އަންހެނުން ގޭގައި ކުރާ މަސައްކަތަކީ އިގުތިސޯދީ އަގެއް ހުރި ކަމެއް ކަމަށާއި އެކަމުގެ އަގު ކޮންމެވެސް ގޮތަކުން ވަޒަންކުރަން ޖެހޭ ކަމަށް މޯލްޑިވިއަން ޑިމޮކްރަޓިކް ޕާޓީގެ ޕްރައިމަރީގައި ވާދަކުރައްވާ ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީގެ ކުރީގެ ޗެއާޕާސަން މިވަގުތު ހުންނެވީ ރިޔާސީ ޕްރައިމަރީއަށް ތާއީދު ހޯދުމަށް އައްޑޫގަ އެވެ. އެ ދަތުރުގެ ތެރެއިން ފައްޔާޒު ވަނީ އެ އަތޮޅު ހުޅުދޫ އަދި މީދޫގެ އެމްޑީޕީ މެންބަރުންނާއެކު ސިޔާސަތު އެކަށައެޅުމަށް އެ މީހުންގެ ހިޔާލު ހޯދުމަށް ވޯކްޝޮޕެއް ބާއްވާފަ އެވެ.
އެ ވޯކްޝޮޕްގައި ވާހަކަ ދައްކަވަމުން އޭނާ ވިދާޅުވީ ދަރިން ރަނގަޅު ގޮތުގައި ތަރުބިއްޔަތުކުރަން ގޭގައި މަސައްކަތްކުރާ އަންހެނުންގެ އަގުވަޒަން ކުރުމުގެ ގޮތުން ފިރިމީހާ ނުވަތަ ދައުލަތުން ފައިސާ ދޭންޖެހޭ ކަމަށެވެ.
"ގޭތެރޭގައި މަސައްކަތްކުރުމުގެ ވާހަކަ މިތާ ދެކެވުނީމާ، އަޅުގަނޑު ދެކޭ ގޮތުގައި އެއީ އަސްލުގައި ފިރިމީހާ ނުވަތަ ދައުލަތުން އެމީހުންނަށް ލާރި ދޭންޖެހޭ ކަމެއް. އެ ކުދިން ބަލާ ބޮޑުކުރަނީ މުޖުތަމައުއަށް އެ ނެރެނީ މުޅި މުޖުތަމައުގައި އެ ކުދިންނަށް މިސާލަކަށް 18 އަހަރުވަންދެން މައިމީހާ އެބަލަނީ. ފިރިމީހާއެއް ނޫން ގޭގައި އެ ހުންނަނީ. ފިރިމީހާގެ ރޯލު ކުޑަކުރަނީއެއް ނޫން އެއްގޮތަކަށްވެސް،" ފައްޔާޒް ވިދާޅުވި އެވެ.
އޭނާއަށް ވެރިކަން ކުރަން ފުރުސަތު ފަހިވެއްޖެނަމަ ވަޒީފާއަކަށް ނުގޮސް ގޭތެރެ ބެލެހެއްޓުމަށް ތިބޭ އަންހެނުންނަށް ޕެންޝަނެއް ދީގެންވިޔަސް އެފަދަ މީހުންގެ އަގުވަޒަން ކުރާނެ ކަމަށް ފައްޔާޒް ވިދާޅުވި އެވެ.
"އެހެންނަމަވެސް އަންހެނުން ގޭތެރޭގައި ތިބެ ރަނގަޅަށް އެ ދަރިން ބެލުމަކީ އަޅުގަނޑުމެން ފިރިހެނުންނަށްވެސް އޮތް މުހިންމު ކަމެއް. އަންހެނުން އެކަން ނުކުރާ ކަމަށްވަންޏާމުން މުޖުތަމައު ހަލާކުވީ. އެހެންވީމަ އަޅުގަނޑު ދެކޭ ގޮތުގައި އެއީ އިކޮނޮމިކަލް ވެލިއުއެއް ހުރި އެއްޗެއް. އިގުތިސާދީ އަގެއް ހުރި ކަމެއް އަންހެނުން ގޭގައި ކުރާ މަސައްކަތް އެއީ. ކޮންމެވެސް ގޮތަކަށް އަޅުގަނޑުމެން ހޯދަން އެބަޖެހޭ އެމީހުންނަށް ޕެންޝަނެއް ނަމަވެސް ދޭން."
