އެއާވޭޒް (އޭއެންއޭ) އިން އިއްޔެ ދޭން ފެށި މި ހިދުމަތަށް ބޮޑު ތަރުހީބެއް ލިބެމުން ދާއިރު، ބުކިންތައް ފުރުމުގެ ސަބަބުން އޭޕްރިލް މަހުގެ ތެރޭގައި ސީޓުތައް އިތުރު ކުރަން މިހާރު ވަނީ ނިންމާފަ އެވެ.
ކޮވިޑުގެ ބަލިމަޑުކަމުގެ ސަބަބުން ވައިގެ ދަތުރުފަތުރަށް އަސަރުކޮށް ގިނަ ބޯޓުތަކެއް އުދުހުން ހުއްޓާލަން ޖެހުނެވެ. އެފަދަ ބޯޓުތައް ރަންވޭގައި ޕާކުކޮށްފައި ހުރިއިރު، އެ ތަކެއްޗާ މެދު އަމަލު ކުރާނެ ގޮތެއް ހޯދަން އެއާލައިންތަކުން ދަނީ މަސައްކަތް ކުރަމުންނެވެ.
އެގޮތުން އޮސްޓްރޭލިއާއިން ނިންމާފައިވަނީ އެތެރޭގެ އުދުހުންތައް ކުރިއަރުވަން އެއާލައިންތަކަށް ޖުމްލަ 1.2 ބިލިއަން އެމެރިކާ ޑޮލަރުގެ އެހީ ލިބޭނެ ޕްރޮގްރާމެއް ފަށައިގެން ބޯޓުތައް ބޭނުން ކުރުމަށެވެ.
ކޮވިޑުގެ ބަލިމަޑުގެކަމުގެ ސަބަބުން ދަތުރު ކުރުމުގައި ހުރި ދަތިތަކާއި ކަރަންޓީން ވާން ޖެހުން ފަދަ ކަންކަމާއެކު ވައިގެ ދަތުރުފަތުރުގެ ސިނާއަތަށް ވަނީ ކުރިން އަންދާޒާ ނުކުރާ ވަރުގެ ބޮޑު ގޮންޖެހުންތަކާ ކުރިމަތިލާން ޖެހިފަ އެވެ.
އެހެންކަމުން އެއާލައިންތަކުން ވިސްނަމުން ދަނީ އުދުހުން ހުއްޓާލަން ޖެހިފައިވާ ބޯޓުތައް އެހެން ސިފައެއްގައި ބޭނުންކޮށްގެން އާމްދަނީ ލިބޭނެ މަގުތައް ތަނަވަސް ކުރުމަށެވެ.
އެގޮތުން ބައެއް އެއާލައިންތަކުން ނިންމާފައިވަނީ ޕާކުކޮށްފައިވާ ބޯޓުތަކުގައި ރެސްޓޯރެންޓެއް ފަދައިން "އޮންބޯޑް ޑައިނިން" ހިދުމަތް ތައާރަފު ކުރުމަށެވެ. މިކަން އެންމެ ފުރަތަމަ ފަށާފައި ވަނީ ސިންގަޕޫރު އެއާލައިންސްއިންނެވެ.
މިދިޔަ އޮކްޓޯބަރު މަހު ސިންގަޕޫރު އެއާލައިންސްއިން ވަނީ އެ ގައުމުގެ މައި އެއާޕޯޓުގައި ޕާކުކޮށްފައި އޮތް އެއާބަސް އޭ380 ބޯޓެއްގައި 525 އެމެރިކާ ޑޮލަރު ހޭދަކޮށްގެން މެންދުރުގެ ކެއުމެއް ތަޖުރިބާ ކުރުމުގެ ފުރުސަތު ދީފަ އެވެ. އެކަން އިއުލާން ކުރުމާއެކު ފުރަތަމަ ދެ ދުވަހުގެ ސީޓުތައް އެންމެ ގަޑިއިރެއްގެ ތެރޭގައި ވިކި ހުސްވި އެވެ.
ސިންގަޕޫރު އެއާލައިންސްގެ ތަޖުރިބާއަށް ބިނާކޮށް ޖަޕާނުގެ އޭއެންއޭއިން ވެސް ނިންމީ ޓޯކިޔޯގެ ހަނޭޑާ އެއާޕޯޓުގައި ޕާކުކޮށްފައި އޮތް ބޮއިންގް 777 ބޯޓެއްގައި ކެއުމުގެ ހިދުމަތް ދިނުމަށެވެ.
އެ ބޯޓުގައި ފަސްޓް ކްލާސް ސީޓެއްގެ އަގު އުޅެނީ 541 އެމެރިކާ ޑޮލަރަށެވެ. އަދި ބިޒްނަސް ކްލާސް ސީޓެއްގެ އަގު އުޅެނީ 269 އެމެރިކާ ޑޮލަރަށެވެ.
މިދިޔަ ހަފްތާގައި ބްރިޓިޝް އެއާވޭޒް އިން ވެސް ވަނީ އެ އެއާލައިނުގެ ފަސްޓް ކްލާސް މެނޫއިން އޯޑަރު ކުރުމުން ގޭގެއަށް ޑެލިވާ ކުރުމުގެ ހިދުމަތް ފަށާފަ އެވެ. އެ މެނޫގައި ހިމެނޭ ކެއުމެއްގެ އަގު ފެށެނީ 110 ޑޮލަރުންނެވެ.
