ބަންގްލަދޭޝްގައި މިއަދު ފެށި، "ޓެކްނޯ ސާފް ޗެމްޕިއަންޝިޕް 2026" ގައި ކުޅުނު ފުރަތަމަ މެޗުގައި އެންމެ ފަހުން ދެ ފަހަރުގެ ޗެމްޕިއަން، އިންޑިއާ އިން ޕާކިސްތާންގެ މައްޗަށް 3-2 އިން ކުރިހޯދައިފި އެވެ.
މި ފަހަރުގެ މުބާރާތުގައި މި ދެ ޓީމުގެ އިތުރުން މި ގްރޫޕްގައި ހިމެނެނީ ރާއްޖެ އެވެ. ދެން، މި ގްރޫޕްގައި ކުޅޭ މެޗުގައި ޕާކިސްތާނުން ކުޅޭނީ ރާއްޖެއާ އެވެ. މިއަދުގެ މެޗުން މޮޅުވުމުން، އިންޑިއާ އަށް ވަނީ ސެމީ ފައިނަލުގެ ޖާގައެއްގެ ފުރުސަތު ބޮޑުވެފަ އެވެ.
ފީފާ ބްރޭކުގެ ކުރިން ސާފް ޗެމްޕިއަންޝިޕް ފަށާތީ އާއި އިންޑިއާގެ ސީނިއާ ޓީމު މި މަހު ނިއު ޒީލެންޑާ ދެކޮޅަށް ކުޅޭ ދެ މެޗަށް އެ ގައުމަށް ދާތީވެ، އިންޑިއާ އިން ސާފް ޗެމްޕިއަންޝިޕަށް ފޮނުވީ ދެ ވަނަ ފަންތީގެ ޓީމެކެވެ. ތޭވީސް އަހަރުގެ ކުޅުންތެރިން ވެސް ގިނައިން ހިމެނޭ ގޮތަށް އިންޑިއާ އިން މި ފަހަރުގެ ސާފް ޗެމްޕިއަންޝިޕަށް ސްކޮޑު އެކުލަވާލިއިރު، ގައުމީ ޓީމާ އެކު މުބާރާތެއްގައި ފުރަތަމަ ފަހަރަށް ކުޅޭ ކުޅުންތެރިން ވެސް ހިމެނެ އެވެ.
އަނެއްކޮޅުން، ޕާކިސްތާން ޓީމުގައި ހިމެނޭ ޔޫރަޕް ކްލަބްތަކުގައި ކުޅޭ ކުޅުންތެރިންނަށް އެ ޓީމުތަކުން ރިލީސް ނުދޭތީވެ، އަދި ޓީމާ ނުގުޅެ އެވެ. އެހެންވެ، މިއަދުގެ މެޗުގައި އެ ޓީމަށް ގިނަ މައްސަލަތަކެއް ކުރިމަތިވި އެވެ.
ބަންގްލަދޭޝްގެ ގައުމީ ސްޓޭޑިއަމް (ކުރީގެ ބަންގުބަންދު ސްޓޭޑިއަމް)ގައި މިއަދުގެ މެޗުގެ ފުރަތަމަ 18 މިިނިޓް ތެރޭ އިންޑިއާ އިން ދެ ގޯލުގެ ލީޑެއްނެގި އެވެ. މެޗުގެ ނުވަ ވަނަ މިނިޓްގައި އިންޑިއާގެ ސުހައިލް ބަޓް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެކަމަކު، އެ ބޯޅަ އަށް އެރިއިރު، ސުހެއިލް ހުރީ އޮފްސައިޑް މަގާމެއްގައެއް ނޫނެވެ. އޭނާ ޖެހި ރަނގަޅު ގޯލެއް ބަލައިނުގަތްތާ، ދެ މިނިޓް ފަހުން ދެން ލިބުނު ފުރުސަތުގައި ގޯލު ޖަހައި ސުހެއިލް ވަނީ އިންޑިއާ އަށް ލީޑުނަގައިދީފަ އެވެ. އޭނާ މި ލަނޑު ޖެހީ މުހައްމަދު ސުހެއިލް ނަގައިދިން ހުރަހަކުންނެވެ.