ފައްޔާޒް ވިދާޅުވީ ރާއްޖޭގެ އާބާދީގެ ދެބައިކުޅަ އެއްބަޔަކީ އަންހެނުން ކަމަށްވާއިރު، އަންހެނުންގެ ހާލަތު ރަނގަޅުކުރުމަކީ މަޖުބޫރު ކަމެއް ކަމަށް ދެކޭ ކަމަށެވެ. އޭނާ ވިދާޅުވީ މުޖުތަމައުގައި ފިރިހެނުންނާ އަޅާބަލާއިރު އަންހެނުންނަށް ލިބޭ ފުރުސަތުތައް ވެސް ނިސްބަތުން މަދު ކަމަކީ ހަގީގަތް ކަމަށެވެ.
"އަޅުގަނޑުމެންގެ މުޖުތަމައުގައި ދެބައިކުޅަ އެއްބަޔަށްވުރެ ގިނައީ އަންހެނުން. އެހެންވީމަ މުޖުތަމައުއެއް ރަނގަޅަށް އޮތުމަކީ އަޅުގަނޑަށްވެސް ލިބޭ ފައިދާއެއް ފިރިހެނަކަށްވީތީވެސް. އެހެންވީމަ އަންހެނުންގެ ހާލަތު ރަނގަޅުކުރަން މަޖުބޫރުމިވަނީ. އެކަމަކު އަޅުގަނޑުމެންނަކީ ޒަމާނުއްސުރެ ފިރިހެނުން ޑޮމިނޭޓެޑް ސޮސައިޓީތަކަށްވާތީ އަޅުގަނޑުމެން މި ހުށަހަޅަނީ ބައެއް ކަންކަމުގައި އަންހެނުންނަށް ފިރިހެންުންނަށްވުރެ އިތުރު ފުރުސަތު ދޭން،" ފައްޔާޒް ވިދާޅުވި އެވެ.
މީގެއިތުރުން ފައްޔާޒް ވިދާޅުވީ އަންހެނުންނަށް ފުރުސަތުތައް ފަހިކޮށްދިނުމުގެ ގޮތުން އެމްޑީޕީން ހުށަހަޅައިގެން ކައުންސިލްތަކުގައި އަންހެނުންނަށް ހާއްސަ ގޮނޑިތަކެއް ކަނޑައެޅުމުން އޭގެ ފައިދާ ފެންނަމުންދާ ކަމަށާއި ބައެއް އަންހެން ކައުންސިލަރުން ފިރިހެން ކައުންސިލަރުންނަށްވުރެ ވެސް މާ ވަރުގަދަ ކަމަށެވެ.
ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާންކުރައްވާފައިވާ ފައްޔާޒް އަންނަނީ އޭނާ ރައްޔިތުންނަށް ހުށަހަޅުއްވާ "ބޮޑު ބަދަލު" ސިޔާސަތާ ގުޅޭގޮތުން އާންމުންނަށް މައުލޫމާތުތައް ފޯރުކޮށްދީ ހިޔާލު ހޯދަމުންނެވެ. އޭގައި ވަރަށް ބޮޑަށް އަންހެނުން ބާރުވެރިކުރުވުމުގެ ސިޔާސަތުތަކެއް ވަނީ ހިމަނާފަ އެވެ.
އެމްޑީޕީގެ ރިޔާސީ ޕްރައިމަރީގައި ފައްޔާޒްގެ އިތުރުން ދެން ވާދަކުރައްވާނެކަން އިއުލާންކުރައްވާފައިވަނީ އެމްޑީޕީގެ ކުރީގެ ރައީސް އަބްދުﷲ ޝާހިދު އާއި ހުޅުމާލެ ދެކުނު ދާއިރާގެ މެންބަރު އަހްމަދު ޝަމްހީދު އަދި ކުރީގެ ނައިބު ރައީސް ފައިސަލް ނަސީމް އެވެ.
