މިއުނިކް (ނޮވެމްބަރު 7) - ޖަރުމަނު ލީގުގައި މިރޭ ބޮރޫޝިއާ ޑޯޓްމަންޑް ކުޅުނު މެޗުން މޮޅުވި ކަމުގައި ވިޔަސް މައިންޒް އަތުން 2-1 އިން މޮޅުވެ، ބަޔާން މިއުނިކުން ލީގު ތާވަލުގެ އެއް ވަނަ މަގާމު ދަމަހައްޓައިފި އެވެ.
ދެ ވަނައިގައި އޮތް ޑޯޓްމަންޑުން ވަނީ އަމިއްލަ ދަނޑުގައި ކުޅުނު މެޗުން އެލްވާސްބާގު އަތުން 2-1 އިން ކުރިހޯދައިފަ އެވެ.
އެއް ވަނައިގައި އޮތް ބަޔާނާއި ދެ ވަނައިގައި އޮތް ޑޯޓްމަންޑަށް ވަނީ ނުވަ މެޗުން 21 ޕޮއިންޓް ލިބިފަ އެވެ. ތިން ވަނައިގައި އޮތް އާރްބީ ލައިޕްޒިިގަށް ވަނީ ނުވަ މެޗުން 18 ޕޮއިންޓް ލިބިފަ އެވެ. ހަތަރެއްގައި އޮތް ފްރެއިބާގަށް އަށް މެޗުން ލިބިފައިވަނީ 16 ޕޮއިންޓެވެ.
ރަށުންބޭރުގައި ކުޅުނު ބަޔާނުން ލީޑުނެގީ 14 ވަނަ މިނިޓްގަ އެެވެ. ބަޔާނާ އެކު ހަދާފައިވާ ކޮންޓްރެކްޓް 2029 އަށް އާ ކުރިތާ ދެތިން ދުވަހެއް ފަހުން ކޭން މިރޭގެ މެޗުގައި ރަނގަޅު ކުޅުމެއް ދެއްކިއިރު، ބަޔާނުން ޖެހި ދެ ގޯލަށް ވެސް ފުރުސަތު ތަނަވަސްކޮށްދިނީ ކޭން އެވެ. އެ ގޮތުން، ފުރަތަމަ ލަނޑު ޖެހި ޔޯސުއާ ކިމިކް ވަނީ ކޭން ދިން ބޯޅައެއް އޭރިއާބޭރުން ގޯލުގެ މަތީ ކަނަށް ވައްދާލައިފަ އެވެ.
މައިންޒަށް އެއްވަރުކޮށްދޭން ލީ ޖައެ ސުން ފޮނުވާލި ބޯޅައެއް ގޯލަށް ވަން ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށެެވެ. އަދި، އެ ގޯލު ޖަހަން ދިމާވި ކަންތައްތަކުގެ ތެރޭގައި ބަޔާންގެ ކީޕަރު މެނުއަލް ނޯޔާ އަށް އަނިޔާވެ ފަހުން ބަދަލުކުރަން ޖެހުނެވެ.
މެޗުގެ 57 ވަނަ މިނިޓްގައި ކޭން ދިން ބޯޅަައެއް ހަނި އޭންގަލުން ގޯލަށް ވައްދާލައިގެން ބަޔާންގެ ދެ ވަނަ ލަނޑު ޖެހީ މި ވަގުތު ރަނގަޅު ފޯމެއްގައި ކުޅެމުން އަންނަ ލެނާޓް ކާލް އެވެ.
މައިންޒް އިން މި މެޗުގައި ޖެހި ހަމައެކަނި ގޯލު ކާމިޔާބުކުރީ މެޗުގެ އިތުރު ވަގުތުގަ އެވެ، މި ލަނޑު ޖެހީ، ބެނެޑިކްޓް ހޮލެބަޗްގެ ހުރަހަކުން ފިލިޕް ޓިއެޓްޒް ބޮލުންނެވެ.
