މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރަސްމީ ޕާޓީ، "ޔެލޯ" މިހާރު ކުރިއަށްދާ އެ ޕާޓީގެ ކޮންގްރެސްގެ ތެރެއިން މިއަދު އިފްތިތާހުކޮށްފި އެވެ.
އެމްޑީޕީން ބުނި ގޮތުގައި މި އެޕަކީ އެ ޕާޓީގެ މެންބަރުންނާ ހަމައަށް ޕާޓީގެ ހަރަކާތްތަކުގެ މައުލޫމާތާއި އެހެނިހެން ކަންކަން ފަސޭހައިން ފޯރުކޮށްދެވޭ ގޮތަށް ފަރުމާކޮށްފައިވާ އެޕެއް ކަމަށެވެ.
""ޔެލޯ އެޕް ވެގެންދާނީ ޕާޓީގެ އިދާރީ ކަންކަމާއި، މެންބަރުންނަށް މައުލޫމާތު ފޯރުކޮށްދިނުމާއި، ޕާޓީގެ މެންބަރުންގެ ގުޅުން ބަދަހިކޮށް މަޝްވަރާކުރުމަށް ބޭނުންކުރެވޭނެ އެޕެއް،" އެމްޑީޕީީން ބުންޏެވެ.
"ޔެލޯ" އަކީ އެމްޑީޕީގެ ކޮންމެ މެންބަރަކަށް ވެސް އައިޑީ ކާޑު ނަމްބަރު ޖަހައިގެން ލޮގިން ކުރެވޭ އެޕެކެވެ. އަދި ޕާޓީގެ މެންބަރެއް ނޫން ނަމަ، އެޕަށް ލޮގިން ވާން އިންން ވިންޑޯގެ ތެރެއިން އެ ޕާޓީގެ މެންބަރަކަށް ވާން ހުށަހެޅެ އެވެ.
އެމްޑީޕީގެ އެޕްގައި ހިމެނޭ ފީޗާތަކުގެ ތެރޭގައި މެންބަރުންގެ ޑިޖިޓަލް ކާޑާއި، އެ މީހަކު ނިސްބަތްވާ ގޮފީގެ މައުލޫމާތާއި، ޕާޓީގެ ހަބަރުތަކުގެ އިތުރުން ކުރިއަަށް ހުރި ޕާޓީގެ ހަރަކާތްތަކުގެ ކަލަންޑަރު ހިމެނެ އެވެ. އަދި އެޕުގައި ހިމެނޭ ކޮމިއުނިޓީ ޗެޓު ފީޗާއާއެކީ، މެންބަރުންނާއި، ގޮފިތަކާއި، ކޮމިޓީތައް ގުޅުވާލަދޭނެ ކަމަށް އެ ޕާޓީން ބުންޏެވެ.
މި އެޕްލިކޭޝަން އެޕަލް އެޕް ސްޓޯރުންނާއި ގޫގުލް ޕްލޭސްޓޯރުން މިހާރު ޑައުންލޯޑު ކުރެވޭނެ އެވެ.
އެމްޑީޕީއަކީ ރާއްޖޭގެ އެންމެ ދުވަސްވީ، އަދި މި ވަގުތު އެންމެ ބޮޑު އިދިކޮޅު ޕާޓީ އެވެ. އިލެކްޝަންސް ކޮމިޝަންގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި އެމްޑީޕީގައި 55،399 މެންބަރުން އެބަތިއްބެވެ.
މިހާރު ކުރިއަށްދާ އެމްޑީޕީގެ ކޮންގްރެސްއަކީ އެ ޕާޓީގެ ފަސް ވަނަ ގައުމީ ކޮންގްރެސް އެވެ. މި ފަހަރުގެ ކޮންގްރެސްގައި 986 މަންދޫބުން ބައިވެރިވެ އެވެ.
