ކޮވިޑް-19 އާ ގުޅިގެން ސަރުކާރުން ގެންނަން ހަވާލުކުރި ވެންޓިލޭޓަރުތައް ނުލިބުމުން ފައިސާ އަނބުރާ ހޯދުމަށް އެ މައްސަލަ ބައިނަލްއަގުވާމީ އާބިޓްރޭޝަނަށް ހުށަހެޅުމުގެ މަސައްކަތް ކުރަމުން އަންނަ ކަމަށް ސަރުކާރުން ބުނެފި އެވެ.
ދުބާއީގެ އެގްޒެކިއުޓާސްއާ 30.91 މިލިއަން ރުފިޔާ ހަވާލުކުރީ 75 ވެންޓިލޭޓަރު ހޯދުމަށެވެ. މީގެތެރެއިން ރާއްޖެއަށް ފޮނުވީ 15 ވެންޓިލޭޓަރެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުމުގައި އެ އޮފީހުގެ ތަރުޖަމާން މަބްރޫކް އަޒީޒު ވިދާޅުވީ ތަކުރާރުކޮށް މުއްދަތުތައް ދިނުމުން ވެސް ވެންޓިލޭޓަރުތައް ލިބިފައި ނުވާތީ އެޓާނީ ޖެނެރަލް ތައްޔާރުވަމުން މިހާރު އަންނަނީ ފައިސާ އަނބުރާ ހޯދުމަށް އާބިޓްރޭޝަނަށް އެ މައްސަލަ ހުށަހަޅަން ކަމަށެވެ. އެއްބަސްވުމުގައި ބުނާގޮތުން އެ މައްސަލަ ހުށަހަޅަން ޖެހެނީ އިންޓަނޭޝަނަލް ޓްރޭޑް ލޯއާ އެއްގޮތަށް ކަމަށާއި އެ އާބިޓްރޭޝަން ހިންގާނީ ރާއްޖޭގައި ކަމަށް ވެސް މަބްރޫކް ވިދާޅުވި އެވެ.
މަބްރޫކް ވިދާޅުވީ ފައިސާ އަނބުރާ ހޯދުމުގެ އިތުރުން އެ މައްސަލާގައި ޖިނާއީ ކުށެއް ވާނަމަ އެކަން ބަލައި ފިޔަވަޅު އަޅަން ވެސް ސަރުކާރުން ބޭނުންވާ ކަމަށެވެ.
"އަޅުގަނޑުމެންގެ ވިސްނުމަކީ އެ ފައިސާ އަނބުރާ ރާއްޖެއަށް ހޯދުން. އަދިހަމަ އެއާއެކީގައި މީގައި ކްރިމިނަލް އެލިމެންޓެއް ހިމެނޭނަމަ ޖިނާއީ ތަހުގީގެއް ކުރަން. އެ ކަން ކުރުމަށް ކުރަން ޖެހޭ މަސައްކަތްތައް ކުރަން ވާނެ. މިކަމުގައި އެއްވެސް މީހަކު ޝާމިލް ވެފައިވާނަމަ އެއީ ދިވެއްސެއް ވިޔަސް ނޫން ވިޔަސް އެ މީހަކާ ދޭތެރޭ ފިޔަވަޅު އެޅުމަށް އަޅުގަނޑުމެން ބޭނުން،" މަބްރޫކް ވިދާޅުވި އެވެ.
އަނބުރާ ފައިސާ ހޯދުމުގެ މައްސަލަ ދިވެހި ސަރުކާރާ އެއްކޮޅަށް ނިމިއްޖެނަމަ ބައިނަލްއަގުވާމީ ޓްރީޓީތަކުން މަސައްކަތްތަކެއް ކުރެވޭނެ ކަމަށް ވެސް މަބްރޫކް ވިދާޅުވި އެވެ.
މައްސަލާގައި އެންޓި ކޮރަޕްޝަން ކޮމިޝަން (އޭސީސީ)އިން އެދުނީ، އޭރުގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ 11 މުވައްޒަފެއްގެ މައްޗަށް ދައުވާ އުފުލުމަށެވެ. އެ މީހުންގެ ދައުވާ ކުރެވޭ މިންވަރަށް ހެކި ނެތް ކަމަށް ބުނެ އެންމެ ފުރަތަމަ ވެސް ޕީޖީއިން މައްސަލަ އަނބުރާ ފޮނުވާލިއިރު މައްސަލަ ރިވިއުކޮށް ދިނުމަށް އޭސީސީއިން އެދުނު ނަމަވެސް ދައުވާއެއް ސާބިތު ކުރެވޭ މިންވަރަށް އުންސުރުތައް ނެތް ކަމަށް ބުނެ މައްސަލަ އަނެއްކާވެސް ވަނީ އޭސީސީއަށް އަނބުރާ ފޮނުވާފަ އެވެ.
އެކަމާ ގުޅިގެން އޭސީސީގެ ހިތްހަމަނުޖެހުން އަނެއްކާވެސް އައުމާއި ރައްޔިތުންގެ ކަންބޮޑުވުން އޮތުމުން ޕީޖީން ވަނީ އެ މައްސަލަ އަނެއްކާ ވެސް ރިވިއު ކުރަން ނިންމާފަ އެވެ.
ތިންވަނަ ފަހަރަށް އޭސީސީއިން މައްސަލަ ރިވިއު ކުރަން ހުށަހެޅީ އާ ހެކިތަކެއް ނެތި އެވެ. ނަމަވެސް ޕީޖީއިން ބުނީ ފުލުހުންގެ އެހީތެރިކަން ހޯދުމަށް އޭސީސީއަށް އަންގައި ދެން ހިންގާ ތަހުގީގަށްފަހު، މައްސަލަ އަލުން ޕީޖީއިން ރިވިއު ކުރާނީ އަލަށް ހޯދޭ ހެކިތަކުގެ މައްޗަށް ކަމަށެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފާއެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
