ޗައިނާ އިންޓަނޭޝަނަލް ފުޓްސަލް މުބާރާތުގައި، ރާއްޖޭގެ ގައުމީ ފުޓްސަލް ޓީމުން ވާދަކުރާއިރު، އިންޑޯ ދަނޑެއްގައި ޕްރެކްޓިސް މަދުވުމުގެ ސަބަބުން ކުރިމަތިވާ ގޮންޖެހުންތައް ހުންނާނެ ކަމަށާއި އެކަމަކު އެ އަށް ނުބަލައި ރަނގަޅު ވިސްނުމެއްގައި ތިބެގެން މުބާރާތަށް ނުކުންނާނެ ކަމަށް ގައުމީ ފުޓްސަލް ޓީމުގެ ކެޕްޓަން، މުހައްމަދު އިމްރާން (އިންމި) ބުނެފި އެވެ.
ޗައިނާ އިން ދިން ދައުވަތެއްގައި ރާއްޖޭން ވާދަކުރާ މި މުބާރާތުގައި މި ދެ ގައުމުގެ އިތުރުން، ދެން ހިމެނެނީ، ދެކުނު ކޮރެއާ އާއި ހޮންގް ކޮންގް އެވެ.
ގައުމީ ފުޓްސަލް ޓީމުން ސާފް ޗެމްޕިއަންޝިޕަށް ތައްޔާރުވާން މާލޭގައި ޕްރެކްޓިސް ކުރިއިރު ވެސް އިންޑޯ އެއް ނުލިބެ އެވެ. އެކަމަކު، ތައިލެންޑަށް މުބާރާތަށް ދިއުމުގެ ކުރިން، 10 ވަރަކަށް ދުވަސް ޗައިނާގައި އިންޑޯއެއްގައި ޓްރެއިނިން ކުރިއަށްގެންދަން ފުރުސަތު ލިބި އޭގެ ތަފާތު ދެއްކި އެވެ. މި ފަހަރު، ޗައިނާ މުބާރާތަށް މާލޭގައި އިންޑޯއެއްގައި ޓްރެއިނިން ކުރިއަށްގެންދަން ކުރި މަސައްކަތް ކާމިޔާބެއްނުވި އެވެ. މުބާރާތުގެ ކުރިން ޗައިނާ އަށް ދިއުމަށް ފަހު، ރާއްޖެ އަށް މުބާރާތުގެ ކުރިން އިންޑޯގައި ކުރަން ލިބެނީ ދެ ޕްރެކްޓިހެވެ.
ގައުމީ ފުޓްސަލް ޓީމަށް ޗައިނާ އާއި ހޮންގް ކޮންގް އަދި ދެކުނު ކޮރެއާ އަށް "ފައިޓެއް" ދެވޭނެ
ޗައިނާގައި ބާއްވާ އިންޓަނޭޝަނަލް ފުޓްސަލް މުބާރާތުގައި ވާދަކުރާ ވަރުގަދަ ޓީމުތަކާ ދެކޮޅަށް ރާއްޖޭގެ ގައުމީ ޓީމުން ރަނގަޅު ކުޅުމެއް ދައްކައި، ނަތީޖާ ނެރެވޭނެ ކަމަށް އެސިސްޓަންޓް ކޯޗު ފުހެއިދު (ޓޯޑް) ބުނެފި. ގައުމީ ކޯޗު، ފާރޫކް ޒަކީރޯވް ޕްލޭނާ އެއްގޮތަށް ތައްޔާރުވެފައިވާ މި ޓީމަކީ މިއަހަރުގެ ސާފް ފުޓްސަލް މުބާރާތުގެ ޗެމްޕިއަންކަން ހޯދާފައިވާ ޓީމު.
"އޭގެ އުނދަގޫ އޭޒް ޔޫޝުއަލް (އިންޑޯއެއް ނެތުމުގެ އުނދަގޫ ކުރިއެކޭ އެއްގޮތަށް) ކުރާނެ ކަމަށް މި ބަލަނީ. ގިނަ ކުޅުންތެރިންތަކެއް އިންޑޯގައި ކުޅެފައި ހުރިކަން އެއީ ލިބޭ އެޑްވާންޓޭޖެއް މި ސިޓުއޭޝަން އަށް ބަލާއިރު، އެކަމަކު ވެސް ކުދިކުދި އުނދަގޫތަކެއް އަންނާނެ. އެ އަށް ނުބަލައި ހަމަ ޓީމު ޕްރެޕެއާ ވެފައި މިހާރު މި އޮތީ،" ރާއްޖޭގައި ކުރިއަށްގެންދިޔަ އެންމެ ފަހު ޓްރެއިނިން ސެޝަން އަށް ފަހު، "އަދަދު ސްޕޯޓްސް" އަށް އިންމި ބުންޏެވެ.
