ޓެކްނޯ ސާފް ޗެމްޕިއަންޝިޕް 2026 ގައި މިއަދުގެ މެޗުގައި ރާއްޖެއާ ދެކޮޅަށް ނުކުންނައިރު، ޕާކިސްތާނުން އެ ޓީމުގެ މުހިންމު ގިނަ ކުޅުންތެރިންތަކެއްގެ ރިލީސް އަވަހަށް ހޯދަން ކުރި މަސައްކަތް އަދިވެސް ކޮޅެއްގައި ނުޖެހެ އެވެ.
މިދިޔަ ބުރާސްފަތި ދުވަހު ބަންގްލަދޭޝްގެ ވެރި ރަށް ޑާކާގައި ފެށި ސާފް ޗެމްޕިއަންޝިޕްގެ 15 ވަނަ މުބާރާތުގައި ޕާކިސްތާނުން ކުޅުނު ފުރަތަމަ މެޗުގައި ބައްދަލުކުރީ އިންޑިއާއާ އެވެ. އެންމެ ފަހުގެ ޗެމްޕިއަން، އިންޑިއާ އަތުން ޕާކިސްތާން ބަލިވީ 3-2 އިންނެވެ.
މި ފަހަރުގެ ސާފް ޗެމްޕިއަންޝިޕްގެ ފުރަތަަމަ މެޗުތައް އޮތީ ފީފާ ބްރޭކްގައި ނޫން ކަމަށްވާތީވެ، ގިނަ ކްލަބްތަކަކުން އަދި ކުޅުންތެރިން ގައުމީ ޓީމަށް ރިލީސްކޮށްފައެއް ނުވެ އެވެ. ފީފާ ބްރޭކް އޮތީ ނޮވެމްބަރު 9-17 އަށް ކަމަށްވާއިރު، ޔޫރަޕްގެ ގިނަ ކްލަބްތަކަށް ކުޅޭ ކުޅުންތެރިންގެ ރިލީސްގެ ކަންކަން ފެށެނީ މާދަމާ އެވެ.
މިދިޔަ ޖޫން މަހު މާލޭގައި ބޭއްވި ޑައިމަންޑް ޖުބިލީ ފުޓްބޯޅަ މުބާރާތުގައި ޕާކިސްތާނަށް ޗެމްޕިއަންކަން ހޯދައިދިން ޓީމުގައި މުހިންމު ދައުރެއް އަދާކުރި ކުޅުންތެރިން އަދި ޓީމާ ނުގުޅެ އެވެ. ޓީމުގެ ކެޕްޓަން، އަބްދުﷲ އިގުބާލް އާއި މުހިންމު ޑިފެންޑަރު، އީސާ ސުލައިމާންގެ އިތުރުން އާދިލް ނަބީ، އޯޓީސް ހާން، އަބްދުލް ސަމަދު އަދި މުހައްމަދު ފަޒަލް ފަދަ ކުޅުންތެރިންނެވެ. އެ ކުޅުންތެރިންގެ ކަންކަން ވީ އެންމެ އަވަހަށް ހަމަޖެއްސޭތޯ ޕާކިސްތާނުން ދުވަހުން ދުވަހަށް މަސައްކަތް ކުރަމުން އައި ނަމަވެސް އަދިވެސް އޭގެ ނަތީޖާ އަކާ ހަމައަށް ނުދެވޭ ކަމަށް ޕާކިސްތާންގެ ނޫސްތަކުން ވަނީ ރިޕޯޓްކޮށްފަ އެވެ.
ޑައިމަންޑް ޖުބިލީ ފުޓްބޯޅަ މުބާރާތުގައި ޕާކިސްތާނުން ވަނީ 3-0 އިން ރާއްޖެ ބަލިކޮށްފަ އެވެ. މިއީ، 1991 ވަނަ އަހަރުގެ ސާފް ގޭމްސް ފައިނަލަށް ފަހު، ޕާކިސްތާނަށް ރާއްޖެ ބަލިކުރެވުނު ފުރަތަމަ ފަހަރެވެ. އަދި، ރާއްޖޭގައި ކުޅެގެން މުޅިން އަލަށް ޕާކިސްތާނަށް ރާއްޖެ ބަލިކުރެވުނުއިރު، މިއީ، 2023 ވަނަ އަހަރުގެ އޮކްޓޫބަރުގެ ފަހުން ޕާކިސްތާން މެޗަކުން މޮޅުވި ފުރަތަމަ ފަހަރެވެ.
