ނިމިދިޔަ ރިޔާސީ އިންތިހާބު އެމްޑީޕީއަށް ނާކާމިޔާބުވި އެންމެ ބޮޑު އެއް ސަބަބަކީ ރިޔާސީ ޕްރައިމަރީއާ ގާތްވެފައިވަނިކޮށް އެ ޕާޓީން ބަޔަކު ވަކިކުރިކަމަށް ކުރި ތުހުމަތު ކަމަށް އެމްޑީޕީގެ ޕީޖީ ލީޑަރު، އިބްރާހިމް ނާޒިލް ވިދާޅުވެއްޖެ އެވެ.
އެމްޑީޕީގެ އަސާސީ ގަވާއިދަށް އިސްލާހެއް ހުށަހަޅުއްވަމުން ނާޒިލް ވިދާޅުވީ އެފަދަ ކަންކަން ދިމާވަނީ، ޕާޓީގެ އަސާސީ ގަވާއިދުގައި ސާފުކޮށް ކަން ކުރާންޖެހޭ އުސޫލު ލިޔެވިފައި ނެތުމުން ކަމަށެވެ.
"2023 ވަނަ އަހަރު އަޅުގަނޑުމެންނަށް ބޭއްވުނު ރިޔާސީ ޕްރައިމަރީގައި ވަރަށް ބޮޑު އިލްޒާމެއް، ބަދުނާމެއް ނޫނިއްޔާމުން ވައްކަމެއް އަޅުވާލެވުނު އޭރުގެ ޗެއާޕާސަންގެ ބޮލުގައި. ގާތްގަނޑަކަށް 29،000 މެންބަރުން ވަކިކުރި ވާހަކަ ވޯޓާދިމާކޮށް،" ނާޒިލް ވިދާޅުވި އެވެ.
"އެ ވާހަކަ އެއީ ހަގީގަތުގައި އަޅުގަނޑުމެންނަށް ރިޔާސީ އިންތިހާބުގައި ނާކާމިޔާބުވުމަށް މެދުވެރިވި އެންމެ ބޮޑު އެއް ސަބަބުކަމަށް އަޅުގަނޑު ދަންނަވަނީ ވެސް ހަމަ ކެރި ހުރެ."
އެ މައްސަލައަށް ހައްލެއް ހޯދުމަށްޓަކައި ނާޒިލް ވަނީ އަސާސީ ގަވާއިދަށް ތިން އިސްލާހެއް ހުށަހަޅުއްވައިފަ އެވެ.
އެގޮތުން، އެމްޑީޕީގެ އެތެރޭގެ އިންތިހާބެއްގައި ވޯޓު ލެވޭނީ އެ އިންތިހާބެއް ބާއްވާ ތާރީހުގެ ތިން މަސްދުވަސް ކުރިން އެ ޕާޓީގެ މެންބަރެއްގެ ގޮތުގައި ރެޖިސްޓްރީވެފައިވާ މީހުންނަށް ކަމަށާއި ކޮންމެ އިންތިހާބެއް ވެސް ބޭއްވުމުގެ ހަތަރު މަސްދުވަސް ކުރިން އިންތިހާބު އިއުލާނު ކުރަން އޭނާ ހުށަހަޅުއްވާފައިވެ އެވެ.
ނަމަވެސް، ދެން އެންމެ އަވަހަށް އޮންނަ ގައުމީ މަޖިލީހުގެ އިންތިހާބުގައި އެ މުއްދަތުތަކަށް އަމަލު ކުރަން ނުޖެހޭނެގޮތަށް ވެސް މާއްދާއެއް ނާޒިލް ހުށަހަޅުއްވާފައިވެ އެވެ. ސަބަބެއްގެ ގޮތުގައި އޭނާ ވިދާޅުވީ ގައުމީ މަޖިލީހުގެ އުމުރު މިހާރު ވެސް ހަމަވެފައިވުމެވެ. އެހެންކަމުން، ވީހައިވެސް އަވަހަކަށް އައު ގައުމީ މަޖިލީހަށް މެންބަރުން އިންތިހާބު ކުރުމަކީ މުހިންމު ކަމެއް ކަމަށް ނާޒިލް ވިދާޅުވި އެވެ.
ނާޒިލްގެ އެ ހުށަހެޅުއްވުމަށް ތާއީދުކުރެއްވީ ތޮއްޑޫ ދާއިރާގެ މަޖިލިސް މެންބަރު، ހުސެއިން ސަމީރު އެވެ.