ޗައިނާ އިންޓަނޭޝަނަލް މުބާާރާތުގައި، ރާއްޖޭން ފުރަތަމަ މެޗުގައި އަންނަ ބުރާސްފަތި ދުވަހު ކުޅޭނީ ދެކުނު ކޮރެއާއާ އެވެ. ދެ ވަނަ މެޗުގައި މި މަހު ހަތް ވަނަ ދުވަހު ހޮންގް ކޮންގްއާ އެވެ. އަދި، ފަހު މެޗުގައި މި މަހު ނުވަ ވަނަ ދުވަހު ޗައިނާއާ ބައްދަލުކުރާނެ އެވެ.
އެފްއޭއެމް އެވޯޑްސްގައި ހޮވި ރާއްޖޭގެ އެންމެ މޮޅު ފުޓްސަލް ކުޅުންތެރިއަކަށް ހޮވުުނު އިންމި ބުނީ، ސާފް ޗެމްޕިއަންޝިޕަށް ތައްޔާރުވި މިންވަރާ އަޅާކިޔާއިރު އެ ވަރަށް މި ފަހަރުގެ ޗައިނާ މުބާރާތަށް ފަރިތަނުކުރެވޭ ކަމަށާއި އެހެން ނަމަވެސް އުންމީދު އެބައޮތް ކަަމަށެވެ.
"ދެން، މިހާރު ސާފް ޗެމްޕިއަންޝިޕްގެ ޕްރެޕަރޭޝަން އާ އަޅާބަލާއިރު އެ ވަރަކަށް ރެޑީއެއް ނުވެވޭ. ދެން، އެކަމު ވެސް މިހާރު ހުރިވަރުން، ދެން ކޯޗު ވެސް މި ކޮޅުގައި (މާލޭގައި ޓްރެއިނިން ކުރިއަށްގެންދަން) ނެތީމައާ އެއްކޮށް، ކުދިކުދި އުނދަގޫތައް އެބަހުރި. ދެން، ހުރިހާ ގޮތަކުން ބަލާއިރު ވެވުނު އެންމެ ބޮޑަށް ރެޑީވެފައި މި އޮތީ،" އިންމި ބުންޏެވެ.
މިއީ، މި އަހަރުގެ ޖެނުއަރީ މަހު ތައިލެންޑްގައި ބޭއްވި ސާފް ފުޓްސަލް ޗެމްޕިއަންޝިޕްގެ ތަށި ހޯދި ފަހުން ގައުމީ ޓީމުން ކުޅޭނެ ފުރަތަމަ މުބާރާތެވެ. ރާއްޖޭން ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހޯދީ ސަރަހައްދުގެ ހަ ގައުމު ވެސް ބަލިކޮށްފަ އެވެ. އިންމި ބުނީ، ޗައިނާ މުބާރާތުގައި ކުޅެން ޖެހޭ ޓީމުތައް ސާފްގައި ކުޅުނު ޓީމުތަކަށް ވުރެން ވަރުގަދަވާނެކަން ގަބޫލުކުރާ ކަމަށެވެ.
"ވަރަށް ސްޓްރޯންގް ޓީމުތަކެއްކަން ގަބޫލުކުރެވޭ. އެކަމަކު ވެސް ތި ބުނިހެން، ޗައިނާ ކޭމްޕްގައި ޗައިނާއާ ކުޅެލިއިރުގައި ރަނގަޅު ފައިޓެއް ދީފައި އޮތީ. އެހެންވީމަ އެ ޔަގީންކަން އެބައޮތް މި ޓީމު ތެރޭގައި. އެހެންވީމަ މި ބަލަނީ ރަނގަޅު ފައިޓެއް މި ޓީމުތަކާ އެއްކޮށް ދެވޭނެ ކަމަށް،" އިންމި ބުންޏެވެ.
ގައުމީ ޓީމުން ޗައިނާ މުބާރާތަށް ތައްޔާރީތައް ކުރިއަށްގެންދިޔައީ، އުޒްބެކިސްތާންގެ ކޯޗު ފާރޫކް ޒަކީރޯވްގެ ޕްލޭނަށް، އެސިސްޓަންޓް ކޯޗުން ކަމަށްވާ މުހައްމަދު ފުހެއިދު (ޓޯޑް) އާއި އަހުމަދު ނިޔާޒް (ނިޔާ)ގެ ބެލުމުގެ ދަށުންނެވެ.