ރާއްޖޭން މި ފަހަރުގެ ސާފް ޗެމްޕިއަންޝިޕްގެ ފުރަތަމަ މެޗަށް ނުކުންނައިރު، މި ފަހަރުގެ މުބާރާތުގައި ޓީމުގެ މުހިންމު ކުޅުންތެރިންތަކަކަށް އަނިޔާގެ ސަބަބުން ނުކުޅެވެ އެވެ. ގޯލްކީޕަރު، މުހައްމަދު ފައިސަލް، ހަމްޒާ މުހައްމަދު (ހަމްޕު)، ހައިޝަމް ހަސަން (ބިޑި) އަދި މުހައްމަދު އިލާން އިމްރާން ފަދަ ކުޅުންތެރިންނަށް މި ފަހަރުގެ މުބާރާތް ގެއްލުނީ އަނިޔާއާ ހެދި އެވެ.
މުޅިން އަލަށް ސާފް ޗެމްޕިއަންޝިޕެއްގައި ކުޅޭނެ 11 ކުޅުންތެރިންްނާ އެކު އޮތް ރާއްޖޭގެ ސްކޮޑުގައި މި ފަހުން ގައުމީ ޓީމާ އެކު ގިނަ މެޗުތަކެއް ކުޅެފައިވާ ކުޅުންތެރިން ހިމެނެ އެވެ. އަދި، މި އަހަރަކީ ރާއްޖޭގެ ގައުމީ ފުޓްބޯޅަ ޓީމުން ގިނަ މެޗުތަކެއް ކުޅުނު އަހަރެއް ކަމަށްވާއިރު، ސާފް ޗެމްޕިއަންޝިޕާ ކުރިމަތިލާނީ ކުޅުންތެރިން ރަނގަޅު ރޫހެއްގައި ތިބެ އެވެ.
ގައުމީ ފުޓްބޯޅަ ޓީމުގެ ކޯޗަކަށް ހުރި ހަންގޭރީގެ އިސްތަވާން އުރްބާނީ މީގެ ކުރިން ތިން ސާފް ޗެމްޕިއަންޝިޕެއްގައި ރާއްޖެ އަށް އިރުޝާދުދީ، އެއް ފަހަރު ފައިނަލުގައި ކުޅެ، ދެ ފަހަރު ސެމީ އަށް ވަނީ ދަތުރުކޮށްފަ އެވެ. އެކަމަކު، އެންމެ ފަހުން، 2023 ވަނަ އަހަރުގެ ސާފް ޗެމްޕިއަންޝިޕްގައި، އިޓަލީގެ ކޯޗު، ފްރެންޗެސްކޯ މޮރިއޭރޯގެ އިރުޝާދުގެ ދަށުން ކުޅެ ރާއްޖެ ގްރޫޕް ސްޓޭޖުން ކަޓާފައި އޮތުމަކީ މި ފަހަރުގެ މުބާރާތުގައި ރާއްޖޭން ނަތީޖާ ނެރެ، ސަރަހައްދުގެ ފުޓްބޯޅައިގައި ކުރިއަށް ދިއުމަށް މުހިންމު ކަމެކެވެ.
ޓެކްނޯ ސާފް ޗެމްޕިއަންޝިޕް 2026ގެ ދެ ވަނަ މެޗު ދުވަހު، ޑާކާ ނެޝަނަލް ސްޓޭޑިއަމްގައި ޕާކިސްތާނާއި ރާއްޖެ ކުޅޭ މެޗު ފަށާނީ މިއަދު 14:30 ގަ އެވެ.