މެޗުގެ 18 ވަނަ މިނިޓްގައި އިންޑިއާގެ ދެ ވަނަ ލަނޑު ޖެހީ ވެސް ފުރަތަމަ ގޯލު ޖެހި ސުހެއިލް އެވެ. މިއީ، އިންޑިއާގެ މިޑްފީލްޑަރު، އަބިޝޭކް ސޫރްޔަވަންޝީ ދިން ބޯޅައަކަށް އޭރިއާތެރެއިން އަރައި ސުހެއިލް، ހަމަޖެހިލައިފައި ޖެހި ގޯލެކެވެ.
ޕާކިސްތާނުން ވިއްސަކަށް މިނިޓަށް ފަހު މެޗުގެ ތެރެއަށް ވަދެ، ރަނގަޅު ކުޅުމެއް ދައްކަން ފެށި އެވެ. އެކަމަކު، ދެން ވެސް މެޗުގައި ލަނޑު ޖެހީ އިންޑިއާ އިންނެވެ. މެޗުގެ 32 ވަނަ މިނިޓްގައި ނައުފަލް ޕީއެން ދިން ރަނގަޅު ބޯޅައަކަށް އޭރިއާތެރެއަށް އަރައި މި ލަނޑު ޖެހީ މަގްލެންގްތަން ކިޕްގެން އެވެ.
މެޗުގެ ތެރެއަށް އަލުން ވަންނަން ޕާކިސްތާނަށް ލިބުނު ރަނުގެ ފުރުސަތެއް އެ ޓީމުން ނަގާލި އެެވެ. އިންޑިއާގެ އޭރިއާތެރެއިން އަބިޝޭކް ބޯޅަ ހޯދަން އުޅުމުގެ ތެރޭގައި ޕާކިސްތާންގެ ހައްޔާން ކަޓަކަށް ކުރި ފައުލަކަށް ރެފްރީ ދިން ޕެނަލްޓީން ޝާޔަކް ދޯސްތު ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.
އިންޑިއާ އަށް ހަތަރު ވަނަ ލަނޑެއް ޖަހައިދޭން ކިޕްގެން ފޮނުވާލި ޝޮޓް ޕާކިސްތާންގެ ކީޕަރު ޔޫސުފް އިޖާޒް ބަޓް ވަނީ މަތަކޮށްފަ އެވެ.
ޕާކިސްތާނުން ލަނޑެއް ޖަހަން ކުރި މަސައްކަތް ފުރަތަމަ ކާމިޔާބުވީ އިތުރު ވަގުތުގެ ފުރަތަަމަ މިިނިޓްގަ އެެވެ. ބަދަލަކަށް ކުޅެން އެރި އާދިލް ނާބީ ވަނީ ލިބުނު ފުރުސަތުގައި ބޮލުން ގޯލަށް ބޯޅަ ފޮނުވާލައިފަ އެވެ. އޭގެ ޖެހިގެން އައި މިނިޓްގައި އަލަމްގީރު އަލީ ހާން ވަނީ އެކްރަބެޓިކް ކިކަކުން ޕާކިސްތާންގެ ދެ ވަނަ ގޯލު ޖެހި އެވެ.
އިންޑިއާ އިން 2023 ވަނަ އަހަރު ބެންގަލޫރުގައި ބޭއްވި ސާފް ޗެމްޕިއަންޝިޕްގެ ތަށި އުފުލާލިއިރު، މުބާރާތުގެ ފުރަތަމަ މެޗުގައި 4-0 އިން ޕާކިސްތާން އަތުން މޮޅުވި އެވެ.
މި ފަހަރުގެ މުބާރާތުގައި މި ގްރޫޕްގައި ކުޅޭ މެޗުގައި ޕާކިސްތާނުން ކުޅޭނީ ރާއްޖެއާ އެވެ.
