އިދިކޮޅު އެމްޑީޕީގެ އަސާސީ ގަވާއިދަށް ހުށަހަޅާފައިވާ އިސްލާހުތައް އެ ޕާޓީގެ ކޮންގްރެސް އިން މިއަދު ފާސްކޮށްފި އެވެ.
އެމްޑީޕީގެ އަސާސީ ގަވާއިދަށް ގެނައި އިސްލާހުތައް ފާސްވުމުން، ޕާޓީގެ އަސާސީ ގަވާއިދުގެ މައިގަނޑު ބައިތައް ބަދަލުވީ އެވެ. އެ އިސްލާހުތައް ހުށަހެޅުއްވީ ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލް އެވެ.
މިއަދު ގެނައި އިސްލާހުތަކުގެ ތެރޭގައި ހިމެނޭ އެންމެ މުހިންމު ބަދަލަކީ ޕާޓީގެ ރައީސްގެ މަގާމު އުވާލައި، ޕާޓީގެ އެންމެ އިސް ފަރާތަކީ ޕާޓީގެ ޗެއާޕާސަންއަށް ހެދުމެވެ. އަދި ޕާޓީގެ އެތެރޭގެ އިންތިހާބުގައި ވޯޓު ލުމަށްޓަކައި ވަކި މުއްދަތެއް ފުރިހަމަ ކުރަންޖެހޭ ގޮތަށް ބަދަލު ކުރުމަކީ ވެސް މިއަދު ގެނައި ބޮޑު ބަދަލެކެވެ.
އެމްޑީޕީގެ އަސާސީ ގަވާއިދަށް ގެނައި ބައެއް އިސްލާހުތައް
- ޕާޓީގެ ރައީސްގެ މަގާމު އުވާލައި ޗެއާޕަސަންއަކީ އެންމެ އިސް މަގާމަށް ހެދުން
- ނައިބު ރައީސުންގެ އަދަދު ތިނަކަށް އިތުރުކޮށް އޭގެ ތެރެއިން އެކަކީ އަންހެން މެންބަރަކަށް ހެދުން
- ޕްރައިމަރީގައި ވޯޓު ލެވޭނީ މެންބަރުންގެ ދަފްތަރުގައި ހިމެނި ތިން މަސްދުވަސް ހަމަވުމުން
- ކޮންގްރެސް އަސް ޑަބްލިއުޑީސީ މެންބަރުން ، އަންހެނުންގެ ރޫހުގެ ހިންގާ ކޮމެޓީގެ މެންބަރުން އިތުރުންކުރުން
- ކޮންގްރެސް ޑެލިގޭޓުން ތައާރަފް ކުރުން
- ޕާޓީގެ މެންބަރަކު ރައީސުލްޖުމްހޫރިއްޔާގެ މަގާމަށް ހޮވިއްޖެ ނަމަ ސިޔާސަތުތައް ކަނޑައަޅާއިރު ގައުމީ މަޖިލީހުގެ މަޝްވަރާ ހޯދުން ލާޒިމްވުން
- ރައީސުލްޖުމްހޫރިއްޔާގެ ހާއްސަ މުޝީރަކަށް ޗެއާޕާސަން އައްޔަން ކުރުން މަޖުބޫރުވުން
އެމްޑީޕީގެ އަސާސީ ގަވާއިދަށް ގެނައި އިސްލާހުތައް ފާސް ކުރި ނަމަވެސް އަދި މުޅި އަސާސީ ގަވާއިދު ފާސްކުރަން މިރޭ އިތުރު ވޯޓެއް ނަގާނެ އެވެ.
އަސާސީ ގަވާއިދު ފާސް ކުރަން ނަގާ ވޯޓަށްފަހު މިރޭ އޮންނާނީ ކޮންގްރެސް ނިންމުމުގެ ޖަލްސާ އެވެ. އެ ޖަލްސާގައި ހިޔާލުފާޅު ކުރުމުގެ ފުރުސަތު އާންމު މެންބަރުންނަށް އޮންނާނެ ކަމަށް މިއަދު އިއުލާނު ކުރި އެވެ.
